Iudá hai Tama
38
I tempó iti,
Iudá mopálehi halalunaheꞌ lao toroꞌ hingkakani hai hadua tobaleilo to rahangaꞌ Hira hangko i kótá Adulá.
2 Ionoꞌ,
Iudá mombeisá hai hadua ánáꞌntawine toKánáꞌá,
ánáꞌna Sua,
hai kahópóꞌána napotoina.
3 I pohambokoraꞌ iti,
moánáꞌheꞌ tálu ánángkóiꞌ tobaleilo.
Iudá mohangaꞌ ánáꞌraꞌ towutuꞌ Ereꞌ.
4 Ináraꞌ mohangaꞌ ánáꞌraꞌ to kaduá Ona,
5 hai to katálu Sela.
I karapoánákana ánáꞌraꞌ to katálu iti,
toroꞌheꞌ i Kesiꞌ.
6 Mahile miꞌi Ereꞌ ánáꞌna to towutuꞌ,
napopohamboko miꞌi Iudá hai hadua towawine to rahangaꞌ Tama.
7 Agáiáná bábehiána Ereꞌ kadake ntepuꞌu i peitána PUEꞌ,
onoꞌ miꞌi haneꞌi Nahuku mate.
8 Tiꞌara marue hangko ionoꞌ,
molaluita miꞌi Iudá i Ona ádina Ereꞌ,
nauliꞌ,
“Laomokoꞌ i bembaꞌna wutuꞌmu hai nupoiluhi.
Nubukeki miꞌi apa to hintotoꞌ mouláꞌ ádántaꞌ,
láwiꞌ io ádinakoꞌ toámána.
Ane nubábehi noꞌonoꞌ,
ina ara pemuleꞌána wutuꞌmu.”a
9 Agáiáná naisá miꞌi Ona,
ane moánáꞌheꞌ,
ánáꞌraꞌ iti tiꞌara ina rarekeꞌ ánáꞌna haduduána agáiáná ánáꞌna riꞌi wutuꞌna.
Onoꞌ miꞌi haneꞌi i pampoiluhina bembaꞌna wutuꞌna,
hameꞌna nabubuha peá i rawa bona tiꞌaraheꞌ moánáꞌ.
10 Bábehiána iti mopaꞌara kamabukoꞌna PUEꞌ,
onoꞌ miꞌi haneꞌi napapate woꞌo PUEꞌ.
11 Hangko ionoꞌ,
molaluita miꞌi Iudá i Tama mániána,
nauliꞌ,
“Mesuleꞌmokoꞌ sieruꞌ i támbina tosaemu,
hai toroꞌmokoꞌ ionoꞌ.
Nukámpái kabembaꞌmu duuꞌna manginao miꞌi Sela ánáꞌkuꞌ.”
Agáiáná tiꞌara riꞌi iti to natunggái Iudá,
láwiꞌ malááꞌ,
ineeꞌ paꞌi Sela ina napapate woꞌo Pueꞌ Ala nodo to mewaliꞌ miꞌi i wutuꞌna to rodua.
Mewaliꞌ mesuleꞌ mpuꞌu miꞌi Tama lao i támbina tosaena.
12 Liu miꞌi bahangapai parena,
toinána Iudá mate miꞌi.
Hópóꞌ miꞌi kamapepeꞌna hulena,
pohuꞌmoheꞌ Iudá hai balena Hira toAdulá iti,
ina laoheꞌ i wánuá Timina,
pogundiꞌána wuluraꞌ dimbá.
13 I tempó iti,
nahádi miꞌi Tama bámbári kalaona Iudá pengántiꞌina i Timina bona mogundiꞌ wuluraꞌ dimbána.
14 Nauliꞌ i laluna,
“Manginao miꞌi Sela ánáꞌna Iudá to toadi,
agáiáná haweꞌ deꞌe-deꞌe tiꞌara mani rapopohamboko hai kódóꞌ.”
Onoꞌ miꞌi haneꞌi waruꞌ kabembaꞌna napaháwángi,
metótóku natuko lindoꞌna hai bóbó,
hai mehoda i babaꞌá bente wánuá Enai i wiwi rárá to lao i Timina.
15 I kanaitána Iudá iti Tama,
nauliꞌ ripaꞌi towawine to mampobaluꞌ wátána,
láwiꞌ metótóku motuko lindoꞌna.
16 Nahungkuki miꞌi Iudá towawine to i wiwi rárá iti haneꞌi napembiáꞌ bona moiluhiheꞌ.
Tiꞌara naisá Iudá towawine iti mániánanto.
Mehániꞌ Tama,
“Apa to ina nuweꞌiaꞌ ane moiluhikeꞌ?”
17 Nauliꞌ Iudá,
“Ina kupakatuákoꞌ hambaꞌa bekeꞌ to maleheꞌ mani.”
