Iusupu hai halalunaheꞌ
37
Iako toroꞌ i tampoꞌ Kánáꞌá,
katoroꞌána umána.
2 Deꞌe miꞌi daritakáná pemuleꞌána Iako.
Tempóna tinuwuꞌna Iusupu hampuloꞌ miꞌi hai pitu parena,
biásá miꞌi woꞌo mampoewu bekeꞌ hai dimbána umána hingkakani hai wutuꞌnaheꞌ,
ánáꞌraꞌ Biláꞌ hai Silipa to nakaroduaheꞌ Iako.
Iusupu lao mampehángáꞌá kakadakena bábehiáraꞌ wutuꞌnaheꞌ iti i umána.
3 Iusupu napomahile ntepuꞌu Iakoa hangko i halalunaheꞌ,
láwiꞌ ia rapoánáka i katoámána miꞌi.
Onoꞌ miꞌi haneꞌi hangkani tempó,
rapandauá hantau badu to mababe.
4 Karaitána halaluna ia to napomahile umáraꞌ melumbuꞌ mani hangko i hira,
onoꞌ haneꞌi mantepuꞌumoheꞌ mokáhihiꞌ Iusupu,
hai tiꞌara piꞌi maroꞌa polaluitaraꞌ i hia.
5 Hangkani tempó,
Iusupu mampaturuá,
hai paturuna iti natuntuáheꞌ halaluna,
onoꞌ haneꞌi tetámbái miꞌi karakáhihiꞌna.
6 Nauliꞌ node:
“Nipehádingi.
Ina kutuntuákou paturungkuꞌ!
7 Mampaturuáꞌaꞌ kitaꞌ deꞌe upu-upu tangaꞌtaꞌ i hinoe,
mobáhá pare.
Iaperái kuita parengkuꞌ meángkáꞌ tindáꞌ i tangaꞌ,
hai paremi motolelingi motóngkóꞌ i parengkuꞌ iti.”
8 Rauliꞌ halaluna,
“Ba nupoinao paꞌi ina mewaliꞌ datu to makuasaꞌ i kaiꞌ?”
Ánti potuntuna paturuna,
tetámbái wopiꞌi karakáhihiꞌna halalunaheꞌ.
9 Hangkani mampaturuá wopiꞌi Iusupu hai natuntuá wopaheꞌ halaluna,
nauliꞌ,
“Kódóꞌ mampaturuá wopaꞌaꞌ.
Kuita alo,
wulá hai betue hampuloꞌ hai hambuaꞌ motóngkóꞌheꞌ i kódóꞌ.”
10 Paturuna iti natuntu woꞌo i umána,
onoꞌ miꞌi haneꞌi nakámbáróá umána,
nauliꞌ,
“Paturu apa to noꞌonoꞌ?
Ba nupoinao paꞌi,
kódóꞌ,
inámu hai halalumuheꞌ ina motóngkóꞌangkaiꞌ i hio?”
11 Kóiꞌ ntepuꞌu inaoraꞌ halaluna,
agáiáná umáraꞌ mopailalu peá paturuna Iusupu iti.
Iusupu rapobaluꞌ hai raꞌánti lao i tampoꞌ Másiriꞌ
12 Hangkani tempó,
wutuꞌna Iusupu laoheꞌ moewu bekeꞌ hai dimbána umáraꞌ hungkuꞌ i kótá Sikeꞌ.
13 Nauliꞌ Iako i Iusupu,
“Wutuꞌmu moewuheꞌ bekeꞌ hai dimbá hungkuꞌ i Sikeꞌ.
Pohuꞌmokoꞌ lao i hira.”
Mehániꞌ Iusupu,
“Noꞌonoꞌ miꞌi,
umaꞌ.
Ina laoaꞌ.”
14 Nauliꞌ umána,
“Laomokoꞌ mampeita wutuꞌmuheꞌ,
bekeꞌraꞌ hai dimbáraꞌ.
Roo onoꞌ,
mesuleꞌkoꞌ mai nupahaweꞌáꞌaꞌ banoumbáheꞌ.”
Onoꞌ miꞌi haneꞌi Iusupu pohuꞌ hangko i lembo Hebero.
Tiꞌara marue polumaona,
haweꞌ miꞌi Iusupu i Sikeꞌ.
15 Tangaꞌna molumao i pádá ngkálu soꞌu ngkálu mai mampeliꞌ kaꞌaraꞌáraꞌ wutuꞌna,
ia mampohidupaꞌá hadua tobaleilo,
hai tobaleilo iti mekuneꞌ i hia,
“Apa riꞌi to nupeliꞌ?”
16 Mehániꞌ Iusupu,
“Wutuꞌkuꞌ maiheꞌ moewu bekeꞌ hai dimbá ieneꞌ.
Babilaꞌ nuisá iumbá kaꞌaraꞌáraꞌ?”
17 Nauliꞌ tauna iti,
“Tiꞌarapoheꞌ ieneꞌ.
Kuhádi rauliꞌ ina laoheꞌ i wánuá Dota.”
Onoꞌ haneꞌi pohuꞌ miꞌi Iusupu motutuháheꞌ wutuꞌna,
hai nalámbiꞌ mpuꞌuheꞌ i Dota.
