Painuána Iusupu matántá
44
Hangko ionoꞌ,
Iusupu mampohawaꞌá miꞌi tadulako topokádipurá támbina,
nauliꞌ,
“Nuóntóki iti karuꞌraꞌ hai pare,
sukáꞌ-sukáꞌna pebukuáraꞌ moánti,
hai dóiꞌraꞌ hadua-hadua nupusaꞌ huleꞌ i karuꞌraꞌ i wongko pareraꞌ.
2 Hai painuángkuꞌ to rabábehi hangko i peráꞌ,
nupusaꞌ woꞌo i lalu karuꞌna ádiraꞌ to toadi hingkakani hai dóiꞌ popehólóna pare.”
Topokádipurá támbina mampeuláꞌi mpuꞌu miꞌi hawaꞌ iti.
3 Kahalona mepulo-pulo,
halaluna Iusupu rapopeángkáꞌheꞌ hai kalideraꞌ.
4 Tiꞌara maniheꞌ karaoꞌ hangko i kótá,
nauliꞌ Iusupu i tadulako topokádipurá támbina,
“Nugagu nudápáꞌheꞌ.
Ane nulámbiꞌheꞌ,
nuhángáꞌáheꞌ,
‘Moapa riꞌi haneꞌi kamaroꞌana tuángkuꞌ niháwángi hai to kadake?
5 Moapa riꞌi haneꞌi nipanako painuá peráꞌ to napainui pueꞌkuꞌ hai napakeꞌ woꞌo mebao?a
Kómu mobábehikou to kadake to rumihi ntepuꞌu.’ ”
6 Kanalámbiꞌraꞌ topokádipurá iti halalunaheꞌ Iusupu,
napahaweꞌáheꞌ hintotoꞌ hai apa to nauliꞌ Iusupu.
7 Mehániꞌheꞌ,
“Apa tunggáiámu,
tuá?
Tiꞌaraꞌangkaiꞌ pebáiꞌ mobábehi to kadake to noꞌonoꞌ!
8 Nuisánto tuá,
mogalo riꞌi dóiꞌ to kihumba i lalu karuꞌkiꞌ,
kipopasuleꞌ miꞌi i hio.
Mewaliꞌ tiꞌara mesuaꞌ i akala ane mopanakoangkaiꞌ peráꞌ ba buláwá hangko i támbina sulewátána datu.
9 Ane hadua hangko i oloꞌkiꞌ rapolámbiꞌi párewá iti,
rángina miꞌi ia rahuku mate hai kaiꞌ upu-upu ina mewaliꞌangkaiꞌ hawiꞌmu tuá.”
10 Nauliꞌ to rahuoꞌ iti,
“Maroꞌa miꞌi,
agáiáná heáná peá to rapolámbiꞌi painuá iti,
bateꞌna ia to ina mewaliꞌ hawiꞌkuꞌ;
to ntániꞌna peisá miꞌi liliu mesuleꞌ.”
11 Ragagu-gagu miꞌi motáurá inántiraꞌ haneꞌi rabungkáhi karuꞌraꞌ hadua-hadua.
12 Roo onoꞌ,
topokádipurá támbina Iusupu mopáresáꞌ karuꞌraꞌ,
mantepuꞌu i karuꞌna to towutuꞌ duuꞌna haweꞌ i karuꞌna to toadi,
hai tongawaꞌ painuá iti ralámbiꞌ i karuꞌna Benami.
13 Wutuꞌnaheꞌ masusa ntepuꞌu laluraꞌ,
onoꞌ miꞌi haneꞌi mohepaꞌ-hepaꞌheꞌ waruꞌraꞌ.
Roo onoꞌ,
rapasawiꞌ miꞌi inántiraꞌ i kalideraꞌ,
haneꞌi mesuleꞌheꞌ huleꞌ upu-upu lao i kótá.
14 Kahaweꞌraꞌ Iudá hampohalaluá i támbina Iusupu,
rahumba mani Iusupu ionoꞌ,
mewaliꞌ mopalumbáheꞌ i bitina.
15 Nauliꞌ Iusupu,
“Moapa riꞌi haneꞌi noꞌonoꞌ bábehiámi?
Tiꞌara paꞌi niꞌisá tauna to nodo kódóꞌ peisá mebao?”
16 Mehániꞌ Iudá,
“Apa mani paꞌi to hangaa-ngaa kiuliꞌ,
tuá?
Tiꞌara piꞌi ara rárá to mopatongawaꞌ noumbá kamanótóngkiꞌ.
Pueꞌ Ala mopatongawaꞌ miꞌi kamasalaꞌkiꞌ.
Deꞌe-deꞌe kaiꞌ upu-upu mewaliꞌmongkaiꞌ hawiꞌmu,
tiꞌara peá to rapolámbiꞌi painuá iti.”
