Kaiꞌ hai Abeli
4
Adama hai Hewá mohambokoheꞌ.
Morodua miꞌi Hewá haneꞌi moánáka hadua ánángkóiꞌ tobaleilo.
I tempó iti nauliꞌ Hewá,
“Ánti petulungina PUEꞌ i kódóꞌ,
kulámbiꞌ miꞌi hadua ánángkóiꞌ tobaleilo.”
Onoꞌ miꞌi haneꞌi ánáꞌraꞌ iti rahangaꞌ Kaiꞌ,
lempóna “molámbiꞌ”.
2 Roo onoꞌ,
ia moánáꞌ wopiꞌi hadua tobaleilo to rahangaꞌ Abeli,
ádina Kaiꞌ.
Abeli iti mewaliꞌ topoewu dimbá,
hai Kaiꞌ mewaliꞌ topohinoe.
3 Tiꞌara marue hangko ihinti,
Kaiꞌ moala miꞌi hanggááꞌ hangko i powiáꞌna,
napopenómbá i PUEꞌ.
4 Abeli woꞌo moala bahangapa uluánáꞌ dimbána,
nasambale,
hai óntóꞌna to kelompoꞌ napopenómbá i PUEꞌ.
Abeli hai popenómbána iti napokagóeꞌ PUEꞌ,
5 agáiáná Kaiꞌ hai popenómbána tiꞌara Napokagóeꞌ.
Onoꞌ miꞌi haneꞌi Kaiꞌ mampematuꞌa láwiꞌ rumihi kamabukoꞌna.
6 Nauliꞌ PUEꞌ i hia,
“Moapa riꞌi haneꞌikoꞌ mabukoꞌ?
Moapa riꞌi haneꞌikoꞌ mampematuꞌa?
7 Ane maroꞌa bábehiámu,
hangaa-ngaa Kupokanakoꞌ.
Agáiáná ane kadake bábehiámu,
ina nakuasaꞌikoꞌ dósá.
Dósá iti moundeꞌ mokuasaꞌi lalumu,
agáiáná hangaa-ngaa nuewaꞌ duuꞌna nunangi.”
8 Roo onoꞌ,
nauliꞌ Kaiꞌ i Abeli,
“Maikoꞌ,
laokeꞌ i hinoe.”
Tangaꞌraꞌ i hinoe,
Kaiꞌ mohakaꞌ miꞌi ádina,
haneꞌi napapate.
9 Napekuneꞌ PUEꞌ i Kaiꞌ,
Nauliꞌ,
“Iumbá miꞌi Abeli ádimu?”
Mehániꞌ Kaiꞌ,
“Tiꞌara kuisá.
Kódóꞌ ripaꞌi topokámpái ádingkuꞌ?”
10 Nauliꞌ PUEꞌ,
“Moapa riꞌi haneꞌi nubábehi to kadake deꞌe?
Nupehádingi!
Waheꞌna ádimu to mabubu i tampoꞌ meraruaꞌ i Kódóꞌ,
bona bábehiámu to kadake iti ina Kuháwángi.a
11 Deꞌe miꞌi hukumu:
Ánti kanupapatena ádimu
duuꞌna waheꞌna mabubu i tampoꞌ,
tiꞌara piꞌi ina nubuku mampobágóꞌ tampoꞌ.
12 Ane nupantudaꞌi tampoꞌ deꞌe,
tudaꞌ-tudaꞌmu tiꞌara ina mowuaꞌ.
Hangaa-ngaa mewaliꞌkoꞌ topolilo
to tiꞌara tinda.”
13 Nauliꞌ Kaiꞌ i PUEꞌ,
“Matimi gaga hukungkuꞌ deꞌe.
Tiꞌara kubuku mokili!
14 Deꞌe-deꞌe Nuwuramoꞌ
karaoꞌ hangko i katoroꞌá deꞌe
hai ina karaoꞌaꞌ woꞌo hangko i lindoꞌMu.
Ina mewaliꞌaꞌ topolilo
i duniáꞌ deꞌe.
