ToRube, toGati, hai hantangaꞌ toManase rapaliuheꞌ mesuleꞌ
22
Karooraꞌ toSáráeliꞌ mokuasaꞌi tampoꞌ tándáꞌ i katámpuá alo uwai Iarade, Iosuá mokióꞌheꞌ surudadoꞌraꞌ toRube, toGati hai hantangaꞌ toManase to raweꞌimoheꞌ tampoꞌ tándáꞌ i pembetoá alo uwai Iarade. 2 Nahángáꞌáꞌáheꞌ, “Kómu roomokou mampopolumao hinángkáꞌ to napárentáiákou Musaa huoꞌána PUEꞌ. Noꞌonoꞌ woꞌo, upu-upu párentángkuꞌ nipeuláꞌi miꞌi. 3 Tiꞌaraheꞌ nipatodáhi halalumi toSáráeliꞌ ntániꞌna mombeala haduduáraꞌ, agáiáná tetidaꞌkou mampopolumao upu-upu párentána PUEꞌ Ala to tapenómbái. 4 Hai deꞌe-deꞌe PUEꞌ Ala mopamalino miꞌi tampoꞌraꞌ halalumi toSáráeliꞌ to ntániꞌna, hiolaꞌ hai dándiNa. Onoꞌ miꞌi haneꞌi peisámokou mesuleꞌ lao i tampoꞌmi to naweꞌimokou Musa iaꞌo, to tándáꞌ i pembetoá alo i hambali uwai Iarade. 5 Maingáꞌ-ingáꞌkou hai tetidaꞌkou i párentá-párentá hai áturá-áturá to naweꞌikeꞌ Musa huoꞌána PUEꞌ, ia miꞌi: nipokaꞌahiꞌ PUEꞌ Ala to nipenómbái, nipeuláꞌi peundeꞌáNa, nipeuláꞌi upu-upu párentáNa, tetidakou i Hia, hai hangaa-ngaa mengkoruꞌkou i Hia hangko i lalumi ntepuꞌu.”6-9 Roo onoꞌ, Iosuá mowátiꞌheꞌ hai mopaliuheꞌ mesuleꞌ lao i tampoꞌraꞌ. Hangko tiꞌara maniheꞌ pohuꞌ, napolaluitaꞌá wopaheꞌ, nauliꞌ, “Deꞌe-deꞌe mewaliꞌmokou topebuku, handaꞌ miꞌi párewámi hai binataꞌmi. Ina moántikou woꞌo handaꞌ buláwá, peráꞌ, tambaga, besiꞌ hai pewaruꞌ. Mewaliꞌ ane haweꞌmokou i tampoꞌmi, hangaa-ngaa nigáláꞌ-gáláꞌáheꞌ woꞌo to niperampaꞌi iti i halalumi to ntániꞌna.”
Mewaliꞌ surudadoꞌ to hangko i toRube, toGati, hai hantangaꞌheꞌ toManase to tampoꞌraꞌ tándáꞌ i pembetoá alo uwai Iarade iti, mopálehimoheꞌ hángká toSáráeliꞌraꞌ to ntániꞌna, pohuꞌheꞌ hangko i kótá Silo i tampoꞌ Kánáꞌá, laoheꞌ i pobambaruꞌáraꞌ i tampoꞌraꞌ haduduáraꞌ i tampoꞌ Gileaꞌ. Mokatoroꞌiheꞌ tampoꞌ iti mouláꞌ párentána PUEꞌ moliu Musa. Hantangaꞌ toManase molámbiꞌmoheꞌ tampoꞌ Basana i hambali uwai Iarade tándáꞌ i pembetoá alo, hai hantangaꞌ toManase molámbiꞌmoheꞌ tampoꞌ hangko i Iosuá tándáꞌ i katámpuá alo uwai Iarade, hingkakani hai hahioꞌ tinaraꞌ toSáráeliꞌ to ntániꞌna.
Paintuá popenómbá hungkuꞌ i uwai Iarade
10-11 Kahaweꞌraꞌ toRube, toGati, hai hantangaꞌ toManase i Geliloꞌ, i tampoꞌ Kánáꞌá maniheꞌ tándáꞌ i katámpuá alo uwai Iarade iti, hai moaróheꞌ hambuaꞌ paintuá popenómbá to mahile hai meawaꞌ i wiwi uwai Iarade. ToSáráeliꞌ to ntániꞌna mohádiheꞌ mokana i paintuá popenómbá iti, 12 onoꞌ miꞌi haneꞌi surudadoꞌ toSáráeliꞌ to hahioꞌ hantangaꞌ tina kásáliu hirámpuheꞌ i Silo ina mampombealaꞌáheꞌ toRube, toGati hai hantangaꞌ toManase iti.
