5
Upu-upu daturaꞌ toAmori tándáꞌ i katámpuá alo uwai Iarade, hai upu-upu daturaꞌ toKánáꞌá to toroꞌ i wiwi tahiꞌ Tangaꞌ, mohádiheꞌ bámbári PUEꞌ mopabangi miꞌi uwai Iarade bona toSáráeliꞌ peisáheꞌ mengkalimba i uwai iti. Malááꞌ ntepuꞌuheꞌ i toSáráeliꞌ hai maledeꞌ buꞌuraꞌ.Petileꞌ i Giligá
2 I tempó itiꞌ, PUEꞌ mongkóráꞌ miꞌi i Iosuá, Nauliꞌ, “Nubábehi ladiꞌ hangko i watu hai nupaꞌara wopiꞌi ádá petileꞌ i toSáráeliꞌ.” 3 Mewaliꞌ Iosuá mobábehi mpuꞌu miꞌi ladiꞌ hangko i watu hai toSáráeliꞌ tobaleilo ratileꞌheꞌ i hambuaꞌ katoroꞌá. Mantepuꞌu hangko ionoꞌ, katoroꞌá iti rahangaꞌ Potámbungaꞌá Petileꞌá.
4-6 Deꞌe miꞌi álásána Iosuá mopaꞌara wopiꞌi ádá petileꞌ: I tempóraꞌ toSáráeliꞌ pohuꞌ hangko i tampoꞌ Másiriꞌ, upu-upu tobaleilo ratileꞌmoheꞌ. Agáiáná i polumaoraꞌ i pádá loriꞌ iba puloꞌna parena kamaruena, upu-upu tobaleilo to tinuwuꞌraꞌ gáná miꞌi mewaliꞌ surudadoꞌa matemoheꞌ láwiꞌ tiꞌaraheꞌ mampeuláꞌi párentána PUEꞌ. Onoꞌ miꞌi haneꞌi PUEꞌ modándi tiꞌaraheꞌ ina Napaliu mesuaꞌ i tampoꞌ to maruduꞌ hai kálumá to Nadándi miꞌi i toioruraꞌ hangkoia.b 7 Mewaliꞌ Pueꞌ mopaháwángi tosae iti hai ánáꞌraꞌ. Agáiáná tobaleilo to mesupaꞌ tempóraꞌ molumao i pádá loriꞌ iba puloꞌna parena kamaruena, tiꞌara maniheꞌ ratileꞌ, onoꞌ miꞌi haneꞌi hangaa-ngaa ratileꞌheꞌ. 8 Karooraꞌ ratileꞌ, toroꞌheꞌ i bambaruꞌraꞌ hadua-hadua duuꞌraꞌ mauriꞌ.
9 PUEꞌ mongkóráꞌ wopiꞌi i Iosuá, Nauliꞌ, “Alo deꞌe, karapakahiliámi ánti karapohawiꞌmi toMásiriꞌ Kuwoe miꞌi.” Onoꞌ miꞌi haneꞌi katoroꞌáraꞌ iti rahangaꞌ Giligá haweꞌ deꞌe-deꞌe, lempóna: rawoe.
10 Tangaꞌraꞌ toSáráeliꞌ ara mani i Giligá i lembo Ieriko, i imbaꞌna kahampuloꞌ hai iba wulá iti, i katámpuá alo, mantepuꞌuheꞌ mopaꞌara Posusa Paska.c 11 Roo Posusa Paska, mandeꞌheꞌ hangko i wuaꞌna powiáꞌraꞌ toKánáꞌá, ia miꞌi bailoꞌ to rahangge, hai mobábehiheꞌ rótiꞌ to tiꞌara raragiꞌi. 12 Iti tempó to rungu-runguna toSáráeliꞌ mandeꞌheꞌ wuaꞌna powiáꞌraꞌ toKánáꞌá. Kahalona, Pueꞌ mengkaroo miꞌi mampoweꞌiheꞌ rótiꞌ manna to hangko i langiꞌ, hai mantepuꞌu alo iti, mandeꞌheꞌ pandeꞌ to ara i tampoꞌ Kánáꞌá.
Iosuá mohidupaꞌ hai hadua tadulako surudadoꞌna Pueꞌ
13 I tempóna Iosuá molumao hungkuꞌ i kótá Ieriko, iaperái hangkaꞌ ia moita hadua tobaleilo meángkáꞌ i lindoꞌna. Tobaleilo iti motibaaꞌ hamata pihoꞌ. Iosuá mohungkuki tauna iti hai mekuneꞌ, “Tándáꞌ i heánákoꞌ, tándáꞌ i kaiꞌ ba tándáꞌ i ewálingkiꞌ?”
14 Nahániki tobaleilo iti, “Tiꞌaraꞌaꞌ rángámi hai tiꞌaraꞌaꞌ woꞌo ewálimi. Kódóꞌ deꞌe tadulakoraꞌ surudadoꞌna PUEꞌ.”
Kamohádina peá laluitana tauna iti, Iosuá kásáliu molingkudu motóngkóꞌ haweꞌ i tampoꞌ hai menómbá i hia, nauliꞌ, “Kódóꞌ deꞌe huoꞌámu. Timamaꞌaꞌ mobábehi apa peá to nupárentáiáꞌaꞌ.”
15 Tadulako surudadoꞌna PUEꞌ iti molaluita i Iosuá, nauliꞌ, “Nupósu sandalemu láwiꞌ peángkáꞌámu iti magasaꞌ.” Mewaliꞌ napeuláꞌi mpuꞌu miꞌi Iosuá párentána tobaleilo iti.