Raha hai rodua mata-mata
2
Iosuáa mohuoꞌheꞌ rodua tauna pohuꞌ hangko i pobambaruꞌáraꞌ toSáráeliꞌ i Sitim, nauliꞌ, “Laokou momata-matai tampoꞌ Kánáꞌá hai kótá Ieriko.” Lao mpuꞌumoheꞌ hai haweꞌheꞌ i támbina hadua towawine to rahangaꞌ Raha to tiꞌara maroꞌa bábehiána, hai hambengiꞌheꞌ ionoꞌ.2 Káindi iti, ara tauna to mopahaweꞌ i daturaꞌ toIeriko, nauliꞌ, “Ininá ara tauna to hangko i toSáráeliꞌ mai momata-matai kótá deꞌe.” 3 I kanahádina noꞌonoꞌ, datu mohuoꞌ tauna lao i Raha bona mopahaweꞌ párentá deꞌe: “Nupopesuwuꞌheꞌ tauna to menóntó i támbimu. Hira iti to mai momata-matai humalele tampoꞌ Ieriko!”
4 Agáiáná towawine iti mohániki, “Toꞌu, ara tauna to haweꞌ i kódóꞌ, agáiáná tiꞌara kuisá kaꞌiumbáꞌáraꞌ mai. 5 Hangko tiꞌara mani babaꞌá kótá ratuko, mesuwuꞌmoheꞌ, agáiáná tiꞌara woꞌo kuisá iumbá kalaoáraꞌ. Ane kawiáꞌheꞌ nidápáꞌ, babilaꞌ ina nilámbiꞌ maniheꞌ.” 6 Mole riꞌi towawine iti mohuoꞌmoheꞌ tauna to rodua iti mengkaheꞌ i wongko támbina to hirante atuꞌna. Nawuniheꞌ ionoꞌ haneꞌi natámbungiheꞌ hai naheb to tangaꞌna rapuai.
7 Pohuꞌ mpuꞌumoheꞌ huoꞌána datu iti. Kahaweꞌraꞌ peá i rawa kótá, babaꞌá ratuko miꞌi. Hira mampeliꞌ mpuꞌumoheꞌ rodua mata-mata iti haweꞌ i pengkalimbaꞌá uwai Iarade to hadengke.
8 Hangko tiꞌara maniheꞌ maturu tauna to rodua iti, Raha lao i wongko mampombelámbiꞌáheꞌ, 9 nauliꞌ, “Kuisá PUEꞌ mampeweꞌi tampoꞌ deꞌe i kómu toSáráeliꞌ. Kaiꞌ to ara ieneꞌ, malááꞌ ntepuꞌuangkaiꞌ i kómu, hai upu-upu tauna i tampoꞌ deꞌe moridiꞌheꞌ ánti kamalááꞌraꞌ i kómu, 10 láwiꞌ kihádi miꞌi PUEꞌ mopabangi tahiꞌ Teberauc hangkoia bona peisákou mengkalimba tempómi mesuwuꞌ hangko i tampoꞌ Másiriꞌ.d Hai kihádi miꞌi woꞌo kamopapatemi Siho hai Og, roduaheꞌ daturaꞌ toAmori to toroꞌ tándáꞌ i pembetoá alo uwai Iarade.e 11 I kakihádina bámbári iti, maledeꞌangkaiꞌ hai malááꞌ ntepuꞌuangkaiꞌ upu-upu i kómu, láwiꞌ PUEꞌ Ala to nipenómbái, Ia miꞌi Pueꞌ Ala to makuasaꞌ i langiꞌ hai i tampoꞌ. 12-13 Kódóꞌ mopatongawaꞌmoꞌ kamaroꞌangkuꞌ i kómu, onoꞌ miꞌi haneꞌi kupembiáꞌ bona modándikou i kódóꞌ i lalu hangaꞌna PUEꞌ Ala to nipenómbái, bona maroꞌakou oaꞌ i upu-upu halalungkuꞌ. Kupembiáꞌ bona nipoweꞌiaꞌ tandaꞌ to peisá kupoinálái, tiꞌarakou ina mopapate umángkuꞌ, inángkuꞌ, hai upu-upu halalungkuꞌheꞌ.”
