Iosuá 8

Pueꞌ mohuoꞌ Iosuá lao mombeala i kótá Ai

PUEꞌ mongkóráꞌ wopiꞌi i Iosuá, Nauliꞌ, “Nupatimamamoheꞌ upu-upu surudadoꞌmu hai laomokou mampombealaꞌá toAi. Ineeꞌkoꞌ malááꞌ hai bata-bata lalumu, láwiꞌ deꞌe-deꞌe ina Kutulungikoꞌ bona monangikoꞌ daturaꞌ toAi. Kótána, tampoꞌna hai upu-upu taunána ina Kuweꞌikou. 2 Tauna i kótá iti hai datuna hangaa-ngaa nipatunaheꞌ nodo kanipatunana tauna i kótá Ieriko hai datuna, agáiáná deꞌe-deꞌe párewáraꞌ hai binataꞌraꞌ peisá niala. Nuhuoꞌ bahangapa surudadoꞌ lao mebuni i taleuꞌna kótá iti, tándáꞌ i katampuá alo.”

3 Mewaliꞌ mopatimama mpuꞌumoheꞌ Iosuá hai surudadoꞌna ina lao mampombealaꞌá kótá Ai. Iosuá mopileꞌi tálu puloꞌna sáburaꞌ surudadoꞌ to maróhó hai keate hangko i oloꞌraꞌ toSáráeliꞌ, haneꞌiheꞌ pohuꞌ ane káindi miꞌi. 4 Hangko tiꞌara maniheꞌ pohuꞌ, Iosuá mopárentáiheꞌ, nauliꞌ, “Laomokou mebuni i taleuꞌna kótá iti, agáiáná ineeꞌkou gaga karaoꞌ, hai timamakou mombeala. 5 Kódóꞌ hai surudadoꞌ hanggááꞌ, ina mohungkukiangkaiꞌ kótá iti. Ane toAi mesuwuꞌheꞌ meꞌewaꞌ, kaiꞌ ina melangkaꞌangkaiꞌ nodo to mewaliꞌ rungu-runguna. 6 Mewaliꞌ ina mesuwuꞌheꞌ hangko i kótá iti modápáꞌangkaiꞌ. Ina kiꞌááꞌheꞌ bona rauláꞌangkaiꞌ duuꞌkiꞌ karaoꞌ hangko i kótá iti, láwiꞌ ina rapekiri melangkaꞌangkaiꞌ nodo to mewaliꞌ i pombealantaꞌ to rungu-runguna. 7 I tempóngkiꞌ melangka, kómu hangaa-ngaa mesuwuꞌmokou hangko i pebuniámi, hai niperampaꞌi kótá iti. PUEꞌ Ala to tapenómbái ina mampoweꞌikou penangi i kótá iti. 8 Ane maꞌala miꞌi, kásáliu nihunu kótá iti hintotoꞌ hai párentána PUEꞌ. Iti miꞌi párentángkuꞌ i kómu.”

9 Iosuá mohuoꞌheꞌ surudadoꞌna iti pohuꞌ lao mebuni tándáꞌ i katámpuá alo kótá Ai, i hiliꞌna Beteli hai Ai. Lao mpuꞌumoheꞌ mepegiá ionoꞌ, agáiáná Iosuá bateꞌna hambengi peá i pobambaruꞌáraꞌ toSáráeliꞌ i Giligá.

10 Kahalona mepulo-pulo, Iosuá mopárentái surudadoꞌna to ntániꞌna bona hirámpuheꞌ, haneꞌi ia hai tadulako-tadulako toSáráeliꞌ motadulakoiheꞌ surudadoꞌ lao i kótá Ai. 11 Surudadoꞌ iti molumaoheꞌ hingkakani hai Iosuá ina laoheꞌ i babaꞌá kótá Ai. Mobambaruꞌheꞌ tándáꞌ i wongko kótá Ai i hambuaꞌ lembo to ara i hiliꞌraꞌ hai kótá Ai. 12 Iosuá mohuoꞌmoheꞌ rekeꞌ-rekeꞌna lima sáburaꞌ surudadoꞌ lao mebuni i hiliꞌna kótá Beteli hai Ai tándáꞌ i katámpuá alo. 13 Mewaliꞌ surudadoꞌ iti, kahandaꞌáraꞌ laoheꞌ tándáꞌ i wongko kótá, hai to ntániꞌna laoheꞌ mebuni tándáꞌ i katámpuá alo. Wengi iti molumao miꞌi Iosuá hai surudadoꞌnaheꞌ mesuaꞌ i lembo iti.

