Akani rahuku mate ánti kamadósána
7
Pueꞌ mopárentáimoheꞌ toSáráeliꞌ bona mopatuna kótá Ieriko hai upu-upu óntóꞌna, tiꞌara ara to peisá raꞌala tauna. Agáiáná hadua tobaleilo to rahangaꞌ Akani tiꞌara mampeuláꞌi hawaꞌna Pueꞌ iti, onoꞌ miꞌi haneꞌi mabukoꞌ ntepuꞌu PUEꞌ i toSáráeliꞌ. Akani iti ánáꞌna Karimi, ueꞌna Sabadi, pemuleꞌána Sera ánáꞌna Iudá.2 Iosuá mohuoꞌ bahangapa toSáráeliꞌ pohuꞌ hangko i kótá Ieriko, lao i kótá Ai. Kótá Ai iti tándáꞌ i pembetoá alo kótá Beteli, hungkuꞌ i kótá Bete-Awe. Nauliꞌ Iosuá i hira, “Laomokou momata-matai kótá Ai hai tampoꞌ to hungkuꞌ ionoꞌ.” Mewaliꞌ rapeuláꞌi mpuꞌu miꞌi apa to nahuoꞌáheꞌ Iosuá, laoheꞌ momata-matai kótá Ai.
3 I pesuleꞌraꞌ, laoheꞌ i Iosuá mopahaweꞌ, rauliꞌ, “Ineeꞌ miꞌi nupakapári upu-upuna surudadoꞌ lao mampombealaꞌá kótá Ai, gáná miꞌi rosábu ba tálu sábuna to lao. Tiꞌara paraluu nupakasusa upu-upu surudadoꞌ molumao lao ionoꞌ, láwiꞌ tauna i kótá iti hantódiꞌ peheꞌ.” 4 Mewaliꞌ surudadoꞌ to lao mombeala iti, kahandaꞌraꞌ rekeꞌ-rekeꞌna tálu sábuna, agáiáná rahuhuliheꞌ toAi hai manangiheꞌ. 5 ToAi modapáheꞌ toSáráeliꞌ hangko i babaꞌá kótá Ai hai mopapateheꞌ toSáráeliꞌ i bátána buluꞌ haweꞌ-haweꞌ i pokaeá watu i Sabarimi. Kahandaꞌraꞌ toSáráeliꞌ to mate rapapate, tálu puloꞌraꞌ hai ini tauna, onoꞌ haneꞌi toSáráeliꞌ iti kósóꞌmoheꞌ hai malááꞌ ntepuꞌuheꞌ.
6 Rumihi ntepuꞌu kamasusana laluna Iosuá hai upu-upu tadulakoraꞌ toSáráeliꞌ, onoꞌ miꞌi haneꞌi mohepaꞌ-hepaꞌheꞌ baduraꞌ, mopálumbáheꞌ i lindoꞌna Petiꞌ Podándina PUEꞌ duuꞌ káindi, hai wuáꞌraꞌ raꞌawui tandaꞌ kamasusana laluraꞌ. 7 Nauliꞌ Iosuá, “Ó Pueꞌ ALA Pueꞌkuꞌ! Apa miꞌi bunduꞌna Nuántiangkaiꞌ taunáMu mengkalimba i uwai Iarade? Ba mai peangkaiꞌ Nuhuhuꞌ i toAmori bona rapapateangkaiꞌ? Rángina miꞌi toroꞌ peangkaiꞌ i hambali uwai Iarade. 8 Ó Pueꞌ! Kaiꞌ toSáráeliꞌ mampelangkahaꞌangkaiꞌ ewálingkiꞌ. Deꞌe-deꞌe apa miꞌi to ina kuꞌuliꞌ?” 9 Ane toKánáꞌá hai upu-upu tauna ntániꞌna i tampoꞌ Kánáꞌá deꞌe mohádi apa to pewaliꞌ iti, ina ralibuꞌangkaiꞌ hai rapapateangkaiꞌ upu-upu. Ane iti to mewaliꞌ, noumbá miꞌi kaNubábehina bona hangaꞌMu rabiláꞌ huleꞌ?”
10 Mongkóráꞌ miꞌi PUEꞌ i Iosuá, Nauliꞌ, “Pearó! Moapa riꞌi haneꞌikoꞌ mopálumbá noiti? 11 ToSáráeliꞌ mobábehimoheꞌ dósá, raliungi miꞌi podándiNgkuꞌ,a láwiꞌ moalamoheꞌ párewá to hangaa-ngaa rapataniꞌáMoꞌ. Rapanako hai rawuni i lalu párewáraꞌ. 12 Onoꞌ miꞌi haneꞌi tiꞌara nibuku molindoꞌ ewálimi. Mampelangkahakou ewálimi láwiꞌ kómu rahukumokou ina rapatuna. Tiꞌarapokou ina Kuporángá ane párewá to tiꞌara peisá niala iti tiꞌara mani nipatuna.
13 Laomokoꞌ Iosuá! Nupárentáiheꞌ toSáráeliꞌ bona mopamagasaꞌheꞌ wátáraꞌ, láwiꞌ kahalo ina Kupohidupaꞌáheꞌ. Kódóꞌ PUEꞌ Ala Pueꞌmi toSáráeliꞌ. Ina mongkóráꞌAꞌ i kómu, ina Kuꞌuliꞌ node: ‘Ee toSáráeliꞌ! Párewá to Kupárentáiákou hangaa-ngaa nipatuna, hanggááꞌ ara mani i kómu. Ane tiꞌara mani nitibe párewá iti, tiꞌara ina nibuku mantaha molindoꞌ ewálimi.’
