ToSáráeliꞌ mengkalimbaheꞌ i uwai Iarade
3
Kahalona mepulo-pulo, Iosuá hai upu-upu toSáráeliꞌ mearómoheꞌ mopálehi pobambaruꞌáraꞌ i Sitim, melimbáheꞌ lao i wiwi uwai Iarade. Haweꞌmoheꞌ ionoꞌ, mobambaruꞌ wopaheꞌ ina rakatoroꞌi lántuꞌáraꞌ mampegiá tempóraꞌ ina mengkalimba i uwai Iarade. 2 Liu miꞌi tálu alona, tadulako-tadulakoraꞌ laoheꞌ i upu-upu bambaruꞌ, 3 hai mopárentáiheꞌ toSáráeliꞌ, rauliꞌ, “Ane niꞌitamoheꞌ tadulako menómbá, iamoheꞌ toLewi, mokowaꞌ Petiꞌ Podándina PUEꞌ Ala Pueꞌtaꞌ, pohuꞌmokou woꞌo hangko i pobambaruꞌámi deꞌe, hai niuláꞌ petiꞌ iti 4 bona niꞌisá rárá to ina niuláꞌ, láwiꞌ tiꞌara mani haweꞌ hangkani niporárái. Agáiáná ineeꞌkou gaga hungkuꞌ i petiꞌ iti, hangaa-ngaa hakiló iliꞌmi.”a5 Nauliꞌ Iosuá i toSáráeliꞌ, “Nipamagasaꞌ miꞌi wátámi,b láwiꞌ kahalo PUEꞌ ina mopatongawaꞌ tandaꞌ kuasaꞌ to mahile i kitaꞌ.”
6 Nauliꞌ Iosuá i tadulako-tadulako menómbá, “Niángkáꞌ miꞌi Petiꞌ Podándi haneꞌi nikowaꞌ, molumaokou ioru hangko i kaiꞌ.” Raꞌángkáꞌ mpuꞌu miꞌi Petiꞌ Podándi iti hai moioruheꞌ hangko i toSáráeliꞌ to ntániꞌna.
7 Mongkóráꞌ wopiꞌi PUEꞌ i Iosuá, Nauliꞌ, “Mantepuꞌu alo deꞌe, ina Kupatongawaꞌ kamahilena hangaꞌmu i lindoꞌraꞌ toSáráeliꞌ, bona rabiláꞌkoꞌ, hai bona raisá kaKuporángámu nodo woꞌo kaKuporángána Musa. 8 Deꞌe-deꞌe nupárentáiheꞌ tadulako-tadulako menómbá to mokowaꞌ Petiꞌ Podándi. Ane haweꞌheꞌ i uwai Iarade, hangaa-ngaa measoheꞌ i lalu uwai iti hai meángkáꞌheꞌ i wiwina.”
9 Hangko ionoꞌ, Iosuá mokióꞌheꞌ toSáráeliꞌ, nauliꞌ, “Maikou, nipehádingi ngkóráꞌna PUEꞌ Ala Pueꞌtaꞌ. 10-11 Ane molumaokou deiná, bateꞌna Pueꞌ Ala ina mowura toKánáꞌá, toHeti, toHewi, toPerisi, toGirigasi, toAmori hai toIebusi hangko i tampoꞌraꞌ to ina takatoroꞌi. Hai i tempóna Petiꞌ Podándina Pueꞌ to makuasaꞌ i humalele duniáꞌ ina rakowaꞌ mengkalimba i uwai Iarade moioru hangko i kitaꞌ, ina tongawaꞌ ntepuꞌu kanaporángántaꞌ Pueꞌ Ala to tueꞌ. 12 Deꞌe-deꞌe, nipileꞌi hampuloꞌ hai rodua toSáráeliꞌ, i lalu hantina, hadua. 13 Ane tadulako menómbá to mokowaꞌ Petiꞌ Podándina PUEꞌc measomoheꞌ i lalu uwai Iarade, uwai iti ina kásáliu mengkaroo, hai to moili hangko i uluna ina tetaha mopasamboloꞌ.”
14 Tempóraꞌ toSáráeliꞌ pohuꞌ hangko i pobambaruꞌáraꞌ ina mengkalimba i uwai Iarade, tadulako-tadulako menómbá to mokowaꞌ Petiꞌ Podándi molumaoheꞌ ioru. 15 Tempó iti tempó mepare, hai uwai Iarade mehálómpó haweꞌ i wiwina nodo biásána i tempó iti.d Kahaweꞌraꞌ tadulako-tadulako menómbá to mokowaꞌ Petiꞌ Podándi iti i uwai Iarade, measoheꞌ. 16 Tempó iti woꞌo, uwai iti mengkaroo moili. Uwai hangko i uluna tetaha, duuꞌna haweꞌ hungkuꞌ i kótá Adama,e to i hambalina Sarata. Onoꞌ miꞌi haneꞌi uwai to moili lao i tahiꞌ Araba, to rauliꞌ woꞌo tahiꞌ Mate, maꞌáti ntepuꞌu. Hangko ionoꞌ, toSáráeliꞌ lao i kótá Ieriko mampenoroꞌ moliu uwai Iarade to mogááꞌ iti. 17 Agáiáná tadulako-tadulako menómbá to mokowaꞌ Petiꞌ Podándina PUEꞌ, meángkáꞌheꞌ oaꞌ i tangaꞌ-tangaꞌna poiliána uwai Iarade i tampoꞌ to bangi, tangaꞌraꞌ toSáráeliꞌ mengkalimba i tampoꞌ to bangi iti, duuꞌna haweꞌmoheꞌ upu-upuf i hambali.