Hampuloꞌ hai rombuaꞌ watu pambuhinaoá
4
Kalimbaraꞌ peá upu-upu toSáráeliꞌ i uwai Iarade, PUEꞌ mongkóráꞌ i Iosuá, Nauliꞌ, 2 “Nupileꞌi hampuloꞌ hai rodua toSáráeliꞌ, i lalu hantina hadua. 3 Nupárentáiheꞌ moala watu hampuloꞌ hai rombuaꞌ hangko i tangaꞌ-tangaꞌna uwai Iarade i peángkáꞌáraꞌ tadulako menómbá. Nuhuoꞌheꞌ mopáháꞌá watu iti haweꞌ i katoroꞌá to ina nikahambengiꞌi.”4 Mewaliꞌ nakióꞌ mpuꞌumoheꞌ Iosuá tauna to napileꞌi iti, 5 nahángáꞌáheꞌ, “Laomokou i tangaꞌ-tangaꞌna uwai Iarade, i lindoꞌna Petiꞌ Podándina PUEꞌ Ala Pueꞌtaꞌ. Hadua-hadua mopáháꞌá hambuaꞌ watu, kahandaꞌna watu hampuloꞌ hai rombuaꞌ hiolaꞌ hai imbaꞌna tina toSáráeliꞌ. 6 Watu-watu iti ina mewaliꞌ pambuhinaoá i kitaꞌ toSáráeliꞌ. I alo to ina haweꞌ, ane mekuneꞌheꞌ pemuleꞌántaꞌ apa lempóna watu-watu iti, 7 hangaa-ngaa tapodaritaꞌáheꞌ mokana i pogááꞌna uwai Iarade tempóraꞌ tadulako-tadulako menómbá mokowaꞌ Petiꞌ Podándina PUEꞌ mengkalimba i uwai iti. Mewaliꞌ watu-watu iti ina mewaliꞌ pambuhinaoá i toSáráeliꞌ haweꞌ i rue-ruena.”
8 Mewaliꞌ tauna to hampuloꞌ hai rodua iti mampeuláꞌi mpuꞌumoheꞌ párentána Iosuá. Moángkáꞌ mpuꞌumoheꞌ watu hampuloꞌ hai rombuaꞌ hangko i tangaꞌ-tangaꞌna uwai Iarade, kahandaꞌna watu iti hiolaꞌ hai imbaꞌna tina toSáráeliꞌ, haneꞌi rapáháꞌá raꞌánti haweꞌ i pobambaruꞌáraꞌ toSáráeliꞌ. Upu-upu iti rabábehi hiolaꞌ hai párentána PUEꞌ i Iosuá. 9 Roo onoꞌ, Iosuá moala wopiꞌi hampuloꞌ hai rombuaꞌ watu, naódóꞌ i tangaꞌ-tangaꞌna uwai Iarade i peángkáꞌáraꞌ tadulako-tadulako menómbá to mokowaꞌ Petiꞌ Podándi. Watu-watu iti ara mani haweꞌ i karaukiꞌána sura deꞌe.
10 Tadulako-tadulako menómbá to mokowaꞌ Petiꞌ Podándi iti, meángkáꞌheꞌ oaꞌ i tangaꞌ-tangaꞌna uwai Iarade duuꞌraꞌ toSáráeliꞌ mampeuláꞌiheꞌ upu-upu párentána PUEꞌ to Napahaweꞌ i Iosuá, hiolaꞌ woꞌo hai párentána Musa i Iosuá. ToSáráeliꞌ manggagu ntepuꞌuheꞌ mengkalimba i uwai Iarade. 11 Limbamoheꞌ toSáráeliꞌ i uwai Iarade, kahópóꞌána tadulako menómbá to mokowaꞌ Petiꞌ Podándina PUEꞌ mengkalimbaheꞌ woꞌo, hai upu-upu toSáráeliꞌ mosabiki kalimbaraꞌ. 12 Hiolaꞌ hai párentána Musa,a pengkalimbaraꞌ toSáráeliꞌ i uwai Iarade, tobaleilo to maróhó hai timama mombeala hangko i toRube, toGati, hai hantangaꞌ toManase moioruheꞌ. 13 Kahandaꞌraꞌ tobaleilo iti rekeꞌ-rekeꞌna iba puloꞌna sáburaꞌ, hai timamamoheꞌ mombeala. Molumaoheꞌ i lindoꞌna Petiꞌ Podándi lao i lembo to hungkuꞌ i kótá Ieriko.
14 Alo iti, PUEꞌ mopatongawaꞌ kamahilena hangaꞌna Iosuá i lindoꞌraꞌ toSáráeliꞌ, álána Iosuá rabiláꞌ oaꞌ hungkáꞌna mani tueꞌ, hibali hai karabiláꞌna Musa.
15 Mongkóráꞌ wopiꞌi PUEꞌ i Iosuá, Nauliꞌ, 16 “Nuhuoꞌheꞌ tadulako menómbá to mokowaꞌ Petiꞌ Podándina PUEꞌ, bona mopaliliuheꞌ polumaoraꞌ haweꞌ i hambali.”
17 Mewaliꞌ Iosuá mampeuláꞌi mpuꞌu miꞌi párentána Pueꞌ.
18 Kahaweꞌraꞌ peá tadulako menómbá iti i wiwi uwai moánti Petiꞌ Podándina PUEꞌ, uwai iti kásáliu moili huleꞌ, hai mesawiꞌ haweꞌ i wiwina nodo to biásá tempó onoꞌ.
19 Alo kalimbaraꞌ toSáráeliꞌ i uwai Iarade, imbaꞌna kahampuloꞌ wulá kaꞌisáꞌ, ia miꞌi wulá Nisan,b mobambaruꞌheꞌ i Giligá tándáꞌ i pembetoá alo kótá Ieriko.c 20 Ionoꞌ miꞌi Iosuá moꞌódóꞌ wopiꞌi hampuloꞌ hai rombuaꞌ watu to raꞌala hangko i tangaꞌ-tangaꞌna uwai Iarade.d 21 Roo onoꞌ, molaluita wopiꞌi Iosuá i toSáráeliꞌ, nauliꞌ, “I alo to ina haweꞌ, ane mekuneꞌheꞌ pemuleꞌántaꞌ apa lempóna watu-watu deꞌe, 22 nipahaweꞌ i hira: Kitaꞌ toSáráeliꞌ mengkalimbakeꞌ i uwai Iarade deꞌe i tampoꞌ to bangi, 23 láwiꞌ PUEꞌ Ala to tapenómbái mopabangi uwai Iarade haneꞌi tabuku mengkalimba, nodo to Nabábehi hangkoia i tahiꞌ Teberau.e 24 PUEꞌ mobábehi noꞌonoꞌ bona upu-upu tauna i duniáꞌ ina moisá kamahilena mpuꞌu kuasaꞌNa hai bona kómu ina mengkoruꞌkou oaꞌ i PUEꞌ Ala Pueꞌtaꞌ haweꞌ i rue-ruena.”