14 Mewaliꞌ Kuhángáꞌákoꞌ Iosuá, kahalo mepulo kómu toSáráeliꞌ to hampuloꞌ hai rontina, ina Kupáresáꞌkou hantina-hantina. Ane Kutudoꞌheꞌb hantina, upu-upu kolompoꞌ tina iti hangaa-ngaa meángkáꞌheꞌ i lindoꞌKuꞌ. Hai ane Kutudoꞌ hangkolompoꞌ, hantámbi-hantámbi hangaa-ngaa meángkáꞌheꞌ i lindoꞌKuꞌ. Haneꞌi ane Kutudoꞌ hantámbi, hadua-hadua hangaa-ngaa meángkáꞌheꞌ i lindoꞌKuꞌ. 15 Heáná to Kupakanótó, ia miꞌi to moala párewá to hangaa-ngaa rapataniꞌáꞌAꞌ. Ia ina rahunu hante upu-upu párewána, láwiꞌ ia moliungi miꞌi podándiNgkuꞌ hai mopakedái hangaꞌraꞌ toSáráeliꞌ.”
16 Kahalona mepulo-pulo, Iosuá mokióꞌheꞌ toSáráeliꞌ hantina-hantina lao i lindoꞌ bona rapampeliꞌi heáná to masalaꞌ. To kana iamoheꞌ toIudá. 17 Roo onoꞌ, Iosuá mokióꞌheꞌ toIudá hangkolompoꞌ-hangkolompoꞌ lao i lindoꞌna. Pemuleꞌánaheꞌ Sera to kana. Roo onoꞌ, toSera hantámbi-hantámbi lao i lindoꞌ. Hantámbiána Sabadi to kana. 18 Roo onoꞌ, Iosuá mokióꞌ wopaheꞌ hantámbiána Sabadi lao i lindoꞌ hadua hai hadua. Akani ánáꞌna Karimi ueꞌna Sabadi, pemuleꞌána Sera ánáꞌna Iudá to kana.
19 Nauliꞌ Iosuá, “Akani, nupangákuꞌ kamasalaꞌmu i lindoꞌna PUEꞌ Ala to rapenómbái toSáráeliꞌ. Ineeꞌ nuwuniángi i kódóꞌ.”
20 Mehániꞌ Akani, “Kupangákuꞌ kakódóꞌna to mobábehi dósá i lindoꞌna PUEꞌ Ala to rapenómbái toSáráeliꞌ. Deꞌe miꞌi to kubábehi: 21 I oloꞌna párewá to kiperampaꞌi, kuita hantau kumbá to mababe ntepuꞌu to hangko i Bábeli,c hai kuita woꞌo dóiꞌ peráꞌ rekeꞌ-rekeꞌna rokiló kamatimina, hai hangkau buláwá to hantangaꞌ kiló lábi kamatimina. Kupokaelu ntepuꞌu párewá iti haneꞌi kuala kutawu i lalu bambaruꞌkuꞌ, hai peráꞌ iti kutawu i wóiꞌ ntepuꞌu.”
22 Hangko ionoꞌ, Iosuá mohuoꞌ tauna bona hawiáꞌheꞌ lao i bambaruꞌna Akani, hai párewá to tiꞌara peisá raꞌala iti, upu-upuna aranto ionoꞌ natawu i tampoꞌ, hai peráꞌ i wóiꞌ ntepuꞌu. 23 Mewaliꞌ párewá iti raꞌánti lao i Iosuá hai upu-upu toSáráeliꞌ, haneꞌi rawoli i lindoꞌna PUEꞌ.d
24 Hangko ionoꞌ, Iosuá hai upu-upu toSáráeliꞌ mohakaꞌ Akani pemuleꞌána Sera, hai moalaheꞌ woꞌo upu-upu gapiꞌna, kalide, bekeꞌ, dimbá hai upu-upu párewána tepasuaꞌ peráꞌ, buláwá hai kumbá to napanako, hai bambaruꞌna. Noꞌonoꞌ woꞌo upu-upuna ánáꞌna rahakaꞌheꞌ raꞌánti lao i lembo Akoro. 25 Molaluita wopiꞌi Iosuá i Akani, nauliꞌ, “Láwiꞌ nupamapáriangkaiꞌ, deꞌe-deꞌe ina napamapárikoꞌ PUEꞌ!”
Roo onoꞌ, upu-upu toSáráeliꞌ mowatuiheꞌ Akani, tinána hai binataꞌna duuꞌraꞌ mate, haneꞌi rahunuheꞌ hingkakani hai párewáraꞌ upu-upu. 26 Roo onoꞌ, ratámbungiheꞌ hai watu to handaꞌ, hai watu iti ara mani haweꞌ i karaukiꞌána sura deꞌe. Onoꞌ miꞌi haneꞌi kaꞌaraꞌá iti rahangaꞌ lembo Akoro, lempóna, “lembo kapári”.e Rooheꞌ mobábehi upu-upuna iti, mengkaroo miꞌi kamabukoꞌna PUEꞌ.