Tauna manawoꞌ i lalu dósá
3
Ara hambaꞌa lelótó to melumbuꞌ ákálána hangko i hinángkáꞌ binataꞌ to napopewaliꞌ PUEꞌ Ala.
Lelótó iti mekuneꞌ i towawine,
nauliꞌ,
“Toꞌu mpuꞌu paꞌi tiꞌarakou napaliu Pueꞌ Ala mandeꞌ hinángkáꞌna wuaꞌngkau to ara i hinoe deꞌe?”
2 Nahániki towawine iti,
“Upu-upu wuaꞌngkau to ara i hinoe deꞌe peisá kiandeꞌ,
3 agáiáná nauliꞌ Pueꞌ Ala,
‘Wuaꞌngkau to i tangaꞌ-tangaꞌ hinoe deꞌe tiꞌara peisá niandeꞌ,
hai tiꞌara woꞌo peisá nikamaꞌ,
láwiꞌ ane nikamaꞌ ba niandeꞌ,
ina matekou.’ ”
4 Mehániꞌ lelótó,
“Tiꞌara toꞌu iti.
Tiꞌarakou ina mate.
5 Pueꞌ Ala manguliꞌ noꞌonoꞌ láwiꞌ Naisá,
ane mandeꞌkou wuaꞌngkau iti,
ina tebungkáhi pekirimi.
Hai ane noꞌonoꞌi,
kómu hangaa-ngaa ina hibali pekirimi hai Pueꞌ Ala,
láwiꞌ ina niꞌisá apa to maroꞌa hai apa to kadake.”
6 Kanaitána peá towawine wuaꞌngkau iti mababe hai matamaꞌ raꞌandeꞌ,
nauliꞌ i laluna:
maroꞌa ntepuꞌu ane upu-upuna peisá kuisá.a
Hangko ionoꞌ,
napupu miꞌi wuaꞌngkau iti haneꞌi naꞌandeꞌ,
hai naweꞌi toámána to hingkakani hai ia bona naꞌandeꞌ woꞌo.
7 Kásáliu tebungkáhi miꞌi pekiriraꞌ haneꞌi raisá miꞌi penggeláraꞌ.
Onoꞌ haneꞌi moalamoheꞌ taweꞌngkau ara,
rapatakaꞌ,
rapopoháláꞌ wátáraꞌ.
8 Kalumbaꞌna,
rahádi miꞌi PUEꞌ Ala molulumao i lalu hinoe iti,
haneꞌiheꞌ lao mentabuni i tangaꞌna kau bona tiꞌaraheꞌ Naita.
9 Agáiáná PUEꞌ Ala mokióꞌ tauna iti,
Nauliꞌ,
“Iumbámokoꞌ?”
10 Nahániki,
“Deꞌentoaꞌ,
Pueꞌ.
KuhádiKoꞌ molulumao i lalu hinoe.
Malááꞌaꞌ láwiꞌ tiꞌaraꞌaꞌ mewaruꞌ,
onoꞌ miꞌi haneꞌi mentabuniaꞌ.”
11 Napekuneꞌ PUEꞌ Ala,
“Heáná to mohángáꞌákoꞌ katiꞌárámu mewaruꞌ?
Ineeꞌ mpuꞌu paꞌi nuandeꞌ miꞌi wuaꞌngkau to Kularaꞌámokou ineeꞌ niandeꞌ.”
12 Nahániki,
“Towawine to Nuweꞌiaꞌ mamporángáꞌaꞌ,
ia miꞌi to mampoweꞌiaꞌ haneꞌi kuandeꞌ wuaꞌngkau iti.”
13 Mewaliꞌ mekuneꞌ wopiꞌi PUEꞌ Ala i towawine iti,
Nauliꞌ,
“Apa riꞌi to nubábehi?”
Mehániꞌ towawine,
“Naꞌákálángiaꞌ lelótó,
onoꞌ miꞌi haneꞌi kuandeꞌ wuaꞌngkau iti.”
14 Roo onoꞌ,
PUEꞌ Ala molaluita i lelótó iti,
Nauliꞌ:
“Ánti bábehiámu iti,
io hangaa-ngaa molámbiꞌkoꞌ pehuku.
Hangko i hinángkáꞌ binataꞌ,
to manondoꞌ hai to maila,
bateꞌna io to tehuku.
