Iusupu mopakanótó kaheánána i halalunaheꞌ
45
Kanahádina Iusupu laluitana Iudá,
tiꞌara piꞌi nabuku motaha laluna i lindoꞌraꞌ topobágóꞌna,
onoꞌ miꞌi haneꞌi nahuoꞌheꞌ pohuꞌ hawiáꞌ-wiáꞌ hangko i lintuꞌ,
bona ia mopakanótó kaheánána i halalunaheꞌ.
2 Karooraꞌ topobágóꞌna mesuwuꞌ,
Iusupu teriaꞌ miꞌi napasimbuku,
álána rahádi toMásiriꞌ to araheꞌ i rawa lintuꞌ,
haneꞌi tebámbári haweꞌ-haweꞌ i támbi kadatuána Piraoꞌ.
3 Nauliꞌ Iusupu i halalunaheꞌ,
“Kódóꞌ miꞌi deꞌe Iusupu.
Toꞌu paꞌi tueꞌ mani umántaꞌ?”
I karahádina laluitana,
malááꞌ ntepuꞌuheꞌ halaluna hai tiꞌara rabuku mehániꞌ.
4 Onoꞌ miꞌi haneꞌi nauliꞌ Iusupu i halalunaheꞌ,
“Mengkahungkuꞌmokou mai.”
Mehungkukimoheꞌ halaluna,
hai nauliꞌ wopiꞌi,
“Kódóꞌ miꞌi deꞌe Iusupu halalumi to nipobaluꞌáheꞌ toMásiriꞌ hangkoia.
5 Ineeꞌntokou malááꞌ ba nahohoꞌ inaomi i kanipobaluꞌkuꞌ.
Katoꞌuána Pueꞌ Ala haduduáNa mohuoꞌaꞌ moioru hangko i kómu mai ieneꞌ,
bona mopatueꞌaꞌ tauna to handaꞌ.
6 Deꞌe-deꞌe hangko rompare tempó rimi,
hai lima mani parena tauna tiꞌaraheꞌ peisá mantudaꞌ-ntudaꞌ ba mepare.a
7 Ánti peundeꞌána Pueꞌ Ala,
Nahuoꞌmoꞌ mai moioru hangko i kómu.
Iti miꞌi to mewaliꞌ hambuaꞌ rárá bona peisáꞌaꞌ mokádipurákou hai mopatueꞌkou bona ara pemuleꞌámi to handaꞌ.
8 Mewaliꞌ tiꞌara ánti kanipobaluꞌkuꞌ haneꞌiaꞌ haweꞌ ieneꞌ,
agáiáná láwiꞌ iti miꞌi peundeꞌána Pueꞌ Ala.
Ia to mampopewaliꞌaꞌ sulewátána Piraoꞌ.
Naweꞌiaꞌ kuasaꞌ i támbi kadatuána Piraoꞌ hai i humalele tampoꞌ Másiriꞌ.
9 Deꞌe-deꞌe hawiáꞌmokou mesuleꞌ lao i umántaꞌ,
hai nipahaweꞌá laluitangkuꞌ to node:
Deꞌe miꞌi laluitana Iusupu,
ánáꞌmu.
‘Naweꞌiaꞌ Pueꞌ Ala kuasaꞌ i humalele tampoꞌ Másiriꞌ.
Kawiáꞌmokoꞌ mai mampohidupaꞌáꞌaꞌ ánáꞌmu.
10 Umaꞌ peisá toroꞌ i tampoꞌ Másiriꞌ i roboꞌ Gose,b
bona hungkuꞌ i kódóꞌ,
hingkakani hai ánáꞌmu hai ueꞌmuheꞌ,
dimbá,
bekeꞌ,
gapiꞌ hai hinángkáꞌna párewámu.
11 Ane umaꞌ toroꞌ miꞌi i roboꞌ Gose,
peisámokoꞌ kukádipurá,
láwiꞌ tempó rimi lima mani parena.
Ane tiꞌarai noꞌonoꞌ,
umaꞌ hantámbi hai upu-upu tauna to ara hingkakani hai kómu,
ina molámbiꞌkou kapári.’
12 Halalungkuꞌ,
deꞌe-deꞌe niꞌita mata haduduámi hai noꞌonoꞌ woꞌo io,
Benami;
kódóꞌ miꞌi deꞌe Iusupu to mampolaluitaꞌákou.