18 Karaoꞌ mani Iusupu,
raitaheꞌ halaluna,
hai hangko tiꞌara mani teduuꞌ i hira,
raliwo miꞌi ina rapapate.
19 Molaluitaheꞌ hadua hai hadua,
rauliꞌ,
“Peita,
louꞌ miꞌ maiꞌo to paka mampaturuá.
20 Rángina miꞌi tapapate,
hai wátána tanawoꞌ i lalu tibubuꞌ haneꞌi tapahaweꞌ i umántaꞌ kamatena miꞌi nahakaꞌ singá.
Tapeita mpuꞌu dupaꞌna paturuna.”
21 Poliworaꞌ iti nahádi Rube,
onoꞌ miꞌi haneꞌi napeliꞌ rárá ina mopatueꞌ Iusupu.
Nahángáꞌáꞌáheꞌ,
“Ineeꞌ woia tapapate.
22 Tanawoꞌ peá i lalu tibubuꞌ i pádá loriꞌ deꞌe,
agáiáná ineeꞌ tapahái ba tabelái wátána.”
Tunggáiána Rube bona mampelae Iusupu hai moánti huleꞌ i umáraꞌ.
23 Kahaweꞌna Iusupu i hira,
liu-liu rahakaꞌ hai ralosui baduna to mababe,
24 haneꞌi radiiꞌ soso lao ranawoꞌ i lalu tibubuꞌ to maꞌáti.
25 Roo onoꞌ,
mehodaheꞌ mandeꞌ.
Tangaꞌraꞌ mandeꞌ,
iaperái raita handaꞌ topadangkaꞌ toSumaila hangko i tampoꞌ Gileaꞌ to ina lao i tampoꞌ Másiriꞌ.
Untáraꞌ rapopatekei huloꞌ,
balasee hai mire.b
26 Nauliꞌ Iudá i halalunaheꞌ,
“Apa miꞌi bunduꞌna ane ádintaꞌ tapapate hai tawuniángi?
27 Rángina miꞌi tapobaluꞌ i toSumaila.
Ineeꞌ woia tapopeahiahiꞌ láwiꞌ ia woꞌo toꞌu-toꞌu ádintaꞌ.”
Rapokana mpuꞌu miꞌi halalunaheꞌ polaluitana iti.
28 I tempó iti,
melempóheꞌ topadangkaꞌ toMidia,c
hai Iusupu raoreꞌ miꞌi hangko i lalu tibubuꞌ,
haneꞌi rapobaluꞌ i toSumaila hai hólóna rompuloꞌ dóiꞌ peráꞌ.
Roo onoꞌ,
raꞌánti miꞌi lao i tampoꞌ Másiriꞌ.
29 Bábehiáraꞌ iti tiꞌara naisá Rube.
I pesuleꞌna,
ia lao mampetiro tibubuꞌ.
Iusupu tiꞌara piꞌi ara i lalu!
Onoꞌ miꞌi haneꞌi Rube mohepaꞌ-hepaꞌ waruꞌna ánti kamasusana laluna.
30 Hangko ionoꞌ,
mesuleꞌ miꞌi Rube i ádinaheꞌ haneꞌi nauliꞌ,
“Iusupu tiꞌara piꞌi ara i lalu tibubuꞌ!
Apa miꞌi to hangaa-ngaa kubábehi deꞌe-deꞌe?”
31 Hangko ionoꞌ,
rasambale miꞌi hambaꞌa bekeꞌ,
haneꞌi rahóngkó waheꞌna rapoemei baduna Iusupu.
32 Roo onoꞌ,
badu to mababe to piriꞌ miꞌi waheꞌ raꞌánti lao i umáraꞌ hai rapahaweꞌ,
“Badu deꞌe kihumba.
Tapáresáꞌ sieruꞌ umaꞌ,
babilaꞌ badunantoi Iusupu ánáꞌmu?”
33 Iako moisá ntepuꞌu badu iti,
haneꞌi nauliꞌ,
“Toꞌu,
deꞌe baduna ánáꞌkuꞌ!
Tongawaꞌ ánáꞌkuꞌ nahakaꞌ miꞌi singá haneꞌi nahepaꞌ-hepaꞌ.”
34 Iako liu-liu mohepaꞌ-hepaꞌ waruꞌna ánti kamasusana laluna,
hai roo onoꞌ napakeꞌ miꞌi waruꞌ hangko i karuꞌ.d
Marue ntepuꞌu Iako motatangi ánáꞌna.
35 Upu-upu ánáꞌna tobaleilo hai towawine mampehukáꞌ mopalindó umáraꞌ,
agáiáná tiꞌara mau rapalindó.
Nauliꞌ riꞌi,
“Ina kutatangi oaꞌ ánáꞌkuꞌ duuꞌkuꞌ mate,
hai ina hidupaꞌ wopangkaiꞌ i katoroꞌá tomate.”
Noꞌonoꞌ mpuꞌu miꞌi Iusupu natatangi umána.
36 Kahaweꞌraꞌ toMidia i tampoꞌ Másiriꞌ,
Iusupu rapobaluꞌ wopiꞌi i Potipa,
tadulakoraꞌ topokámpái támbi kadatuána Piraoꞌ.