Mantepuꞌu deꞌe-deꞌe duuꞌmu mate,
io hangaa-ngaa mendólóꞌkoꞌ hai taꞌimu,
hai awu tampoꞌ peá to ina mewaliꞌ pandeꞌmu.
15 Ina Kupopoewalikoꞌ hai towawine iti.
Pemuleꞌámu hai pemuleꞌána ina moewaliheꞌ.
Pemuleꞌána ina mopangka wuáꞌmu,b
hai ina nutilóꞌ padóꞌna.”
16 Hangko ionoꞌ,
nauliꞌ PUEꞌ Ala i towawine iti:
“Ina Kutámbái kapárimu
i tempómu káláꞌeá ba moánáꞌ.
Agáiáná kehapiꞌ noꞌonoꞌ,
bateꞌ-bateꞌna peá ina nuꞌundeꞌ toámámu,
hai toámámu ina mokuasaꞌikoꞌ.”
17 Nauliꞌ wopiꞌi PUEꞌ Ala i Adama,
“Ánti kanupeuláꞌina laluitana towawinemu,
haneꞌikoꞌ woꞌo mandeꞌ wuaꞌngkau to Kularaꞌmokoꞌ ineeꞌ nuandeꞌ,
tampoꞌ deꞌe tehuku.
Onoꞌ miꞌi haneꞌi mantepuꞌu deꞌe-deꞌe duuꞌmu mate,
ina maꞌángkárá nuhádi mampeliꞌ pandeꞌmu.
18 Mampopengaa pákáꞌna dui ina tueꞌ hangko i tampoꞌ,
hai apa to tueꞌ i pádá ina mewaliꞌ pandeꞌmu.
19 Hangaa-ngaa mobágóꞌkoꞌ matimi,
bona nulámbiꞌ pandeꞌmu.
Noꞌonoꞌ miꞌi katueꞌmu duuꞌmu mesuleꞌ huleꞌ i tampoꞌ,
láwiꞌ hangko i tampoꞌkoꞌ Kuteru,
hai ina mesuleꞌkoꞌ huleꞌ mewaliꞌ tampoꞌ.”
20 Hangko ionoꞌ,
Adama mohangaꞌ toinána Hewá,
lempóna “tueꞌ” ba “to mopatueꞌ”,
láwiꞌ ia miꞌi to ina momuleáka upu-upu tauna to tueꞌ i duniáꞌ.
21 Roo onoꞌ,
PUEꞌ Ala mampobábehiáheꞌ waruꞌ hangko i koliꞌ binataꞌc haneꞌi Nawaruꞌiáheꞌ.
Adama hai Hewá rawuraheꞌ hangko i hinoe Párádesiꞌ
22 Nauliꞌ PUEꞌ Ala,
“Deꞌe-deꞌe tauna hibalimoheꞌ hai Kitaꞌ,d
láwiꞌ raisá miꞌi apa to maroꞌa hai apa to kadake.
Mewaliꞌ hangaa-ngaa Tapakaraoꞌheꞌ hangko i hinoe deꞌe bona tiꞌaraheꞌ woꞌo mandeꞌ hangko i Kau to Mopaꞌara Katueꞌ,e
láwiꞌ ane mandeꞌheꞌ wuaꞌngkau iti,
ina tueꞌheꞌ duuꞌna i rue-ruena.”
23 Onoꞌ miꞌi haneꞌi tohamboko iti Nawuraheꞌ PUEꞌ Ala hangko i hinoe Párádesiꞌ,
hai Adama Nahuoꞌ lao mampobágóꞌ tampoꞌ,
láwiꞌ hangko i tampoꞌ wátána Adama nateru Pueꞌ Ala.
24 Karooraꞌ Nawura,
Nahuoꞌmoheꞌ bahangapa kerubif lao mokámpái hinoe Párádesiꞌ tándáꞌ i mata alo.
Nawoli woꞌo ionoꞌ hamata pihoꞌ to roreꞌ,
to membara-mbara mokámpái babaꞌ pesuaꞌá.
Nabábehi noꞌonoꞌ bona tiꞌara ara tauna to peisá mesuaꞌ i hinoe hai mohungkuki Kau to Mopaꞌara Katueꞌ iti.