14 Mepulo-pulo, kanaitána daturaꞌ toAi apa to pewaliꞌ iti, ia hai upu-upu taunána kásáliu mesuwuꞌheꞌ hangko i kótá iti ina lao mombeala. Modápáꞌheꞌ toSáráeliꞌ haweꞌ i lembo karadápáꞌáraꞌ rungu-runguna. Tiꞌara naisá daturaꞌ toAi iti kaꞌáráraꞌ surudadoꞌ toSáráeliꞌ to ntániꞌna mebuni i hambali kótá. 15 Iosuá hai upu-upu surudadoꞌna mampe to manangiheꞌ hai melangkaheꞌ lao i pádá loriꞌ tándáꞌ i pembetoá alo. 16 Upu-upu tobaleilo to ara i kótá Ai rahuoꞌheꞌ modápáꞌ Iosuá hai surudadoꞌnaheꞌ. Agáiáná kakaraoꞌ-raoꞌáheꞌ modápáꞌ Iosuá, kakaraoꞌ-raoꞌáheꞌ hangko i kótáraꞌ. 17 Tiꞌara piꞌi haweꞌ hadua tauna mokámpái kótá Ai hai Beteli, láwiꞌ upu-upu tobaleilo to maróhó mesuwuꞌmoheꞌ lao modápáꞌ surudadoꞌraꞌ toSáráeliꞌ. Mewaliꞌ kótá iti rapálehi miꞌi hai babaꞌá kótá tebungkáhi, tiꞌara piꞌi ara to mokámpái.

ToSáráeliꞌ monangi toAi

18 Mongkóráꞌ wopiꞌi PUEꞌ i Iosuá, Nauliꞌ, “Nutiórá tawalaꞌmu hai nupopelindoꞌ tándáꞌ i kótá Ai, láwiꞌ deꞌe-deꞌe kótá iti Kuweꞌimokoꞌ.” Iosuá mampeuláꞌi mpuꞌu miꞌi párentána PUEꞌ iti. 19 Karaitána surudadoꞌna to mebuni iti Iosuá motiórá miꞌi tawalaꞌna, kásáliu mesuwuꞌheꞌ melangka lao mosuaki kótá iti, rakuasaꞌi, haneꞌi rahunu.

20-21 Tempóraꞌ toAi mehaileꞌ i taleuꞌraꞌ, raita rámbu to rumukuꞌ haweꞌ i langiꞌ. Tiꞌara piꞌi raisá kaꞌiumbáꞌáraꞌ melangka. Iosuá hai surudadoꞌna moita woꞌo rámbu iti, hai raisá kasurudadoꞌraꞌ miꞌi to mebuni to mokuasaꞌimoheꞌ kótá iti. Onoꞌ miꞌi haneꞌi Iosuá hai surudadoꞌna mesuleꞌheꞌ huleꞌ lao mombeala hai mopapateheꞌ toAi. 22 Tempó onoꞌ, toSáráeliꞌ to ara i kótá Ai haweꞌmoheꞌ woꞌo lao molibuꞌ toAi rapombeálaꞌá, hai toAi rapatuhuheꞌ álána tiꞌarapoheꞌ peisá melangka mengkatueꞌ. Tiꞌara ara haweꞌ hadua to tueꞌ, upu-upuraꞌ mate rapapate toSáráeliꞌ. 23 Agáiáná daturaꞌ toAi rahakaꞌ hai raꞌánti i lindoꞌna Iosuá.

