Pewaliꞌána
Daritakáná pewaliꞌána duniáꞌ hai upu-upu óntóꞌna
1
Rungu-runguna Pueꞌ Ala mampopewaliꞌ duniáꞌ hai upu-upu óntóꞌna.
2 Tempó iti,
duniáꞌ tiꞌara mani molenggeꞌá hai hoa mani.
Bukeꞌ mani uwai hai modediꞌ mani,
agáiáná Inaona Pueꞌ Ala mokale oaꞌ i wongko uwai.
Gen 1:3
3 Mewaliꞌ,
mongkóráꞌ miꞌi Pueꞌ Ala,
Nauliꞌ,
“Mewaliꞌ miꞌi mahingkaaꞌ!”
Liliu mewaliꞌ mahingkaaꞌ.
4 Góeꞌ laluNa mampeita kamaroꞌana apa to Nabábehi iti.
Roo onoꞌ,
Ia mogááꞌ kamahingkaaꞌ hangko i kamakáindi.
5 To kamahingkaaꞌ Nahangaꞌ “mabaa”,
hai kamakáindi Nahangaꞌ “káindi”.
Liu miꞌi káindi,
haweꞌ miꞌi mepulo.
Iti miꞌi alo kaꞌisáꞌ.
6 Roo onoꞌ,
mongkóráꞌ wopiꞌi Pueꞌ Ala,
Nauliꞌ,
“Hangaa-ngaa ara laerawa to moparailiki upu-upu uwai i rombuaꞌ katoroꞌá.”
7 Mewaliꞌ Pueꞌ Ala mampopewaliꞌ laerawa,
hai mampopogááꞌ uwai i rombuaꞌ katoroꞌá,
to ara i wóiꞌ laerawa hai to ara i wongkona.
8 Laerawa iti Nahangaꞌ “langiꞌ”.
Liu miꞌi káindi,
haweꞌ miꞌi mepulo.
Iti miꞌi alo kaduá.
9 Roo onoꞌ,
mongkóráꞌ wopiꞌi Pueꞌ Ala,
Nauliꞌ,
“Uwai to ara i wóiꞌ langiꞌ hangaa-ngaa moili i hambuaꞌ katoroꞌá bona mesupaꞌ kámárá.”
Noꞌonoꞌ mpuꞌu miꞌi pewaliꞌna.
10 Kámárá iti nahangaꞌ Pueꞌ Ala “lorena,”
hai kahirámpuá uwai Nahangaꞌ “tahiꞌ”.
Góeꞌ laluNa mampeita kamaroꞌana upu-upuna to Nabábehi iti.
11 Roo onoꞌ,
mongkóráꞌ wopiꞌi Pueꞌ Ala,
“Tampoꞌ hangaa-ngaa mopaꞌara mampopengaa tudaꞌ-tudaꞌ hai kau,
maroꞌa to motumbeꞌ,
maroꞌa to molihu wuaꞌna,
bona ara tudaꞌ-tudaꞌ hai kau i duniáꞌ,
mouláꞌ pákáꞌ-pákáꞌna.”
Noꞌonoꞌ mpuꞌu miꞌi pewaliꞌna.
12 Tampoꞌ mopaꞌara mampopengaa tudaꞌ-tudaꞌ hai kau.
Góeꞌ Pueꞌ Ala mampeita kamaroꞌana upu-upuna to Nabábehi iti.
13 Liu miꞌi káindi,
haweꞌ miꞌi mepulo.
Iti miꞌi alo katálu.
14-15 Roo onoꞌ,
mongkóráꞌ wopiꞌi Pueꞌ Ala,
Nauliꞌ,
“Hangaa-ngaa ara wangkaꞌ i langiꞌ to mopamabaa duniáꞌ bona tegááꞌ mabaa hai káindi.
Iti to ina mopakanótó tempó,
ia miꞌi alo,
wulá hai pare.”
Noꞌonoꞌ mpuꞌu miꞌi pewaliꞌna.
16 Pueꞌ Ala mampopewaliꞌ rombuaꞌ wangkaꞌ to mahile,
ia miꞌi alo to mowangkaꞌi mabaa,
hai wulá to mowangkaꞌi káindi.
Hai Nabábehi woꞌo handaꞌ betue.
17 Alo,
wulá hai betue iti Nawoli i langiꞌ bona mowangkaꞌi duniáꞌ
18 mabaa hai káindi,
bona mampopontaniꞌ kamabaa hai kamakáindi.
Góeꞌ Pueꞌ Ala mampeita kamaroꞌana upu-upuna to Nabábehi iti.