13 Pineha tadulako menómbá ánáꞌna Eleasab rahuoꞌ toSáráeliꞌ to ntániꞌna lao i toRube, toGati hai hantangaꞌ toManase to mengkalimbamoheꞌ lao i Gileaꞌ tándáꞌ i katámpuá alo uwai Iarade. 14 Ara woꞌo hampuloꞌ tadulakoraꞌ toSáráeliꞌ to mamporángá Pineha, hadua mosulewátái hantina to toroꞌ tándáꞌ i katámpuá alo uwai Iarade. 15 Kahaweꞌraꞌ i kaꞌaraꞌáraꞌ toRube, toGati hai hantangaꞌ toManase iti i tampoꞌ Gileaꞌ, molaluitaheꞌ rauliꞌ, 16 “I lalu hangaꞌraꞌ upu-upu taunána PUEꞌ kipekuneꞌ, moapa riꞌi haneꞌi tiꞌarapokou tetidaꞌ i Pueꞌ Ala Pueꞌtaꞌ toSáráeliꞌ? Deꞌe-deꞌe motaleukimokou PUEꞌ láwiꞌ moarómokou hambuaꞌ paintuá popenómbá to mopatongawaꞌ tiꞌarapokou mampeuláꞌi párentáNa! 17 Tiꞌara paꞌi nibuhinao dósántaꞌ i Peo? Tempó onoꞌ, nahukukeꞌ PUEꞌ hai mantódihákeꞌ hakiꞌ to humalele,c kehapiꞌ miꞌi kitaꞌ deꞌe taunáNa haduduáNa! Duuꞌna deꞌe-deꞌe, tahádiá mani. Tiꞌara mani paꞌi magáná dósá iti 18 haneꞌi deꞌe-deꞌe niundeꞌ wopiꞌi motaleuki PUEꞌ?
Ane dehangaloá moewaꞌ wopakou PUEꞌ, kahalo kitaꞌ toSáráeliꞌ ina Nahuku wopakeꞌ upu-upu. 19 Ane nirekeꞌ tampoꞌmi kedái hai tiꞌara hintotoꞌ mewaliꞌ penómbáꞌá i Pueꞌ, melimbákou huleꞌ i tampoꞌna PUEꞌ, kaꞌaraꞌána Bambaruꞌ Penómbáꞌá. Toroꞌkou i oloꞌkiꞌ, agáiáná ineeꞌkou moewaꞌ PUEꞌ ba moewaꞌangkaiꞌ hai moaró wopakou paintuá popenómbá to ntániꞌna, láwiꞌ ara miꞌi paintuá popenómbá i PUEꞌ Ala Pueꞌtaꞌ. 20 Nibuhinao Akani pemuleꞌáꞌna Sera. Ia tiꞌara mampeuláꞌi párentána Pueꞌ mokana párewá to hangaa-ngaa rapataniꞌ i Pueꞌ, hai apa wuaꞌna? Upu-upu toSáráeliꞌ rahuku, mole riꞌi to mobábehi dósá, Akani peá, agáiáná to mate tiꞌara peá ia haduduána.”d
21 Mehániheꞌ toRube, toGati hai hantangaꞌ toManase i tadulakoraꞌ toSáráeliꞌ to ntániꞌna, rauliꞌ, 22 “PUEꞌ Ala to melumbuꞌ kamakuasaꞌNa! PUEꞌ Ala to makuasaꞌ! Ia to moisá tunggáiángkiꞌ moaró paintuá popenómbá iti, hai kiundeꞌ bona kómu woꞌo moisá. Ane rápáꞌna kakibábehina iti tunggáiángkiꞌ moewaꞌ PUEꞌ, ba tiꞌarapongkaiꞌ mepoinálái i Hia, ineeꞌmongkaiꞌ nipatodáhi tueꞌ! 23 Ane tunggáiángkiꞌ motaleuki PUEꞌ, hai moaróangkaiꞌ paintuá popenómbá ina kipakeꞌ mohuhuꞌ popenómbá to raintu, ba pare, ba popenómbá pohintuwuꞌ, PUEꞌ haduduáNa ina mohukuangkaiꞌ.
24 Agáiáná katoꞌuána tiꞌara onoꞌ tunggáiángkiꞌ halalu-halalu! Kaiꞌ moaróangkaiꞌ paintuá popenómbá iti, láwiꞌ kipokalááꞌ ineeꞌ paꞌi i alo to ina haweꞌ, pemuleꞌámi ina manguliꞌ i pemuleꞌángkiꞌ, ‘Kómu tiꞌara ara pombekaiꞌána hai PUEꞌ Ala Pueꞌkiꞌ toSáráeliꞌ. 25 Tiꞌara paꞌi uwai Iarade napaꞌara PUEꞌ Ala moparailikikeꞌ, bona mampopogááꞌangkaiꞌ hai kómu toRube hai toGati? Kómu tiꞌarakou tepasuaꞌ taunána PUEꞌ.’ Ane noꞌonoꞌi panguliꞌraꞌ, apa miꞌi to ina mewaliꞌ? Manótó pemuleꞌámiheꞌ ina mokóntó pemuleꞌángkiꞌ menómbá i PUEꞌ.