24 Karooraꞌ surudadoꞌ toSáráeliꞌ mopapate toAi to modápáꞌheꞌ haweꞌ i pádá, mesuleꞌ wopaheꞌ lao i kótá Ai hai mopapateheꞌ upu-upu toAi to ara mani ionoꞌ. 25-26 Iosuá motiórá oaꞌ tawalaꞌna napopelindoꞌ tándáꞌ i Ai duuꞌna upu-upu toAi rapapate. Alo iti woꞌo, mateheꞌ upu-upu tauna i kótá Ai, hampuloꞌ hai rosábu tauna kahandaꞌraꞌ, tobaleilo hai towawine. 27 Párewá hai binataꞌ to raperampaꞌi i kótá iti, raꞌala toSáráeliꞌ hiolaꞌ hai párentána PUEꞌ i Iosuá. 28 Iosuá mohunu kótá Ai duuꞌna upu, hai kótá iti magero oaꞌ haweꞌ deꞌe-deꞌe. 29 Daturaꞌ toAi rapapate hai ratóe i áriꞌi, hai wátámandoꞌna rapatodáhi haweꞌ kalumbaꞌ. Támpu miꞌi alo, Iosuá mohuoꞌ tauna mampopendáulu wátámandoꞌna datu iti hangko i áriꞌi karatóeána, hai ralebángá i babaꞌá kótá Ai, haneꞌi ratámbungi hai watu. Watu-watu iti ara mani haweꞌ i karaukiꞌána sura deꞌe.

Iosuá mobásá Párentána Pueꞌ i buluꞌ Ebala

30 Roo onoꞌ, Iosuá mohuoꞌ taunána moaró paintuá popenómbá i buluꞌ Ebala bona peisáheꞌ menómbá i PUEꞌ Ala, Pueꞌraꞌ toSáráeliꞌ. 31 Paintuá popenómbá iti rabábehi mouláꞌ áturá-áturá to napeweꞌi Musa huoꞌáNa i toSáráeliꞌ, nodo to teukiꞌ miꞌi i lalu sura Paturoꞌna Musa. Rabábehi hangko i watu to tiꞌara ratómpiꞌ hai tiꞌara woꞌo rapobágóꞌ hai besiꞌ. ToSáráeliꞌ mohuhuꞌheꞌ popenómbáraꞌ i PUEꞌ i wongko paintuá popenómbá iti, maroꞌa popenómbá to raintu, maroꞌa popenómbá pohintuwuꞌ. 32 I lindoꞌraꞌ upu-upu toSáráeliꞌ, Iosuá moukiꞌ huleꞌ Hawaꞌna Musa i wongko watu-watu iti. 33 Upu-upu toSáráeliꞌ, tepasuaꞌ totosaeraꞌ, tadulako-tadulako surudadoꞌ, upu-upu topobutusi hai tauna to i rawana to toroꞌ i oloꞌraꞌ, meángkáꞌheꞌ i potimbali Petiꞌ Podándina PUEꞌ, melindoꞌheꞌ i tadulako-tadulako toLewi to mokowaꞌ Petiꞌ Podándi iti. Hanggááꞌ hangko i tauna iti melindoꞌheꞌ i buluꞌ Gerisimi, hai hanggááꞌheꞌ woꞌo melindoꞌ i buluꞌ Ebala. Hangkoia Musa huoꞌána PUEꞌ mopárentáimoheꞌ mobábehi noꞌonoꞌ ane haweꞌ miꞌi tempóna ina motarimaheꞌ pewátiꞌ to Nadándiáheꞌ PUEꞌ. 34 Roo onoꞌ, Iosuá mobásá napasimbuku upu-upu áturá to teukiꞌ i lalu sura Paturoꞌna Musa, tepasuaꞌ pewátiꞌ hai pehuku. 35 Tiꞌara ara haweꞌ hampákáꞌ laluita hangko i Paturoꞌna Musa to tiꞌara nabásá Iosuá i toSáráeliꞌ, tepasuaꞌ towawine, ánángkóiꞌ, hai tauna to tiꞌara toSáráeliꞌ to toroꞌ hingkakani hai hira.