13 Nipahaweꞌá umántaꞌ,
noumbá kamakuasaꞌkuꞌ hai karabiláꞌkuꞌ ieneꞌ i tampoꞌ Másiriꞌ.
Nipolaluita hinángkáꞌna to niꞌita,
hai kawiáꞌ miꞌi mai niánti umántaꞌ ieneꞌ.”
14 Roo onoꞌ,
Iusupu mokápui miꞌi Benami ádina,
haneꞌi teriaꞌ.
Benami woꞌo teriaꞌ mokápui Iusupu.
15 Tangaꞌna mani teriaꞌ,
Iusupu mokápui upu-upu halaluna,
hai naꞌángkiheꞌ.
Roo onoꞌ,
mantepuꞌumoheꞌ molalaluita.
16 Kanahádina Piraoꞌ hai upu-upu tauna i támbina bámbári kahaweꞌraꞌ halaluna Iusupu,
góeꞌheꞌ woꞌo.
17 Nauliꞌ Piraoꞌ i Iusupu,
“Nuhángáꞌáꞌáheꞌ halalumu node:
‘Deꞌe miꞌi to hangaa-ngaa nibábehi.
Nikádipurá pare i kalidemi hai mesuleꞌkou lao i tampoꞌ Kánáꞌá.
18 Roo onoꞌ,
peisákou melimbá mai ieneꞌ hingkakani hai umámi hampoánáka.
Ina kuweꞌikou tampoꞌ to maruduꞌ ntepuꞌu ieneꞌ i tampoꞌ Másiriꞌ,
bona maroꞌa katueꞌmi.’
19 Hai nuhuoꞌheꞌ woꞌo moánti hangko ieneꞌ bahangapa kereta bona rapesaweꞌi toináraꞌ,
ánáꞌraꞌ to kókóiꞌ mani,
hai napesaweꞌi woꞌo umámu.
20 Ineeꞌntoheꞌ mampekiri párewáraꞌ to rapálehi,
láwiꞌ ina kuweꞌiheꞌ to maroꞌa ntepuꞌu i tampoꞌ Másiriꞌ.”
21 Ánáꞌnaheꞌ Iako mampeuláꞌi mpuꞌu miꞌi hawaꞌna Piraoꞌ iti.
Naweꞌimoheꞌ Iusupu bahangapa kereta hai bokuraꞌ i rárá hiolaꞌ hai apa to nauliꞌ Piraoꞌ.
22 Naweꞌiheꞌ woꞌo waruꞌraꞌ to mababe hadua-hadua,
agáiáná Benami naweꞌi dóiꞌ tálu átuna dóiꞌ peráꞌc hai waruꞌna to woꞌu lima tauna.
23 Napakatu woꞌo i umána hampuloꞌ báꞌána kalide to rapopoánti párewáraꞌ to maroꞌa hangko i tampoꞌ Másiriꞌ,
hai hampuloꞌ woꞌo kalide rapopoánti pare,
rótiꞌ,
hai pandeꞌ to ina rapoboku i polumaoána melimbá lao i tampoꞌ Másiriꞌ.
24 Timama miꞌi upu-upu inántiraꞌ,
napopeángkáꞌmoheꞌ Iusupu,
haneꞌiheꞌ nahángáꞌá,
“Ineeꞌkou mosisisalaꞌ i rárá!”
25 Mewaliꞌ pohuꞌ mpuꞌumoheꞌ hangko i tampoꞌ Másiriꞌ,
mesuleꞌheꞌ lao i tampoꞌ Kánáꞌá,
katoroꞌána Iako.
26 Kahaweꞌraꞌ,
rapolaluita miꞌi i umáraꞌ,
rauliꞌ,
“Umaꞌ,
Iusupu tueꞌ mani!
Ia tauna to makuasaꞌ i humalele tampoꞌ Másiriꞌ.”
Kanahádina bámbári iti,
napotingkáráꞌ Iako,
hai tiꞌara mani napoinálái.
27 Agáiáná roo rapolaluita upu-upu to mewaliꞌ i Iusupu,
hai napeita kereta to napakatu Iusupu to ina rapesaweꞌi lao i tampoꞌ Másiriꞌ,
hangko maróhó riꞌi laluna hai napoinálái.
28 Nauliꞌ Iako,
“Tueꞌ mani rikaa ánáꞌkuꞌ Iusupu!
Onoꞌ peá to kupoinao.
Hangaa-ngaa laoaꞌ mampeita hangko tiꞌara maniaꞌ mate.”