ToGibeo moákálángi toSáráeliꞌ
9
Penangiraꞌ toSáráeliꞌ tebámbári haweꞌ i upu-upu datu to mepárentá tándáꞌ i katámpuá alo uwai Iarade, maroꞌa i buluꞌ-buluꞌna, i biti buluꞌ, hai i lorena to i wiwi tahiꞌ Tangaꞌ, haweꞌ-haweꞌ i buluꞌ Libano tándáꞌ i wongko. To mohádi bámbári iti iamoheꞌ daturaꞌ toHeti, toAmori, toKánáꞌá, toPerisi, toHewi hai toIebusi. 2 Upu-upu datu iti hai surudadoꞌraꞌ hirámpuheꞌ hai himpuduheꞌ ina mampombealaꞌáheꞌ Iosuá hai toSáráeliꞌ.3 Agáiáná toHewi to toroꞌ i Gibeo mohádimoheꞌ mokana i apa to nabábehi Iosuá hai surudadoꞌnaheꞌ i kótá Ieriko hai Ai. 4-5 Onoꞌ miꞌi haneꞌi moliwoheꞌ ina moákálángi toSáráeliꞌ. Mebaduheꞌ to mahepaꞌ-hepaꞌ hai mopakeꞌheꞌ sandale to sae to ratátámpelei. I kalideraꞌ rapohumpádái gande hangko i karuꞌ to sae hai pemboliá uwai anggoroꞌ to sae to rabábehi hangko i koliꞌ binataꞌ hai mopatátámpelei miꞌi. Rótiꞌraꞌ bangi miꞌi hai hápuká. 6 Noꞌonoꞌ iti kahaweꞌraꞌ mampohidupaꞌá Iosuá i pobambaruꞌáraꞌ toSáráeliꞌ i Giligá. Molaluitaheꞌ i Iosuá hai upu-upu toSáráeliꞌ, rauliꞌ, “Kaiꞌ hangko i tampoꞌ to karaoꞌangkaiꞌ, hai kiundeꞌ mopaꞌara podándi pohintuwuꞌ hai kómu.”
7 Agáiáná toSáráeliꞌ mohánikiheꞌ toHewi, rauliꞌ, “Tiꞌaraꞌangkaiꞌ peisá mobábehi podándi hai tauna to toroꞌ i tampoꞌ deꞌe,a hai tiꞌara kiꞌisá ba hangko iumbákou mai, babilaꞌ to hungkuꞌ pekou i kaiꞌ!”
8 Rauliꞌ toHewi i Iosuá, “Kaiꞌ deꞌe hawiꞌmuangkaiꞌ. Timamaꞌangkaiꞌ mobábehi apa peá to nupárentáiáꞌangkai!”
Iosuá mekuneꞌ i hira, nauliꞌ, “Heánákou noeneꞌ, hai hangko iumbákou mai?”
9 Rahániki toHewi, “Kaiꞌ deꞌe hangko i tampoꞌ to karaoꞌangkaiꞌ. Kihádi miꞌi bámbári kana i PUEꞌ Ala to nipenómbái. Kihádi apa to nabábehi PUEꞌ i tampoꞌ Másiriꞌ hangkoia. 10 Kihádi woꞌo apa to Nabábehi i rodua daturaꞌ toAmori i hambali uwai Iarade, iamoheꞌ datu Siho i kótá Hesibo hai datu Og i kótá Asitaroꞌ i tampoꞌ Basana.b 11 Mewaliꞌ tadulakongkiꞌ mohuoꞌangkaiꞌ mopatimama boku hai mai ieneꞌ mampombelámbiákou. Rahángáꞌáꞌangkaiꞌ, hangaa-ngaa mengkoruꞌangkaiꞌ i kómu hai membiáꞌ mopaꞌara podándi pohintuwuꞌ. 12 Peita rótiꞌkiꞌ, maꞌámuꞌ mani tempóngkiꞌ pohuꞌ hangko i támbingkiꞌ. Agáiáná deꞌe-deꞌe bangi miꞌi hai hápuká. 13 Noꞌonoꞌ woꞌo pemboliá uwai anggoroꞌ. Tempóna kióntóki, woꞌu mani. Deꞌe-deꞌe mahepaꞌ miꞌi. Waruꞌkiꞌ hai sandalengkiꞌ sae mpiiꞌ miꞌi ánti kakaraoꞌna ntepuꞌu polumaoángkiꞌ.”