14 Mehániꞌheꞌ mata-mata to rodua iti, rauliꞌ, “Modándiangkaiꞌ, ane haweꞌ miꞌi tempóna tampoꞌ deꞌe napeweꞌi PUEꞌ i kaiꞌ, ina kibábehi to maroꞌa i kómu, asalaꞌ ineeꞌ nupodarita i heáná peá mokana i kaiꞌ. Pueꞌ ina mohukuangkaiꞌ ane tiꞌaraꞌangkaiꞌ mobukeki dándingkiꞌ iti.”
15 Támbina Raha iti rapopeángkáꞌ i wongko bente kótá. Ia moliwo ina moulu tauna to rodua iti hangko i sungkekeꞌ, agáiáná hangko tiꞌara mani nabábehi noꞌonoꞌ, 16 nauliꞌ, “Laomokou i buluꞌ-buluꞌna hai mebunikou ionoꞌ bona tiꞌarakou ina ralámbiꞌ tauna to mampeliꞌkou. Mebunikou ionoꞌ tálu alona kamaruena. Ane mesuleꞌmoheꞌ tauna iti, hangko mopaliliurakou polumaomi.”
17 Rahániki tauna to rodua iti, rauliꞌ, “Noꞌonoꞌ miꞌi. Ina kibukeki dándi to nupembiáꞌ i kaiꞌ, asalaꞌ nupeuláꞌi to ina kihuoꞌákoꞌ. 18 Deꞌe peá to hangaa-ngaa nubábehi: ane haweꞌ miꞌi tempóngkiꞌ mampombealaꞌákou, nupetakaha kariri lero to malei i sungkekeꞌ kanupopendáuluángkiꞌ. Inámu, umámu hai halalumuheꞌ, nurámpuheꞌ i lalu támbimu. 19 Ane ara hadua to mesuwuꞌ hangko i támbimu deꞌe hai mate rapapate, tiꞌara piꞌi salaꞌkiꞌ. Agáiáná ane ara to molámbiꞌ huleáká i lalu támbi deꞌe, kaiꞌ ina mampohurunga. 20 Hai ane nupodarita i heáná peá mokana i kaiꞌ, ina tekábáháꞌangkaiꞌ hangko i dándingkiꞌ deꞌe.”
21 Nahánikiheꞌ Raha, “Ina kubábehi upu-upu to nihuoꞌáꞌaꞌ.” Roo onoꞌ, naulumoheꞌ tauna iti haneꞌi pohuꞌheꞌ. Kapohuꞌraꞌ peá, towawine iti mampetakaha miꞌi kariri lero to malei i sungkekeꞌ iti.
22 Lao mpuꞌumoheꞌ to rodua iti i buluꞌ-buluꞌna, hai mebuniheꞌ ionoꞌ tálu alona kamaruena. Topedápáꞌ iti mepeliꞌheꞌ oaꞌ i upu-upu rárá, agáiáná tiꞌaraheꞌ ralámbi, onoꞌ miꞌi haneꞌi mesuleꞌheꞌ ntooꞌ lao i kótá Ieriko. 23 Hangko ionoꞌ, mata-mata toSáráeliꞌ to rodua iti mendáuluheꞌ hangko i buluꞌ-buluꞌna haneꞌiheꞌ mengkalimba i uwai Iarade. Laoheꞌ mampombelámbiꞌá Iosuá mampodarita apa to mewaliꞌ. 24 Rauliꞌ, “PUEꞌ mampeweꞌi miꞌi humalele tampoꞌ iti i kitaꞌ. Upu-upu tauna to ara ionoꞌ malááꞌ ntepuꞌuheꞌ i kitaꞌ.”