Wutuꞌna Iusupu lao wopaheꞌ i tampoꞌ Másiriꞌ moánti Benami
43
Kamarimi i tampoꞌ Kánáꞌá rumihi ntepuꞌu,
2 hai pare to lao rahóló i tampoꞌ Másiriꞌ upu miꞌi.
Onoꞌ miꞌi haneꞌi nauliꞌ Iako i ánáꞌnaheꞌ,
“Lao wopakou i tampoꞌ Másiriꞌ,
mohóló pare bona ara pandeꞌtaꞌ.”
3 Agáiáná nauliꞌ Iudáa i umána,
“Napaingáꞌi mpiiꞌangkaiꞌ sulewátána datu i Másiriꞌ,
tiꞌaraꞌangkaiꞌ peisá haweꞌ i hia ane Benami tiꞌara kiánti.
4 Ane nupaliu iti ádingkiꞌ kiánti,
hangko laoraꞌangkaiꞌ mohóló pandeꞌtaꞌ,
5 agáiáná ane tiꞌara nupaliu,
tiꞌaraꞌangkaiꞌ lao,
láwiꞌ roo miꞌi nauliꞌ sulewátána datu,
tiꞌaraꞌangkaiꞌ peisá lao i hia ane ádingkiꞌ tiꞌara kiánti.”
6 Nauliꞌ Iako,
“Moapa riꞌi haneꞌi nipakasusa gagaꞌaꞌ?
Moapa riꞌi haneꞌi nihángáꞌá tauna iti kaꞌárána mani ádimi?”
7 Hadua hangko i oloꞌraꞌ mehániꞌ,
nauliꞌ,
“Tauna iti napetámpáꞌ ntepuꞌu kana i kaiꞌ hampohalaluá,
napekuneꞌ,
‘Tueꞌ mani paꞌi umámi?’
Napekuneꞌ wopiꞌi,
‘Babilaꞌ ara mani ádimi tobaleilo to ntániꞌna?’
Onoꞌ miꞌi haneꞌi kihániki peá upu-upu pekuneꞌna.
Tiꞌara ara i pekiringkiꞌ ina nahuoꞌangkaiꞌ moánti iti ádingkiꞌ i hia.”
8 Roo onoꞌ,
nauliꞌ Iudá i umáraꞌ,
“Nupaliu miꞌi ádingkiꞌ iti kiánti bona poloꞌangkaiꞌ pohuꞌ,
bona tiꞌara ara i oloꞌtaꞌ to mate holo,
maroꞌa kaiꞌ hai io umaꞌ,
hai upu-upu ánáꞌkiꞌ.
9 Kódóꞌ miꞌi to ina mampohurunga katueꞌna Benami.
Ane tiꞌara mai kuánti huleꞌ i umaꞌ,
peisá nupeliꞌ i kódóꞌ hai kupohárárá duuꞌkuꞌ mate.
10 Ane kepoloꞌangkaiꞌ nupaliu,
kemesuleꞌmongkaiꞌ mai karongkánina.”
11 Nahániki umáraꞌ,
“Ane noꞌonoꞌi,
hangaa-ngaa niánti woꞌo apa porasiꞌántaꞌ to maroꞌa ntepuꞌu hangko i tampoꞌ deꞌe.
Nipusaꞌ i karuꞌmi,
napopedupaꞌ sulewátána datu;
nodo balasee,
tináháꞌ,
huloꞌ,
rampaꞌ-rampaꞌ to masuliꞌ,
beꞌau hai wuaꞌ halekaꞌ to matamaꞌ raꞌandeꞌ.
12 Niánti woꞌo dóiꞌ rongkani kahandaꞌna hangko i dóiꞌ to niánti rungu-runguna.
Babilaꞌ ánti kakakiꞌraꞌ haneꞌi dóiꞌ iti ara i lalu karuꞌmi,
hai hangaa-ngaa nipopesuleꞌ.
13 Niánti woꞌo ádimi hai hawiáꞌmokou mesuleꞌ lao i tauna iti.
14 Tapembiáꞌ i Pueꞌ Ala to Makuasaꞌ bona sulewátána datu iti maꞌahiꞌ i kómu,
hai mampopesuleꞌ Benami hai Simeoꞌ.
Dekódóꞌ,
ane matántámoheꞌ ánáꞌkuꞌ,
tapanoumbá paꞌi!”
15 Hangko ionoꞌ,
halalunaheꞌ Iusupu pohuꞌmoheꞌ lao i tampoꞌ Másiriꞌ.
I kapohuꞌraꞌ iti,
moántiheꞌ Benami,
pedupaꞌ hai dóiꞌ rongkani kahandaꞌna hangko i rungu-runguna.
Kahaweꞌraꞌ ionoꞌ,
laoheꞌ mampombelámbiꞌá Iusupu.
16 Kanaitána Iusupu haweꞌ miꞌi Benami hingkakani hai halalunaheꞌ,
napohawaꞌá tadulako topokádipurá támbina,
nauliꞌ,
“Nuántiheꞌ tauna iti lao i támbingkuꞌ,
nusambale hambaꞌa binataꞌ,
nuꞌundá hai nupatimama maroꞌa,
láwiꞌ ina mandeꞌangkaiꞌ hingkakani dekalialo.”
17 Topokádipurá támbi iti mopatimama mpuꞌu miꞌi apa to rahawaꞌá,
hai halalunaheꞌ Iusupu naꞌánti lao i támbi.
