Tampoꞌ Kánáꞌá tándáꞌ i wongko ranangi toSáráeliꞌ
11
Kanahádina Iabi datu i kótá Haso kana i penangiraꞌ oaꞌ toSáráeliꞌ, ia mohuoꞌ tauna lao i datu-datu i kótá to hungkuꞌ, iamoheꞌ: Ioba datu i kótá Madoni, datu-datu i kótá Simoro hai Akasa, 2 datu-datu tándáꞌ i wongko i buluꞌ-buluꞌna, i lembo Iarade tándáꞌ i wóiꞌ rano Galilea,a i biti buluꞌ, hai i wiwi tahiꞌ hungkuꞌ i Doo tándáꞌ i katámpuá alo. 3 Ia mohuoꞌheꞌ woꞌo tauna lao i daturaꞌ toKánáꞌá to toroꞌ i lembo potimbali buluꞌ-buluꞌna, hai i daturaꞌ toAmori, toHeti, toPerisi, toIebusi to toroꞌ i buluꞌ-buluꞌna, hai toHewi to toroꞌ i biti buluꞌ Heremo i roboꞌ Misipa. 4 Haweꞌ mpuꞌumoheꞌ datu iti hai surudadoꞌraꞌ to handaꞌ ntepuꞌu, nodo kahandaꞌna wungi i wiwi tahiꞌ. Moántiheꞌ woꞌo handaꞌ dárá hai kereta pombeala. 5 Upu-upu datu iti hirámpuheꞌ hai mobábehiheꞌ pobambaruꞌá hungkuꞌ i uwai Mero,b ina mampombealaꞌáheꞌ toSáráeliꞌ.6 PUEꞌ mongkóráꞌ i Iosuá, Nauliꞌ, “Kahalo, rekeꞌ-rekeꞌna tintiꞌ to hibali hai deꞌe-deꞌe, ina Kupapateheꞌ upu-upu. Mewaliꞌ ineeꞌkou malááꞌ i hira. Ane menangikou, nitimpóheꞌ dáráráꞌ, hai kereta pombealaraꞌ hangaa-ngaa nihunu.”
7 Mewaliꞌ lao mpuꞌu miꞌi Iosuá hai upu-upu surudadoꞌna, mopatingkáráꞌheꞌ ewáliraꞌ rapombealaꞌá hungkuꞌ i uwai Mero. 8 Rahuhuli hai radápáꞌheꞌ haweꞌ-haweꞌ i Sido Mahile hai Misereo-Maimi tándáꞌ i katámpuá alo, haweꞌ-haweꞌ woꞌo i lembo Misipa tándáꞌ i pembetoá alo. Mombealaheꞌ oaꞌ duuꞌna mate upu-upu ewáliraꞌ, tiꞌara ara haweꞌ hadua to tueꞌ. Noꞌonoꞌ miꞌi PUEꞌ mampopenangiheꞌ toSáráeliꞌ. 9 Iosuá hai surudadoꞌna motimpóheꞌ dáráraꞌ ewáliraꞌ, hai keretaraꞌ rahunu upu-upu. Apa to rabábehi iti hiolaꞌ hai párentána PUEꞌ.
10-11 Roo onoꞌ, mesuleꞌ miꞌi Iosuá hai surudadoꞌna, laoheꞌ mamperampaꞌi kótá Haso. Kótá iti rahunu toSáráeliꞌ, datuna hai upu-upu taunána rapapate, tiꞌara ara haweꞌ hadua to rapatodáhi tueꞌ, mole riꞌi tempó onoꞌ, kótá iti kótá to maróhó ntepuꞌu i humalele tampoꞌ Kánáꞌá iti.