14 Mewaliꞌ tadulakoraꞌ toSáráeliꞌ moalaheꞌ rótiꞌraꞌ toGibeo hantódiꞌ, agáiáná tiꞌaraheꞌ membiáꞌ popakanótóna PUEꞌ.c 15 Noꞌonoꞌ miꞌi Iosuá mopaꞌara podándi pohintuwuꞌ hai toGibeo hai mampodándiáheꞌ tiꞌaraheꞌ ina rapapate toSáráeliꞌ. Tadulako-tadulakoraꞌ toSáráeliꞌ mampokana hai modándiheꞌ woꞌo noꞌonoꞌ i lindoꞌna Pueꞌ.
Raisá miꞌi toSáráeliꞌ karaꞌákálángiraꞌ toGibeo
16 Tálu alona karooraꞌ toSáráeliꞌ mobábehi podándi pohintuwuꞌ hai toGibeo, rahádi bámbári katoroꞌáraꞌ toGibeo hungkuꞌ peá, araheꞌ woꞌo i tampoꞌ Kánáꞌá. 17 Onoꞌ miꞌi haneꞌi pohuꞌheꞌ toSáráeliꞌ hangko i Giligá, hai i katáluna alona, haweꞌheꞌ i kótáraꞌ toGibeo iti, ia miꞌi kótá Gibeo, Kepira, Beeroꞌ, hai Kiriaꞌ-Iearimi. 18 Agáiáná tiꞌarapoheꞌ peisá mopapate to Gibeo, láwiꞌ tadulakoraꞌ toSáráeliꞌ mopaꞌaramoheꞌ podándi pohintuwuꞌ i lalu hangaꞌna PUEꞌ Ala to rapenómbái toSáráeliꞌ.
Upu-upu toSáráeliꞌ mohume-humeheꞌ kana i bábehiáraꞌ tadulakoraꞌ iti, 19 agáiáná rauliꞌ tadulako iti i toSáráeliꞌ, “Tapanoumbá paꞌi! Roomongkaiꞌ modándi i hira i lalu hangaꞌna PUEꞌ Ala Pueꞌtaꞌ toSáráeliꞌ. Deꞌe-deꞌe tiꞌarakeꞌ peisá mobábehi to kadake i hira. 20 Tiꞌarakeꞌ peisá mopapateheꞌ láwiꞌ kitaꞌ modándimokeꞌ, hai ane taliungi dándi iti, bateꞌna ina nahukukeꞌ Pueꞌ Ala. Node to ina tabábehi: 21 hira tapatodáhiheꞌ tueꞌ, agáiáná mewaliꞌ peheꞌ topobehontaꞌ kau api hai topantámbuꞌtaꞌ.” Iti miꞌi pobutusiraꞌ tadulakoraꞌ toSáráeliꞌ.
22 Hangko ionoꞌ, Iosuá mokióꞌheꞌ toGibeo, nauliꞌ, “Moapa riꞌi haneꞌi niákálángiangkaiꞌ hai niuliꞌ katoroꞌámi karaoꞌ hangko i kaiꞌ, mole riꞌi hungkuꞌntokou. 23 Onoꞌ miꞌi haneꞌi Pueꞌ ina mohukukou: ina mewaliꞌkou oaꞌ hawiꞌ topobeho kau api hai topantámbuꞌ i bambaruꞌna Pueꞌ Ala to kipenómbái.”
24 Mehániꞌheꞌ, “Kibábehi noꞌonoꞌ láwiꞌ kihádi PUEꞌ Ala to nipenómbái mohuoꞌ miꞌi Musa huoꞌáNa mampeweꞌi humalele tampoꞌ deꞌe mewaliꞌ tampoꞌmi hai mopatuna upu-upu tauna to toroꞌ ieneꞌ. Kipokalááꞌ ntepuꞌu ane rapapateangkaiꞌ. Onoꞌ miꞌi haneꞌi kiákálángikou kipanoꞌonoꞌ. 25 Mewaliꞌ deꞌe-deꞌe, kaiꞌ araꞌangkaiꞌ i lalu kuasaꞌmu. Nubábehi miꞌi i kaiꞌ apa to maroꞌa hai to hintotoꞌ.”
26 Ánti podándiraꞌ iti, Iosuá mampeámpárái toGibeo, tiꞌara mopaliu toSáráeliꞌ mopapateheꞌ. 27 Agáiáná mantepuꞌu alo iti, Iosuá mampopewaliꞌheꞌ topobeho kau api hai topantámbuꞌraꞌ toSáráeliꞌ, hai medureiheꞌ woꞌo i Bambaruꞌ Penómbáꞌá. Haweꞌ i karaukiꞌána sura deꞌe, rapobágóꞌ oaꞌ i katoroꞌá to napileꞌi PUEꞌ ina mewaliꞌ penómbáꞌá i Hia.d