26 Mewaliꞌ kipekiri rángina miꞌi moaróangkaiꞌ paintuá popenómbá iti bona mewaliꞌ peá tandaꞌ i kitaꞌ upu-upu. Paintuá popenómbá iti tiꞌara ina tapakeꞌ mohuhuꞌ popenómbá, maroꞌa popenómbá to raintu, maroꞌa popenómbá to ntániꞌna, 27 agáiáná bona mewaliꞌ tandaꞌ i kitaꞌ hai i pemuleꞌántaꞌ i alo to ina haweꞌ, hai ina mopatongawaꞌ katoꞌuna kaiꞌ hai pemuleꞌángkiꞌ peisáꞌangkaiꞌ menómbá oaꞌ i PUEꞌ, hai ina mohuhuꞌangkaiꞌ upu-upu popenómbángkiꞌ i katoroꞌá to napileꞌi PUEꞌ. Ane noꞌonoꞌi, pemuleꞌámi tiꞌara peisá manguliꞌ pemuleꞌángkiꞌ tiꞌaraheꞌ tepasuaꞌ taunána PUEꞌ.
28 Mewaliꞌ, ane pemuleꞌámi ina manguliꞌ noꞌonoꞌ, ina rahániki pemuleꞌángkiꞌ node: ‘Nipeita paintuá popenómbá to raꞌaró toioruꞌngkiꞌheꞌ hangkoia, hibali lenggeꞌna hai paintuá popenómbá i PUEꞌ to ara i Bambaruꞌ Penómbáꞌá. Tiꞌaranto kipakeꞌ mointu popenómbá, agáiáná mewaliꞌ peá tandaꞌ i kitaꞌ upu-upu, kaiꞌ woꞌo tepasuaꞌangkaiꞌ taunána Pueꞌ Ala.’ ”
29 Roo onoꞌ, toRube, toGati hai hantangaꞌ toManase mopaliliu wopaheꞌ polaluitaraꞌ, rauliꞌ, “Kaiꞌ, tiꞌara mpuꞌu ara tunggáiángkiꞌ moewaꞌ ba mopálehi PUEꞌ ánti paintuá popenómbá to kiaró iti, láwiꞌ popenómbá to raintu, popenómbá pare, hai popenómbá ntániꞌna, hangaa-ngaa raintu i paintuá popenómbá i PUEꞌ Ala Pueꞌtaꞌ, to ara miꞌi i lindoꞌna Bambaruꞌ Penómbáꞌá.”
30 Upu-upu to rapolaluita toRube, toGati hai hantangaꞌ toManase to toroꞌ tándáꞌ i pembetoá alo, rahádi Pineha tadulako menómbá hai hampuloꞌ tadulakoraꞌ toSáráeliꞌ to tándáꞌ katámpuá alo uwai Iarade. Mewaliꞌ rapokana polaluitaraꞌ iti. 31 Hangko ionoꞌ, Pineha tadulako menómbá ánáꞌna Eleasa molaluita i toRube, toGati, hai hantangaꞌ toManase, nauliꞌ, “Deꞌe-deꞌe kiꞌisá PUEꞌ mamporángákeꞌ, láwiꞌ tiꞌarakou meꞌewaꞌ i Hia. Láwiꞌ tunggáiámi iti maroꞌa, tekabahakeꞌ upu-upu toSáráeliꞌ hangko i pehukuna PUEꞌ.”
32 Roo onoꞌ, pohuꞌmoheꞌ Pineha hai tadulakoraꞌ toSáráeliꞌ iti mopálehiheꞌ toRube hai toGati i Gileaꞌ, mesuleꞌheꞌ lao i tampoꞌ Kánáꞌá, haneꞌi mopahaweꞌheꞌ bámbári i toSáráeliꞌ to ntániꞌna to ara ionoꞌ. 33 Rapokana ntepuꞌu toSáráeliꞌ haneꞌi motóiáheꞌ Pueꞌ Ala. Tiꞌarapoheꞌ mampolaluita poliworaꞌ ina mampombealaꞌá toRube hai toGati, bona mopatuna tampoꞌraꞌ.
34 Kahópóꞌána toRube hai toGati manguliꞌ, “Paintuá popenómbá iti mewaliꞌ peá sabiꞌ i kitaꞌ upu-upu, PUEꞌ Ia miꞌi Pueꞌ Ala.” Onoꞌ miꞌi haneꞌi paintuá popenómbá iti rahangaꞌ “Sabiꞌ”.