12 Noꞌonoꞌ miꞌi Iosuá mamperampaꞌi upu-upu kótá to ara ionoꞌ, hai datu-daturaꞌ rapapate hiolaꞌ hai párentána Musa huoꞌáná PUEꞌ. 13 Agáiáná hangko i upu-upu kótá to raꞌaró i wongko kótá to sae hai magero miꞌi, kótá Haso peá to rahunu. 14 Upu-upu tauna i kótá-kótá iti rapapate, tiꞌara haweꞌ hadua to rapatodáhi tueꞌ. Agáiáná upu-upu párewáraꞌ hai binataꞌraꞌ raꞌala toSáráeliꞌ. 15 Upu-upu to napahaweꞌ PUEꞌ i Musa huoꞌáNa, napahaweꞌ miꞌi aha Musa i Iosuá, hai Iosuá to mampopolumao upu-upuna iti.
Tampoꞌ to nakuasaꞌi Iosuá
16 Mewaliꞌ Iosuá mamperampaꞌi upu-upu tampoꞌ Kánáꞌá iti hangko i wongko haweꞌ-haweꞌ i wóiꞌ, tepasuaꞌ buluꞌ-buluꞌna, biti buluꞌ, upu-upu tampoꞌ Nege hai tampoꞌ Gose, hai lembo uwai Iarade.c 17-18 Kamaeláꞌna tampoꞌ to raꞌala iti mantepuꞌu hangko i buluꞌ-buluꞌna to maloriꞌ tándáꞌ i wóiꞌ hungkuꞌ i tampoꞌ Edo,d haweꞌ-haweꞌ i kótá Baꞌal-Gati i lembo Libano hai i biti buluꞌ Heremo tándáꞌ i wongko. Marue ntepuꞌu Iosuá hai surudadoꞌ toSáráeliꞌ mombeala,e agáiáná kahópóꞌána datu-datu i tampoꞌ iti rahakaꞌ hai rapapateheꞌ upu-upu. 19 Hangko i oloꞌraꞌ upu-upu tauna to toroꞌ i kótá-kótá i tampoꞌ Kánáꞌá, tiꞌara ara to mopaꞌara podándi pohintuwuꞌ hai toSáráeliꞌ, i rawa toHewi to toroꞌ i kótá Gibeo. Upu-upu kótá ntániꞌna ranangiheꞌ toSáráeliꞌ i pombeala. 20 Iti mewaliꞌ láwiꞌ PUEꞌ mopamatuꞌa laluraꞌ toKánáꞌá bona mombealaheꞌ hai toSáráeliꞌ. Nabábehi noꞌonoꞌ bona toKánáꞌá rahukuheꞌ hai rapatunaheꞌ. Tiꞌara ara ámpungina, hiolaꞌ hai párentána PUEꞌ i Musa.
21 Tempó iti woꞌo, Iosuá hai surudadoꞌna mopapateheꞌ upu-upu tauna to mahile ntepuꞌu wátáraꞌ to rauliꞌ toEnaꞌ. Toroꞌheꞌ i kótá Hebero, Debiri, Anabi, hai i buluꞌ-buluꞌna i tampoꞌ Iudá hai Sáráeliꞌ. Upu-upuraꞌ rapapate hai kótá-kótáraꞌ ragero toSáráeliꞌ. 22 Tiꞌara piꞌi ara toEnaꞌ to rapatodáhi tueꞌ i tampoꞌraꞌ toSáráeliꞌ, agáiáná i kótá Gasa, Gati hai Asadof ara maniheꞌ. 23 Upu-upu tampoꞌ Kánáꞌá iti naperampaꞌi Iosuá hiolaꞌ hai párentána PUEꞌ i Musa. Iosuá mogáláꞌ-gáláꞌ tampoꞌ iti mewaliꞌ hampuloꞌ hai ronggáláꞌ, haneꞌi naweꞌiheꞌ toSáráeliꞌ rapotampoꞌ. Hantina-hantina molámbiꞌ hanggáláꞌ.
Roo onoꞌ, mengkaroomoheꞌ toSáráeliꞌ mombeala hai katueꞌraꞌ maroꞌa miꞌi.