Iosuá mampodarita i toSáráeliꞌ mokana i daritakánáraꞌ
24
Roo onoꞌ, Iosuá mokióꞌ upu-upu tadulakoraꞌ toSáráeliꞌ bona hirámpuheꞌ i Sikeꞌ. Nahuoꞌheꞌ upu-upu totosae, tadulako, topobutusi hai tadulakoraꞌ surudadoꞌ bona meángkáꞌheꞌ i lindoꞌna Bambaruꞌ Penómbáꞌá, kaꞌaraꞌána Pueꞌ Ala.a 2 Molaluita miꞌi Iosuá i toSáráeliꞌ, nauliꞌ, “Nipehádingi apa to nauliꞌ PUEꞌ Ala Pueꞌtaꞌ toSáráeliꞌ. Nauliꞌ node: ‘Hangkoia toiorumi toroꞌheꞌ i tampoꞌ to i hambali uwai Epara,b hai ionoꞌ, menómbáheꞌ i ánitu. Hadua hangko i oloꞌraꞌ ia miꞌi Tera umáraꞌ Burahima hai Nahori. 3 Agáiáná Burahima toiorumi iti Kukióꞌ hangko i hambali uwai Epara iti, Kuhuoꞌ lao molumaohi hai mopáresáꞌ humalele tampoꞌ Kánáꞌá. Kupahandaꞌ pemuleꞌána, to ioru-oru Isakiꞌ, 4 haneꞌi Isakiꞌ mopaꞌara rodua ánáꞌna, iamoheꞌ Iako hai Esau. Kupeweꞌi buluꞌ-buluꞌna Edoc i Esau mewaliꞌ tampoꞌna, agáiáná Iako toiorumi iti melimbá lao i tampoꞌ Másiriꞌ hingkakani hai ánáꞌnaheꞌ.5 Roo onoꞌ, Kuhuoꞌheꞌ Musa hai Haruni motadulakoikou, hai Kupaꞌara kapári to meriringkuꞌi i toMásiriꞌd haneꞌi Kuántikou mesuwuꞌ hangko ionoꞌ. 6 ToMásiriꞌ modápáꞌkou hai kereta pombeala hai surudadoꞌ topodárá haweꞌ i tahiꞌ Teberau.e 7 Mekióꞌkou i Kódóꞌ PUEꞌmi membiáꞌ tulungi, onoꞌ miꞌi haneꞌi Kupaꞌara kamakáindi i hiliꞌmi hai toMásiriꞌ. I kalimbami miꞌi i tahiꞌ Teberau iti, Kupopehálómpó, áláraꞌ surudadoꞌ toMásiriꞌ iti támpuheꞌ upu-upu. Arakou to moita mata apa to Kubábehi iti i toMásiriꞌ. Roo onoꞌ, toroꞌkou i pádá loriꞌ iba puloꞌna parena kamaruena.
8 Kuántikou lao i tampoꞌraꞌ toAmori to toroꞌheꞌ i hambali uwai Iarade tándáꞌ i pembetoá alo. Tempóraꞌ mombeala hai kómu, Kupopenangikou hangko i hira, haneꞌi tampoꞌraꞌ nikatoroꞌi hai Kupatunaheꞌ. 9 Tempó onoꞌ, daturaꞌ toMoabiꞌ to rahangaꞌ Báláꞌ ánáꞌna Sipo, moewaꞌkou toSáráeliꞌ ina mombeala, hai ia mohuoꞌ tauna lao mokióꞌ Bilea ánáꞌna Beo bona mokambokou. 10 Agáiáná tiꞌara Kupeuláꞌi peundeꞌána Bilea, ngkáliꞌna Kuwátiꞌrakou. Noꞌonoꞌ miꞌi kaKupelaemi hangko i Datu Báláꞌ.f