18 I karaꞌántiraꞌ lao i támbina Iusupu,
malááꞌmoheꞌ halaluna haneꞌi rauliꞌ,
“Moapa riꞌi haneꞌi raꞌántikeꞌ ieneꞌ?
Babilaꞌ mokana i dóiꞌ to tahumba i karuꞌtaꞌ kamaintaꞌ rungu-runguna.
Ina nahakaꞌkeꞌ,
naꞌala kalidentaꞌ hai napohawiꞌkeꞌ.”
19 Onoꞌ miꞌi haneꞌi,
kahaweꞌraꞌ miꞌi i babaꞌ támbina Iusupu,
rapolaluita i tadulako topokádipurá támbi,
20 rauliꞌ,
“Membiáꞌangkaiꞌ ámpu,
láwiꞌ hangkoia hangkanimongkaiꞌ mai mohóló pare,
21-22 agáiáná i tempóngkiꞌ mesuleꞌ,
i kahambengiángkiꞌ,
mobungkáhiangkaiꞌ karuꞌkiꞌ hadua-hadua.
Kipotingkáráꞌ láwiꞌ dóiꞌ popehólóngkiꞌ pare aranto i karuꞌ i wongko pare,
hai tiꞌara kiꞌisá kaheánána to mamboli.
Dóiꞌ iti kiánti mpasuleꞌ mai hai dóiꞌ to ina kipopehóló wopiꞌi pare.”
23 Nauliꞌ topokádipurá támbi,
“Nipatinda peá lalumi.
Ineeꞌntokou malááꞌ.
Pueꞌ Ala to nipenómbái hai to napenómbái umámi,
Ia miꞌi to mampoweꞌikou dóiꞌ iti i karuꞌmi.
Hólóna pare to niánti mai iaꞌo,
kutarima miꞌi.”
Hangko ionoꞌ,
ia moánti miꞌi Simeoꞌ lao i hira,
24 haneꞌi naꞌántiheꞌ mesuaꞌ i lalu támbina Iusupu.
Naweꞌiheꞌ uwai rapopobahoꞌi bitiraꞌ,
hai napehuoꞌá bona kalideraꞌ rapopandeꞌheꞌ woꞌo.
25 Roomoheꞌ napopaisáꞌá kaꞌina mandeꞌraꞌ hingkakani hai Iusupu,
mopatimamamoheꞌ popedupaꞌraꞌ to ina rahuhuꞌ i Iusupu kalialo iti.
26 Kahaweꞌna Iusupu i támbina iti,
rahuhuꞌá popedupaꞌraꞌ haneꞌi molingkuduheꞌ motóngkóꞌ i bitina.
27 Napekuneꞌ miꞌi Iusupu,
nauliꞌ,
“Maroꞌa-roꞌantokou?”
haneꞌi mekuneꞌ wopiꞌi,
“Iaꞌo,
nipolaluita i kódóꞌ kana i umámi to matinuwuꞌ miꞌi.
Noumbá bámbárina deꞌe-deꞌe?
Ba ara mani?”
28 Mehániꞌheꞌ,
“Ara mani,
tuá.
Umángkiꞌ to mobiláꞌkoꞌ maroꞌa-roꞌanto,”
hai molingkudu wopaheꞌ motóngkóꞌ i bitina Iusupu tandaꞌ pebiláꞌraꞌ.
29 Kanaitána Iusupu Benami ádina to hangina-nginaheꞌ,
napekuneꞌ,
“Ba demiꞌe ádimi to toadi to nipolaluita miꞌi i kódóꞌ?”
haneꞌi molaluita i Benami,
“Tapembiáꞌ bona Pueꞌ Ala mowátiꞌkoꞌ.”
30 Rumihi kamabilana Iusupu hai rumihi woꞌo kamaꞌahiꞌna i ádina iti.
Ánti katiꞌárána piꞌi nabuku motaha kamabilana,
manggagu miꞌi mesuaꞌ i lintuꞌna haneꞌi teriaꞌ.
31 Roo onoꞌ,
nabahoꞌi lindoꞌna haneꞌi mesuwuꞌ,
hai nahuoꞌ hawiꞌna mopatimama pandeꞌraꞌ.
32 Iusupu tepataniꞌ mejá pandeꞌána.
Halaluna mandeꞌheꞌ i hambuaꞌ mejá,
hai toMásiriꞌ mandeꞌheꞌ woꞌo i mejá ntániꞌna,
láwiꞌ rapokatidiꞌ toMásiriꞌ ane mandeꞌheꞌ hingkakani hai toIberani.b
33 Halaluna Iusupu rakádipuráheꞌ i hambuaꞌ mejá to mombelindoꞌ hai mejána Iusupu.
Rapopehodamoheꞌ mouláꞌ pombeusu-usuána tinuwuꞌraꞌ mantepuꞌu i to towutuꞌ haweꞌ i to toadi.
Karaitána peá pombeusu-usuána pehodaraꞌ,
mombetótóiheꞌ hadua hai hadua láwiꞌ wuliheꞌ.
34 Hira raróráheꞌ hangko i mejána Iusupu,
hai rórána Benami lima kánina kahandaꞌna hangko i róráraꞌ wutuꞌna.
Mandeꞌ hai mainuheꞌ hingkakani hai Iusupu i kagóeꞌ-góeꞌ.