Mewaliꞌ heáná peá to mampohidupaꞌáꞌaꞌ
ina mopapateaꞌ.”
15 Agáiáná nauliꞌ PUEꞌ,
“Tiꞌara noꞌonoꞌ.
Ane arai to mopapatekoꞌ,
tauna iti ina molámbiꞌ pehuku pitu kánina karumihina hangko i apa to nabábehi i hio.”
Hangko ionoꞌ,
Napoanaꞌi miꞌi Pueꞌ Ala tandaꞌ i Kaiꞌ,
bona heáná peá to mampohidupaꞌá,
tiꞌara ina mopapate.
16 Mewaliꞌ pohuꞌ miꞌi Kaiꞌ hangko i lindoꞌna PUEꞌ,
hai toroꞌ i tampoꞌ to rauliꞌ Nod,
lempóna:
“poliloá”.
Tampoꞌ iti tándáꞌ i mata alo hinoe Párádesiꞌ.
Pemuleꞌánaheꞌ Kaiꞌ
17 Kaiꞌ hai toinána moánáꞌheꞌ hadua tobaleilo to rahangaꞌ Henoꞌ.
Roo onoꞌ,
Kaiꞌ moaró hambuaꞌ kótá.b
Kótá iti nahangaꞌ Henoꞌ mouláꞌ hangaꞌna ánáꞌna.
18 Henoꞌ momuleáka Iraꞌ.
Iraꞌ momuleáka Mehuiaele.
Mehuiaele momuleáka Metusaele,
hai Metusaele momuleáka Lame.
19 Lame iti,
rodua toinána to rahangaꞌ Ádá hai Sila.
20 Ádá moánáka Iaba.
Iaba hai pemuleꞌánaheꞌ,
hira to rungu-runguna to mopiaraꞌ binataꞌ hai toroꞌheꞌ i bambaruꞌ to rabábehi hangko i koliꞌ binataꞌ.
21 Ádina hangaꞌna Iuba.
Iuba hai pemuleꞌánaheꞌ,
hira to rungu-runguna mokasapi hai motulali.
22 Sila moánáka woꞌo hadua tobaleilo to rahangaꞌ Tuba-Kaiꞌ.
Tuba-Kaiꞌ hai pemuleꞌána to rungu-runguna mobábehiheꞌ hinángkáꞌna párewá hangko i tambaga hai besiꞌ.
Ádina Tuba-Kaiꞌ towawine to rahangaꞌ Naꞌama.
23 Hangkani tempó,
molaluita miꞌi Lame i toinána to rodua,
nauliꞌ:
“Ádá hai Sila,
nipehádingi!
Kómu toinángkuꞌ,
nipailalu laluitangkuꞌ.
Kupapate miꞌi hadua tobaleilo to maleheꞌ mani láwiꞌ napaháiaꞌ.
Kubábehi noꞌonoꞌ láwiꞌ ánáꞌntomoane iti mobeláiaꞌ.
24 Ane ara tauna to mopahái Kaiꞌ,
tauna iti molámbiꞌ pehuku pitu kánina karumihina.
Agáiáná ane ara woꞌo tauna to mopaháiaꞌ,
tauna iti ina molámbiꞌ pehuku pitu puloꞌna hai pitu kánina karumihina.”
Setiꞌ hai Enoꞌ
25 Adama hai Hewá moánáꞌ wopaheꞌ hadua tobaleilo.
Nauliꞌ Hewá,
“Naweꞌiaꞌ Pueꞌ Ala hadua tobaleilo,
paháwángina Abeli to napapate Kaiꞌ.”
Onoꞌ miꞌi haneꞌi nahangaꞌ Setiꞌ,
lempóna:
“Ia mampeweꞌi”.
26 Setiꞌ momuleáka hadua tobaleilo to nahangaꞌ Enoꞌ.
Tempó onoꞌ,
tauna mantepuꞌuheꞌ mokábelái hangaꞌna PUEꞌc ane menómbáheꞌ.