11 Kalimbami i uwai Iarade hai kahaweꞌmi i kótá Ieriko, rapombealaꞌámokou, noꞌonoꞌ woꞌo toAmori, toPerisi, toKánáꞌá, toHeti, toGirigasi, toHewi hai toIebusi. Agáiáná kómu, Kupopenangikou hangko i hira upu-upu. 12 I tempóraꞌ nipombealaꞌá, Kupawuliheꞌ hai Kupamalááꞌ ntepuꞌuheꞌ,g álána melangkaheꞌ hangko i kómu nodo to mewaliꞌ woꞌo i rodua daturaꞌ toAmori hangkoia. Katoꞌuána, tiꞌara pihoꞌmi hai tiꞌara woꞌo panaꞌmi to mampopenangikou, ngkáliꞌna Kódóꞌ riꞌi to motulungikou. 13 Tampoꞌ to Kuweꞌimokou tiꞌara nipowonggoꞌ, hai kótá-kótána tiꞌara kómu topoaró, agáiáná deꞌe-deꞌe toroꞌkou ieneꞌ hai mandeꞌkou wuaꞌ anggoroꞌ hai wuaꞌ saitu, mole riꞌi tiꞌara kómu to motudaꞌ.’ ”
14 Karoona Iosuá mopahaweꞌ laluita hangko i Pueꞌ Ala iti, ia woꞌo molaluita i toSáráeliꞌ, nauliꞌ, “Mewaliꞌ deꞌe-deꞌe, mengkoruꞌkou i PUEꞌ hai tetidaꞌkou menómbá oaꞌ i Hia hangko i lalumi ntepuꞌu. Nikaraohi pueꞌ ala ntaniꞌ to rapenómbái toioruntaꞌ hangkoia i hambali uwai Epara hai i tampoꞌ Másiriꞌ. Menómbá pekou i PUEꞌ. 15 Agáiáná ane rápáꞌna tiꞌarakou mau menómbá i PUEꞌ, alo deꞌe hangaa-ngaa nipakanótó miꞌi i heánákou ina menómbá: i ánitu to rapenómbái toioruntaꞌ hangkoia i hambali uwai Epara, ba i ánituraꞌ toAmori to nikatoroꞌi tampoꞌraꞌ deꞌe-deꞌe. Agáiáná kódóꞌ hai tinángkuꞌheꞌ, bateꞌna PUEꞌ peá to kipenómbái.”
16 Rahániki toSáráeliꞌ, “Kaiꞌ, tiꞌaraꞌangkaiꞌ ina mopálehi PUEꞌ hai menómbá i pueꞌ ala to ntániꞌna! 17 PUEꞌ Ala to tapenómbái, Ia miꞌi to moteteꞌkeꞌ hingkakani hai tosaentaꞌ mesuwuꞌ hangko i tampoꞌ Másiriꞌ, tampoꞌ karapohawiꞌántaꞌ. Ia mopaꞌara tandaꞌ-tandaꞌ kuasaꞌ to mahile i lindoꞌtaꞌ. Ia woꞌo mokámpáikeꞌ i polumaoántaꞌ i upu-upu tampoꞌraꞌ tauna ntániꞌna to tapoliui. 18 Hai i kapesuaꞌtaꞌ i tampoꞌ deꞌe, PUEꞌ mowuraheꞌ upu-upu toAmori to toroꞌ ieneꞌ hangko i lindoꞌtaꞌ. Onoꞌ miꞌi haneꞌi kaiꞌ ina menómbáꞌangkaiꞌ i PUEꞌ láwiꞌ Ia miꞌi Pueꞌ Alantaꞌ.”
19-20 Nauliꞌ Iosuá i toSáráeliꞌ, “Agáiáná kómu, tiꞌara nibuku menómbá i PUEꞌ, láwiꞌ Ia Pueꞌ Ala to magasaꞌ hai mohiriꞌ. Tiꞌara naundeꞌ ane tauna menómbá i to ntániꞌna. Pueꞌ Ala maroꞌa oaꞌ i kómu, agáiáná ane nipálehiꞌi PUEꞌ hai menómbákou i pueꞌ alaraꞌ tauna ntániꞌna, Ia tiꞌara ina moámpungi salaꞌ hai dósá to nibábehi iti. Ina Naewaꞌkou hai mohukukou, hai ina mopatunakou.”
