Iosuá 6

Kamagerona kótá Ieriko

Tempó onoꞌ, ánti kahaweꞌraꞌ toSáráeliꞌ, babaꞌá bente kótá Ieriko ratuko miꞌi hai rakámpái ntepuꞌu bona tiꞌara ara tauna to peisá mesuaꞌ ba mesuwuꞌ.

2 PUEꞌ mongkóráꞌ i Iosuá, Nauliꞌ, “Ina Kuweꞌikoꞌ penangi i toIeriko, tepasuaꞌ daturaꞌ hai surudadoꞌ to maróhó mombeala. 3 Io hai upu-upu surudadoꞌmu hangaa-ngaa moterekou molumao motolelingi kótá Ieriko haliko i lalu hangalo. Nibábehi oaꞌ noꞌonoꞌ haweꞌ ini alona. 4 Pituheꞌ tadulako menómbá hangaa-ngaa molumao moioru hangko i Petiꞌ Podándi, hadua-hadua moánti hambuaꞌ tamburuꞌ to rabábehi hangko i tánduꞌ dimbá. Agáiáná i kapituna alona, upu-upukou hangaa-ngaa molumao motolelingi kótá iti pitu likona, hai pituheꞌ tadulako menómbá hangaa-ngaa motawueꞌheꞌ oaꞌ tamburuꞌraꞌ. 5 Ane lelimoheꞌ upu-upu surudadoꞌ toSáráeliꞌ molumao motolelingi kótá iti pitu likona, tadulako menómbá to pitu hangaa-ngaa motawueꞌheꞌ tamburuꞌraꞌ rapakarue, hai ane nihádi pokániꞌ tamburuꞌ iti, mogeeꞌkou nipasimbuku, hai bente kótá iti ina magero. Hangko ionoꞌ, peisámokou mempanaiꞌ hai liliukou mesuaꞌ i lalu kótá iti.”

6 Hangko ionoꞌ, Iosuá mokióꞌheꞌ tadulako menómbá, nauliꞌ, “Niángkáꞌ miꞌi Petiꞌ Podándina PUEꞌ, hai pitu hangko i kómu hangaa-ngaa moántiheꞌ tamburuꞌ to rabábehi hangko i tánduꞌ dimbá, molumao moioru i lindoꞌraꞌ to mokowaꞌ Petiꞌ Podándi iti.”

7 Molaluita miꞌi Iosuá i surudadonaheꞌ, nauliꞌ, “Molumaomokou nitolelingi kótá iti, hai hantobu surudadoꞌ hangaa-ngaa moioru hangko i Petiꞌ Podándina PUEꞌ.”

8-9 Hiolaꞌ hai párentána Iosuá, molumaoheꞌ surudadoꞌ i lindoꞌraꞌ tadulako menómbá to pitu to moánti tamburuꞌ. I taleuꞌraꞌ molumao tadulako menómbá to mokowaꞌ Petiꞌ Podándina PUEꞌ, haneꞌi i bókóꞌ-bókóꞌ, metuntungiheꞌ handaꞌ ntepuꞌu surudadoꞌ. Tangaꞌraꞌ molumao, tamburuꞌ rapopokániꞌ oaꞌ. 10 Hangko tiꞌara maniheꞌ molumao, Iosuá molaluita i hira, nauliꞌ, “Ineeꞌkou mohewo. Hangaa-ngaa maniiꞌ-niiꞌkou duuꞌna ara párentángkuꞌ. Ane kupárentáikou mogeeꞌ hangko mogeeꞌrakou nipapasimbuku.” 11 Karoona Iosuá mopárentáiheꞌ, tadulako menómbá mokowaꞌheꞌ Petiꞌ Podándina PUEꞌ motolelingi kótá Ieriko haliko hingkakani hai upu-upu surudadoꞌ toSáráeliꞌ haneꞌi mesuleꞌheꞌ lao i pobambaruꞌáraꞌ hai hambengiheꞌ ionoꞌ.

12 Kahalona, Iosuá mearó mepulo-pulo {hai mohuoꞌ wopaheꞌ tadulako menómbá hai surudadoꞌ toSáráeliꞌ motere bona timamaheꞌ motolelingi wopiꞌi kótá Ieriko}. Mewaliꞌ tadulako menómbá moángkáꞌheꞌ Petiꞌ Podándina PUEꞌ haneꞌi rakowaꞌ. 13 Roo onoꞌ, motolelingi wopaheꞌ kótá Ieriko. Pombehuhuꞌána polumaoraꞌ hibali hai to iamáindi, ia miꞌi: ioru-oru hantobu surudadoꞌ haneꞌi pitu tadulako menómbá to motawueꞌ tamburuꞌ, haneꞌi tadulako menómbá to mokowaꞌ Petiꞌ Podándina PUEꞌ, hai i taleuꞌraꞌ surudadoꞌ ntániꞌna. Tangaꞌraꞌ molumao, tamburuꞌ rapopokaniꞌ oaꞌ. 14 Karongalona iti, motolelingi wopaheꞌ kótá iti haliko haneꞌiheꞌ mesuleꞌ lao i pobambaruꞌáraꞌ. Noꞌonoꞌ oaꞌ karabábehina i lalu ini alona kamaruena.