17 Agáiáná nauliꞌ Iusupu,
“Tiꞌara noꞌonoꞌ tunggáiángkuꞌ!
Bateꞌna peá to rapolámbiꞌi painuángkuꞌ iti,
ia to ina kupohawiꞌ.
To ntániꞌna,
peisákou mesuleꞌ i umámi.”
Iudá mampeámpárái Benami
18 Roo onoꞌ,
Iudá mohungkuki Iusupu,
nauliꞌ,
“Tuá,
membiáꞌaꞌ ámpu.
Ane nupomaroꞌai,
ina molaluita maniaꞌ i tuángkuꞌ.
Ineeꞌ wongkódóꞌá nukabukoꞌi,
kehapiꞌ tuángkuꞌ hibali hai Piraoꞌ.
19 Tuá,
iaꞌo nukuneꞌangkaiꞌ,
‘Babilaꞌ ara mani umámi hai halalumi to ntániꞌna?’
20 Mehániꞌangkaiꞌ,
‘Umángkiꞌ ara mani,
agáiáná matoama miꞌi,
hai i kamatoamaꞌána miꞌi,
hangko mesupaꞌ riꞌi ádingkiꞌ.
Wutuꞌna ádingkiꞌ to hangina-nginaheꞌ mate miꞌi,
mewaliꞌ deꞌe-deꞌe bateꞌna rái ia haduduána to tueꞌ.
Onoꞌ miꞌi haneꞌi napomahile ntepuꞌu umángkiꞌ.’
21 Hangko ionoꞌ tuá,
nupehawaꞌiá bona kiánti mai ádingkiꞌ bona nuita,
22 haneꞌi mehániꞌangkaiꞌ,
‘Ádingkiꞌ iti tiꞌara mpuꞌu peisá mampogááka umána,
láwiꞌ ane mampogááka umána,
umaꞌ ina mate.’
23 Agáiáná nauliꞌ wopiꞌi tuá i kaiꞌ,
‘Tiꞌarakou peisá mai i lindoꞌkuꞌ ane ádimi tiꞌara mai niánti.’
24 Pesuleꞌkiꞌ haweꞌ i umaꞌ,
kipahaweꞌá miꞌi laluitamu,
tuá.
25 Hangko ionoꞌ,
nahuoꞌ wopangkaiꞌ mai mohóló pare.
26 Agáiáná mehániꞌangkaiꞌ,
‘Tiꞌaraꞌangkaiꞌ peisá molindoꞌ sulewátána datu ane ádingkiꞌ to toadi tiꞌara kiánti.
Peisáꞌangkaiꞌ lao ane ádingkiꞌ kiánti woꞌo.’
27 Roo onoꞌ,
nauliꞌ umángkiꞌ,
‘Niꞌisánto toinángkuꞌ Raheli rodua peá ánáꞌna.
28 Towutuꞌ mopálehimoꞌ.
Bateꞌna ia mate miꞌi nahakaꞌ singá,
láwiꞌ duuꞌna deꞌe-deꞌe tiꞌara piꞌi kuita.
29 Ane niala wopiꞌi ádimi to toadi deꞌe hangko i kódóꞌ,
hai ina ara wopiꞌi to mewaliꞌ i hia,
kapári to nibábehiáꞌaꞌ iti ina mopakawiáꞌ kamatengkuꞌ láwiꞌ deꞌe-deꞌe matoamamoꞌ!’
30-31 Tuá,
onoꞌ miꞌi haneꞌi,
ane mesuleꞌangkaiꞌ i umángkiꞌ hai tiꞌaraꞌangkaiꞌ mampohingkakaniá ádingkiꞌ deꞌe,
manótó miꞌi kaꞌina matena miꞌi umángkiꞌ.
Katueꞌna umángkiꞌ bateꞌna mentóáꞌ i ánáꞌna deꞌe,
hai ia matoama ntepuꞌu miꞌi,
mewaliꞌ kapári to kibábehi ina moánti kamatena umángkiꞌ.
32 Agáiáná kódóꞌ hawiꞌmu,
modándimoꞌ i umángkuꞌ,
ina kupohurunga katueꞌna ánáꞌna deꞌe.
Kupolaluita i umaꞌ,
ane tiꞌarai kuánti ánángkóiꞌ iti mesuleꞌ i hia,
kódóꞌ ina mampohurunga duuꞌkuꞌ mate.
33 Mewaliꞌ kupembiáꞌ i tuá,
rángina miꞌi kódóꞌ deꞌe nupohawiꞌ mopaháwángi ádingkiꞌ iti,
bona ia mesuleꞌ peá hingkakani hai wutuꞌnaheꞌ.
34 Tiꞌara kubuku mesuleꞌ i umángkiꞌ,
hai tiꞌaraꞌaꞌ pebáiꞌ moita kapári to ina morampe umángkiꞌ,
ane ádingkiꞌ deꞌe tiꞌara piꞌi kiánti.”