19 Liu káindi,
haweꞌ miꞌi mepulo.
Iti miꞌi alo kaꞌiba.
20 Mongkóráꞌ wopiꞌi Pueꞌ Ala,
Nauliꞌ,
“Hangaa-ngaa handaꞌ binataꞌ to tueꞌ i lalu uwai,
hai hangaa-ngaa araheꞌ woꞌo mampopengaa tádáhi to membara-mbara i laerawa.”
21 Noꞌonoꞌ miꞌi Pueꞌ Ala mampopewaliꞌ binataꞌ to mahile ntepuꞌu tueꞌ i tahiꞌ hai mampopengaa binataꞌ ntániꞌna tueꞌ i uwai,
mouláꞌ pákáꞌ-pákáꞌna.
Napopewaliꞌheꞌ woꞌo mampopengaa tádáhi,
mouláꞌ pákáꞌ-pákáꞌna.
Góeꞌ laluNa mampeita kamaroꞌana upu-upuna to Nabábehi iti.
22 Roo onoꞌ,
Nawátiꞌmoheꞌ upu-upu to Napopewaliꞌ iti,
haneꞌi Naweꞌiheꞌ párentá bona memuleꞌheꞌ duuꞌna tahiꞌ bukeꞌ hai bouꞌ,
hai kahandaꞌraꞌ tádáhi tetátámbái i duniáꞌ.
23 Liu miꞌi káindi,
haweꞌ miꞌi mepulo.
Iti miꞌi alo kalima.
24-25 Mongkóráꞌ wopiꞌi Pueꞌ Ala,
Nauliꞌ,
“Tampoꞌ hangaa-ngaa mopaꞌara mampopengaa binataꞌ to tueꞌ,
mouláꞌ pákáꞌ-pákáꞌna,
maroꞌa to mendólóꞌ,
maroꞌa to manondoꞌ,
hai upu-upu binataꞌ to maila.”
Noꞌonoꞌ mpuꞌu miꞌi pewaliꞌna.
Pueꞌ Ala mampopewaliꞌ mampopengaa binataꞌ,
mouláꞌ pákáꞌ-pákáꞌna.
Góeꞌ laluNa mampeita kamaroꞌana upu-upuna to Nabábehi iti.
26 Mongkóráꞌ wopiꞌi Pueꞌ Ala,
Nauliꞌ,
“Maroꞌa Tabábehi taunaa mouláꞌ pambiáráNtaꞌ haduduáNtaꞌ.b
Hira iti to ina mokuasaꞌiheꞌ hinángkáꞌ to ara i duniáꞌ,
maroꞌa bouꞌ to i tahiꞌ,
maroꞌa tádáhi to i laerawa,
hai mampopengaa binataꞌ,
tepasuaꞌ to manondoꞌ hai to mendólóꞌ.”
27 Noꞌonoꞌ miꞌi Pueꞌ Ala mampopewaliꞌ tauna mouláꞌ pambiáráNa haduduáNa.
Napopewaliꞌheꞌ tobaleilo hai towawine.
28 Hangko ionoꞌ,
Nawátiꞌheꞌ,
Nauliꞌ,
“Memuleꞌmokou duuꞌmi handaꞌ,
bona pemuleꞌámi mokatoroꞌi hai mokuasaꞌi humalele duniáꞌ.
Kuweꞌikou bágóꞌ mokádipurá hinángkáꞌna bouꞌ to i tahiꞌ,
tádáhi to i laerawa,
hai hinángkáꞌ binataꞌ to tueꞌ i lorena.”
29 Mongkóráꞌ wopiꞌi Pueꞌ Ala,
Nauliꞌ,
“Peita!
Kuweꞌimokou pandeꞌmi hangko i hinángkáꞌ tudaꞌ-tudaꞌ to powuaꞌ hai kau to molihu wuaꞌna.
30 Hai i upu-upu binataꞌ to i lorena,
tádáhi to i laerawa,
hai binataꞌ to mendólóꞌ,
i upu-upu to meinao,
Kuweꞌimoheꞌ hinángkáꞌna rumpuꞌ hai taweꞌngkau mewaliꞌ pandeꞌraꞌ.”
Noꞌonoꞌ mpuꞌu miꞌi pewaliꞌna.
31 Napeita Pueꞌ Ala hinángkáꞌna to Nabábehi iti,
hai góeꞌ ntepuꞌu laluNa mampeita kamaroꞌana.
Liu miꞌi káindi,
haweꞌ miꞌi mepulo.
Iti miꞌi alo kaꞌini.