Iosuá
Pueꞌ Ala mohuoꞌ Iosuá mokuasaꞌi tampoꞌ Kánáꞌá
1
I kamatena miꞌi nabiꞌ Musa huoꞌána PUEꞌ Ala, PUEꞌ mongkóráꞌ miꞌi i Iosuá ánáꞌna Nun, Nauliꞌ, 2 “HawiꞌKuꞌ Musa mate miꞌi. Mewaliꞌ deꞌe-deꞌe, io hai upu-upu toSáráeliꞌ hangaa-ngaa timamakou ina mengkalimba i uwai Iarade, bona mesuaꞌkou i tampoꞌ to Kuweꞌikou. 3 Nodo to Kudándi miꞌi i Musa, upu-upu tampoꞌ to ina nipolumaoi, ina Kupeweꞌi i kómu. 4 Kamaeláꞌna tampoꞌmi ina mantepuꞌu hangko i pádá loriꞌ tándáꞌ i wóiꞌ, haweꞌ-haweꞌ i buluꞌ-buluꞌna Libano to tándáꞌ i wongko, hai hangko i uwai Epara to mahile tándáꞌ i mata alo, tepasuaꞌ tampoꞌraꞌ toHeti, haweꞌ-haweꞌ i tahiꞌ Tangaꞌ tándáꞌ i katámpuá alo. Humalele tampoꞌ iti ina mewaliꞌ tampoꞌmi. 5 Lántuꞌámu tueꞌ Iosuá, tiꞌara ara haweꞌ hadua to ina monangikoꞌ, láwiꞌ ina Kuporángákoꞌ oaꞌ nodo kaKuporángána Musa. Tiꞌarakoꞌ ina Kupálehi.6 Mewaliꞌ nupakaróhó hai nupatetidaꞌ lalumu, láwiꞌ ina motadulakoikoꞌ toSáráeliꞌ mokatoroꞌi tampoꞌ to Kudándi miꞌi i toiorumi. 7 Onoꞌ miꞌi haneꞌi hangaa-ngaa nupakaróhó hai nupatetidaꞌ ntepuꞌu lalumu. Maingáꞌ-ingáꞌkoꞌ bona mampeuláꞌikoꞌ upu-upu to napahaweꞌ miꞌi Musa huoꞌáNgkuꞌ. Ane tetidaꞌkoꞌ, ina molámbiꞌkoꞌ rasiꞌ iumbá-umbá peá kalaoámu. 8 Ineeꞌ nukáláliꞌá mobásá sura Paturoꞌna Musa i lindoꞌraꞌ tauna hai mopailalu oaꞌ paturoꞌna iti. Ane nupeuláꞌi upu-upu to teukiꞌ iti, ina molámbiꞌkoꞌ rasiꞌ. 9 Hangaa-ngaa nubuhinao apa to Kuhángáꞌámokoꞌ, nupakaróhó hai nupatetidaꞌ lalumu. Mewaliꞌ ineeꞌkoꞌ malááꞌ hai bata-bata lalumu, láwiꞌ Kódóꞌ PUEꞌ Ala to nupenómbái mamporángákoꞌ iumbá-umbá peá kalaoámu.”
Iosuá mopahaweꞌ párentá hai paturoꞌ i tadulakoraꞌ toSáráeliꞌ
10 Hangko ionoꞌ, Iosuá mohuoꞌ tadulako-tadulakoraꞌ toSáráeliꞌ, nauliꞌ, 11 “Laokou i upu-upu bambaruꞌ, nipahaweꞌáheꞌ toSáráeliꞌ node: ‘Mopatimamakou bokumi, láwiꞌ tálu perái alona ina mengkalimbakeꞌ i uwai Iarade, bona mantepuꞌukeꞌ mokatoroꞌi tampoꞌ to naweꞌikeꞌ PUEꞌ Ala.’ ”
12 Roo onoꞌ, Iosuá molaluita i toRube, toGati hai hantangaꞌheꞌ toManase,a nauliꞌ, 13 “Hangaa-ngaa nibuhinao laluitana Musa huoꞌána PUEꞌ, to napahaweꞌ i kómu. Tampoꞌ to tándáꞌ i pembetoá alo uwai Iarade, deꞌe-deꞌe naweꞌimokou PUEꞌ Ala bona nikatoroꞌi. 14 Mewaliꞌ upu-upu ánáꞌmi, toinámi hai binataꞌmi, peisáheꞌ toroꞌ ieneꞌ, agáiáná upu-upu tobaleilo to maróhó hai nabuku miꞌi mombeala, hangaa-ngaa moiorukou mengkalimba i uwai Iarade bona motulungikou halalumi. 15 Hangaa-ngaa nitulungiheꞌ duuꞌraꞌ mengkaroo mombeala hai mokatoroꞌi tampoꞌ Kánáꞌá i hambali uwai Iarade to ina naweꞌiheꞌ PUEꞌ Ala. Roo onoꞌ, hangko peisárakou mesuleꞌ mai i tampoꞌmi haduduámi deꞌe, to tándáꞌ i pembetoá alo uwai Iarade, to naweꞌikou Musa huoꞌána PUEꞌ.”
16 Hangko ionoꞌ, molaluitamoheꞌ i Iosuá, rauliꞌ, “Upu-upu to nupárentáiáꞌangkaiꞌ ina kipeuláꞌi, hai ina laoangkaiꞌ iumbá-umbá kanuhuoꞌángkiꞌ. 17 Noumbá kakipeuláꞌina párentána Musa, noꞌonoꞌ woꞌo kakipeuláꞌina párentámu. Kipembiáꞌ bona PUEꞌ Ala mamporángákoꞌ nodo woꞌo kamamporángáNa Musa. 18 Heáná peá to moewaꞌ kuasaꞌmu mepárentá hai tiꞌara mampehádingi laluitamu ina rahuku mate. Agáiáná hangaa-ngaa nupakaróhó hai nupatetidaꞌ lalumu.”