15 I kapituna alona, mearóheꞌ mepulo-pulo haneꞌiheꞌ motolelingi kótá Ieriko hibali hai to rabábehi miꞌi, agáiáná i alo iti, ratolelingi pitu likona. 16 I kapituna likona, tadulako menómbá timamamoheꞌ ina motawueꞌ tamburuꞌraꞌ rapasimbuku. Iosuá mopárentáiheꞌ upu-upu surudadoꞌna, nauliꞌ, “Mogeeꞌmokou láwiꞌ PUEꞌ mampeweꞌi miꞌi kótá deꞌe i kitaꞌ!” 17 Hangaa-ngaa nigero humalele kótá iti hai nipapate upu-upu to tueꞌ i laluna, maroꞌa tauna, maroꞌa binataꞌ, bona mewaliꞌheꞌ popenómbá i PUEꞌ. Raha peá hai upu-upu tinána to ara i lalu támbina hangaa-ngaa nipatodáhiheꞌ tueꞌ, láwiꞌ ia mowunimoheꞌ rodua taunántaꞌ to rahuoꞌ momata-matai kótá Ieriko deꞌe. 18 Agáiáná kómu, hangaa-ngaa maingáꞌ-ingáꞌkou bona tiꞌara ara to moala párewá to hangaa-ngaa nipatuna. Ane arai to moala párewá iti, kitaꞌ toSáráeliꞌ ina molámbiꞌkeꞌ huleáká. 19 Upu-upu párewá nodo buláwá, peráꞌ, tambaga hai besiꞌ to mewaliꞌ gáláꞌna PUEꞌ, hangaa-ngaa niwoli i pemboliá párewá to rapataniꞌá PUEꞌ.”

20 Karoona Iosuá mopárentáiheꞌ noꞌonoꞌ, tadulako menómbá motawueꞌheꞌ tamburuꞌraꞌ. Karahádina pokániꞌna tamburuꞌ, mogeeꞌmoheꞌ toSáráeliꞌ rapapasimbuku hai bente kótá Ieriko kásáliu magero. Upu-upu surudadoꞌ toSáráeliꞌ mempanaiꞌheꞌ hai liliuheꞌ mesuaꞌ mokuasaꞌi kótá iti. 21 Upu-upu tauna to ara i kótá iti, tosae ba to maleheꞌ, tobaleilo ba towawine, rapapateheꞌ hai pihoꞌ. Upu-upu gapiꞌ, dimbá hai kalide rapapate woꞌo.

22 Agáiáná Iosuá mohángáꞌá miꞌi mata-mata to rodua node: “Kómu modándimokou ina mopatueꞌ Raha hai upu-upu tinána. Mewaliꞌ laomokou i támbina hai niántiheꞌ mesuwuꞌ bona tueꞌheꞌ.” 23 Mewaliꞌ mata-mata to rodua iti laoheꞌ moala Raha, umána, inána, hai upu-upu tinána, hai raꞌántiheꞌ lao i katoroꞌá to tiꞌara karaoꞌ hangko i pobambaruꞌáraꞌ toSáráeliꞌ.

24 Surudadoꞌ toSáráeliꞌ mohunuheꞌ kótá iti hai upu-upu óntóꞌna, agáiáná buláwá, peráꞌ, tambaga hai besiꞌ raꞌala, rawoli hai rapataniꞌá PUEꞌ. 25 Raha hai upu-upu tinána, napatodáhiheꞌ Iosuá tueꞌ láwiꞌ Raha iti to motulungimoheꞌ mata-mata to nahuoꞌ Iosuá lao i kótá Ieriko. Raha toroꞌ mani i oloꞌraꞌ toSáráeliꞌ haweꞌ i karaukiꞌána sura deꞌe.

26 I tempó iti, Iosuá mopahaweꞌ pekambona, nauliꞌ:

“Heáná peá to moaróha huleꞌ kótá Ieriko deꞌe,

ina nahuku PUEꞌ.

Heáná to mobábehi pehodaꞌána bente kótá deꞌe,

ina mate uluánáꞌna,

hai heáná to mopatakaꞌ babaꞌá kótá deꞌe,

ina mate ánáꞌngkaupuána.”

27 PUEꞌ mamporángá oaꞌ Iosuá hai hangaꞌna Iosuá tebámbári i humalele tampoꞌ iti.