Mehániꞌ Tama,
“Peisánto,
asalaꞌ ara hampaiꞌ to kutibaaꞌ mewaliꞌ pentitadaꞌángkuꞌ hangko tiꞌara mani kulámbiꞌ bekeꞌ to ina nupakatuꞌáꞌaꞌ.”
18 Napekuneꞌ Iudá,
“Pentitadaꞌá apa to nupembiáꞌ?”
Mehániꞌ Tama,
“Nuweꞌiaꞌ petandaꞌimu hante bárárána,
hai laiꞌmu to nutibaaꞌ.”
Naweꞌi mpuꞌu miꞌi Iudá upu-upu to napembiáꞌ iti,
haneꞌi moiluhiheꞌ.
Onoꞌ haneꞌi káláꞌeá Tama.
19 Pesuleꞌna i támbina,
nabungkáhi miꞌi tótókuna,
haneꞌi napakeꞌ wopiꞌi waruꞌ kabembaꞌna.
20 Tiꞌara marue hangko ionoꞌ,
Iudá mohuoꞌ Hira balena lao i wánuá Enai moánti bekeꞌ to maleheꞌ mani,
hai membiáꞌ bona towawine iti mampopasuleꞌ pentitadaꞌána,
agáiáná towawine iti tiꞌara nalámbiꞌ Hira.
21 Napekuneꞌ Hira i tauna to toroꞌ ionoꞌ,
“Iumbá miꞌi towawine to motobaleilo deleꞌ to paka mepegiá i wiwi rárá deꞌe?”
Mehániꞌheꞌ,
“Tiꞌara ara towawine to noꞌonoꞌ ieneꞌ.”
22 Roo onoꞌ,
mesuleꞌ miꞌi Hira i Iudá,
nauliꞌ,
“Tiꞌara kulámbiꞌ towawine iti.
Mouláꞌ toEnai,
tiꞌara ara towawine to motobaleilo deleꞌ to paka mepegiá ionoꞌ.”
23 Kanahádina peá Iudá laluitana,
nauliꞌ,
“Tiꞌaranto moapa ane i hia miꞌi párewángkuꞌ to natibaaꞌáꞌaꞌ,
bona tiꞌarakeꞌ mahili mampeliꞌ wopiꞌi,
láwiꞌ kupári-pári miꞌi kubaiari,
agáiáná tiꞌara nulámbiꞌ towawine iti.”
24 Tálu miꞌi wulána hangko ionoꞌ,
nahádi miꞌi Iudá bámbárina Tama mániána mebuálósib haneꞌi káláꞌeá miꞌi.
Onoꞌ miꞌi haneꞌi nauliꞌ Iudá,
“Lao mai niala towawine iti bona raintu duuꞌna mate.”
25 Tangaꞌna Tama raꞌánti i rawa,
napakatu miꞌi pembiáꞌna i pengántiꞌina,
nauliꞌ,
“Kódóꞌ napakáláꞌeáꞌaꞌ pueꞌna párewá deꞌe.
Nipáresáꞌ sieruꞌ,
ba heánái pueꞌna petandaꞌi to ara bárárána hai laiꞌ deꞌe.”
26 Kanaisána Iudá iti miꞌi párewána,
nauliꞌ,
“Towawine iti tiꞌara masalaꞌ.
Melumbuꞌ mani kamanótóna hangko i kamanótóngkuꞌ,
láwiꞌ tiꞌara kupabukeki apa to hintotoꞌ mouláꞌ ádántaꞌ.
Katoꞌuána,
ia hangaa-ngaa kupopohambokoheꞌ hai Sela ánáꞌkuꞌ,
agáiáná tiꞌara iti to kubábehi.”
Hangko ionoꞌ,
Iudá tiꞌara piꞌi mampoiluhi Tama.
27 Tempóna Tama ina moánáꞌ,
tongawaꞌ miꞌi ánáꞌna moropaꞌ.
28 Tangaꞌna moánáꞌ,
hadua hangko i ánángkóiꞌ to moropaꞌ iti mampopesuwuꞌ miꞌi taena hambali,
haneꞌi sando motibaaꞌ taena hai napopatakaꞌi lero to malei ntepuꞌu,
nauliꞌ,
“Ánángkóiꞌ deꞌe to mesupaꞌ ioru.”
29 Agáiáná ánángkóiꞌ iti modiiꞌ peá huleꞌ taena,
hai to haduána riꞌi to mesupaꞌ ioru.
Hangko ionoꞌ,
nauliꞌ sando,
“Noꞌonoꞌ riꞌi rárámu mopári-párikoꞌ mesuwuꞌ mampehindorungi halalumu.”
Ánángkóiꞌ to mesupaꞌ ioru rahangaꞌ Peresi,
lempóna:
“mopári-pári mesupaꞌ”.c
30 Hangko ionoꞌ,
mesupaꞌ miꞌi ádina to rapopatakaꞌi lero to malei i taena,
hai ia rahangaꞌ Sera,
lempóna:
“malei ntepuꞌu”.