21 Rahániki toSáráeliꞌ, “Tiꞌara! Ina menómbá peangkaiꞌ i PUEꞌ.”
22 Hangko ionoꞌ, nauliꞌ Iosuá i toSáráeliꞌ, “Kómu miꞌi to mewaliꞌ sabiꞌ, láwiꞌ kómu miꞌi to mobutusi ina menómbákou i PUEꞌ.”
Rahániki toSáráeliꞌ, “Toꞌu. Kaiꞌ miꞌi sabiꞌna.”
23 Nauliꞌ wopiꞌi Iosuá, “Ane noꞌonoꞌi, deꞌe-deꞌe nikaraohi miꞌi pueꞌ alaraꞌ tauna ntániꞌna to nipenómbái mani, hai nipatetidaꞌ miꞌi lalumi i PUEꞌ Ala Pueꞌtaꞌ toSáráeliꞌ.”
24 Rahániki toSáráeliꞌ i Iosuá, rauliꞌ, “Bateꞌki menómbá oaꞌ peá i PUEꞌ Ala Pueꞌtaꞌ, hai upu-upu párentáNa ina kipeuláꞌi.”
25 I alo onoꞌ woꞌo i Sikeꞌ, Iosuá mosulewátáiheꞌ toSáráeliꞌ mopakaróhó wopaheꞌ dándiraꞌ hai Pueꞌ Ala. Ionoꞌ woꞌo naweꞌiheꞌ áturá-áturá to hangaa-ngaa rapeuláꞌi. 26 Iosuá moukiꞌ upu-upu huku hai áturá iti i lalu sura poukiꞌá áturána Pueꞌ Ala. Roo onoꞌ, ia moala hambuaꞌ watu to mahile, napatindáꞌ i tóáꞌ kau to mahile i kaꞌaraꞌá to magasaꞌ i PUEꞌ.h
27 Roo onoꞌ, Iosuá molaluita i upu-upu toSáráeliꞌ, nauliꞌ, “Watu deꞌe ina mewaliꞌ hambuaꞌ pambuhinaoá i kitaꞌ láwiꞌ ngkóráꞌna PUEꞌ rapahaweꞌ miꞌi i kitaꞌ i lindoꞌna. Onoꞌ miꞌi haneꞌi watu deꞌe mewaliꞌ watu pambuhinaoá i kómu, bona tiꞌarakou mosapuáka Pueꞌ Ala to nipenómbái.”
28 Roo onoꞌ, Iosuá mohuoꞌheꞌ toSáráeliꞌ mesuleꞌ lao i tampoꞌraꞌ to naweꞌimoheꞌ Pueꞌ Ala.
Kamatena Iosuá
29 Tiꞌara marue hangko ionoꞌ, Iosuá ánáꞌna Nun huoꞌána PUEꞌ, mate. Tinuwuꞌna hangatu hai hampuloꞌ parena. 30 Ia ratawu i tampoꞌna haduduána i kótá Timnat-Sera i buluꞌ Eparai tándáꞌ i buluꞌ Gasi.
31 Hungkáꞌna Iosuá tueꞌ, toSáráeliꞌ menómbáheꞌ i PUEꞌ, hai roo kamatena, lántuꞌána ara maniheꞌ tadulakoraꞌ toSáráeliꞌ to mewaliꞌheꞌ sabiꞌ mata upu-upu to nabábehi PUEꞌ i toSáráeliꞌ, toSáráeliꞌ bateꞌ-bateꞌraꞌ menómbá i Pueꞌ.
32 Wátámandoꞌna Iusupu to raꞌánti toSáráeliꞌ hangko i tampoꞌ Másiriꞌ, ratawuꞌ i Sikeꞌi i tampoꞌ to nahóló miꞌi Iako hangko i ánáꞌna Hemo umána Sikeꞌ. Hólóna tampoꞌ iti hangatu dóiꞌ peráꞌ.j Tampoꞌ iti to raweꞌimoheꞌ pemuleꞌána Iusupu mewaliꞌ sosoraraꞌ.
33 Roo onoꞌ, mate woꞌo Eleasa ánáꞌna Haruni, hai ratawu i kótá Gibeá i buluꞌ-buluꞌna Eparai. Kótá iti raweꞌi miꞌi Pineha ánáꞌna Eleasa.