2
Noꞌonoꞌ miꞌi Pueꞌ Ala mampopewaliꞌ duniáꞌ hai upu-upu óntóꞌna i lalu ini alona kamaruena.
2 I alo kapitu Ia mengkaroo,
láwiꞌ hópóꞌ miꞌi bágóꞌNa.
3 Alo kapitu iti Nawátiꞌ,
hai Napopontaniꞌ hangko i alo ntániꞌna,
láwiꞌ i alo kapitu iti Ia mengkaroo hangko i upu-upu bágóꞌNa mampopewaliꞌ duniáꞌ.
Hinoe Párádesiꞌa
4 Deꞌe miꞌi daritakáná pampopewaliꞌna duniáꞌ hai upu-upu óntóꞌna.b
I tempóna PUEꞌ Ala mampopewaliꞌ langiꞌ hai tampoꞌ,
5 tiꞌara mani ara tinudaꞌ to tueꞌ ba motumbeꞌ,
hai tiꞌara mani ara tudaꞌ-tudaꞌ ba kau i duniáꞌ,
láwiꞌ udá tiꞌara mani Napaꞌara hai tiꞌara mani woꞌo ara tauna to mampobágóꞌ tampoꞌ iti.
6 To mewaliꞌ peá,
uwai masisiꞌ mai hangko i lapi tampoꞌ hai moloeꞌi wongko tampoꞌ.
7 Hangko ionoꞌ,
PUEꞌ Ala moala tampoꞌ haneꞌi moteru hadua tauna.c
Roo onoꞌ,
natawueꞌ PUEꞌ Ala inao ngkatueꞌ i lalu bóbeꞌ hilóna,
haneꞌi tueꞌ mpuꞌu miꞌi tauna iti.
8 Kaliliuána,
nabábehi miꞌi PUEꞌ Ala hambuaꞌ hinoe i tampoꞌ Párádesiꞌ tándáꞌ i mata alo,
hai tauna iti Napatoroꞌ i hinoe iti.
9 Ionoꞌ PUEꞌ Ala mopatueꞌ miꞌi mampopengaa kau to mababe hai to matamaꞌ wuaꞌna.
I tangaꞌ-tangaꞌ hinoe iti ara rompóꞌá kau,
ia miꞌi:
Kau to Mopaꞌara Katueꞌd hai Kau to Mampoweꞌi Kanótó Lalu Apa to Maroꞌa hai Apa to Kadake.
10 Ara hampenga uwai to moili hangko i tampoꞌ Párádesiꞌ to mouwaihingi hinoe iti.
I rawa hinoe,
uwai iti mogááꞌ mewaliꞌ iba pengána.
11 Pengána to kaꞌisáꞌ hangaꞌna Piso.
Uwaina moili melempó i tampoꞌ Hawila.
12 Ionoꞌ telámbiꞌ buláwá to maroꞌa ntepuꞌu,
huloꞌ,
hai watu paramata.
13 Pengána to kaduá hangaꞌna Giho.e
Uwaina moili melempó i tampoꞌ Kusi.
14 Pengána to katálu hangaꞌna Tigiri.
Uwaina moili i hambali tampoꞌ Asuri tándáꞌ i mata alo.
Pengána to kaꞌiba hangaꞌna Epara.
16 Napohawaꞌá miꞌi tauna iti,
Nauliꞌ,
“Upu-upu wuaꞌngkau to ara i hinoe deꞌe peisá nuandeꞌ,
17 agáiáná wuaꞌngkau to mampoweꞌi kanótó lalu apa to maroꞌa hai apa to kadake,
tiꞌara peisá nuandeꞌ,
láwiꞌ ane nuandeꞌi,
tempó iti woꞌo bateꞌmu ina mate.”
18 Mongkóráꞌ wopiꞌi PUEꞌ Ala,
Nauliꞌ,
“Tiꞌara maroꞌa tauna iti tueꞌ haduduána.
Hangaa-ngaa Kubábehi rángána to hintotoꞌ medurei oaꞌ.”
19 Naꞌala miꞌi tampoꞌ haneꞌi Napopewaliꞌ mampopengaa binataꞌ to tueꞌ i lorena hai tádáhi to ara i laerawa.
Hinángkáꞌna binataꞌ naꞌántiheꞌ PUEꞌ Ala lao i lindoꞌna tauna iti,
bona ia moitaheꞌ hai mopakanótó hangaꞌraꞌ.
Noꞌonoꞌ miꞌi rárána binataꞌ i lorena hai i laerawa molámbiꞌheꞌ hangaꞌraꞌ hampákáꞌ-hampákáꞌ.
20 Mewaliꞌ tauna iti mohangaꞌheꞌ hinángkáꞌna binataꞌ to manondoꞌ,
tádáhi to i laerawa,
hai binataꞌ to maila,
agáiáná tiꞌara mani ara rángána to hintotoꞌ ina medurei.
21 Onoꞌ miꞌi haneꞌi PUEꞌ Ala mopaletaꞌ Adama,
hai i tempóna letaꞌ mposoꞌ,
naꞌala miꞌi Pueꞌ Ala óhóꞌna hangkau haneꞌi Naiwungi huleꞌ hai óntóꞌna.
22 Hangko i óhóꞌna iti,
Nabábehi miꞌi hadua towawine,
haneꞌi Naꞌánti lao i hia.
23 Tempóna moita towawine iti,
molaluita miꞌi tauna iti nauliꞌ:
“Hangko deꞌe riꞌi
ara to hibali hai kódóꞌ!
Buꞌuna hangko i buꞌungkuꞌ.
Óntóꞌna hangko i óntóꞌkuꞌ.
Ina kuhangaꞌ ‘towawine’,
láwiꞌ ia raꞌala hangko i tobaleilo.”f
24 Onoꞌ miꞌi haneꞌi tobaleilo hangaa-ngaa mopálehi umána hai inána,
hai tueꞌ hingkakani hai toinána,
bona to rodua iti mewaliꞌheꞌ hawátá-wátá.
25 Tobaleilo hai towawine iti menggelá maniheꞌ,
agáiáná tiꞌara raisá mahili.