Iako hai taunána mesuleꞌ lao i Beteli
35
Hangko ionoꞌ,
nauliꞌ Pueꞌ Ala i Iako,
“Mesuleꞌmokoꞌ lao i Beteli,
pampatongawaꞌáNgkuꞌ i hio i pelangkamu hangko i Esau wutuꞌmu.a
Toroꞌmokoꞌ ionoꞌ hai mobábehikoꞌ hambuaꞌ paintuá popenómbá i Kódóꞌ.”
2 Onoꞌ miꞌi haneꞌi Iako mampolaluitaꞌáheꞌ tinána hai upu-upu tauna to ara hingkakani hai ia,
nauliꞌ,
“Nitibe miꞌi upu-upu lenggeꞌ ánituraꞌ tauna to toroꞌ i tampoꞌ deꞌe.
Nipamagasaꞌ wátámi mouláꞌ ádá ágámántaꞌ,
hai nipaháwángi waruꞌmi.
3 Hangaa-ngaa nibábehi noꞌonoꞌ,
láwiꞌ ina laokeꞌ i Beteli.
Ionoꞌ kódóꞌ ina moaró hambuaꞌ paintuá popenómbá i Pueꞌ Ala.
Ia miꞌi to motulungiaꞌ i lalu kamapáringkuꞌ hai mamporángáꞌaꞌ iumbá-umbá peá kalaoángkuꞌ.”
4 Karahádina laluitana,
rapeweꞌi miꞌi i Iako upu-upu lenggeꞌ ánitu,
hai noꞌonoꞌ woꞌo daliraꞌ.
Upu-upu iti natawu Iako i wóiꞌ hampóꞌá kau to marumbu hungkuꞌ i kótá Sikeꞌ.
5 I kapohuꞌraꞌ Iako hai tinánaheꞌ,
Pueꞌ Ala mopaꞌara kamalááꞌ i upu-upu tauna to toroꞌ i wánuá-wánuá to hungkuꞌ ionoꞌ,
bona tiꞌaraheꞌ modápáꞌ ánáꞌnaheꞌ Iako.
6 Kahópóꞌána,
haweꞌmoheꞌ Iako hai upu-upu tauna to napohingkakaniá i tampoꞌ Kánáꞌá i kótá Beteli to rauliꞌ woꞌo Lusi.
7 Ionoꞌ Iako moaró miꞌi hambuaꞌ paintuá popenómbá haneꞌi nahangaꞌ El-Beteli lempóna,
“Pueꞌ Ala to ara i Beteli”,
láwiꞌ ionoꞌ miꞌi Pueꞌ Ala mampatongawaꞌ i Iako i pelangkana hangko i wutuꞌna.
8 Tempóraꞌ ionoꞌ,
Debora topopaꞌala Ribeka mate hai ratawu i wóiꞌ kau to marumbu hungkuꞌ i wánuá iti.
Onoꞌ miꞌi haneꞌi kau iti rahangaꞌ “Kau Petatangiá”.
Pueꞌ Ala mowátiꞌ Iako i Beteli
9 Kahaweꞌna miꞌi Iako i Beteli hangko i tampoꞌ Pádá-Árá,
Pueꞌ Ala mampatongawaꞌ wopiꞌi i hia,
haneꞌi Nawátiꞌ,
10 Nauliꞌ,
“Io tiꞌarapokoꞌ rahangaꞌ Iako,
agáiáná rahangaꞌmokoꞌ Sáráeliꞌ,”
lempóna:
“moewaꞌ Pueꞌ Ala”.b
Noꞌonoꞌ miꞌi Pueꞌ Ala mobáliki hangaꞌna Iako mewaliꞌ Sáráeliꞌ.
11 Roo onoꞌ,
nauliꞌ wopiꞌi Pueꞌ Ala,
“Kódóꞌ miꞌi Pueꞌ Ala to Makuasaꞌ.
Memuleꞌmokoꞌ duuꞌna handaꞌ pemuleꞌámu.
Hangko i pemuleꞌámu ina Kupopewaliꞌ hambuaꞌ kadatuá to mahile hai handaꞌ kadatuá ntániꞌna,
hai hangko i pemuleꞌámu,
handaꞌheꞌ woꞌo to ina mewaliꞌ datu.
12 Tampoꞌ deꞌe to Kuweꞌi miꞌi Burahima hai Isakiꞌ,
ina Kuweꞌikoꞌ woꞌo haweꞌ-haweꞌ i pemuleꞌámuheꞌ.”
13 Roo molaluita noꞌonoꞌ,
Pueꞌ Ala mopálehi miꞌi Iako.
14 Roo onoꞌ,
Iako moaró miꞌi hambuaꞌ watu pambuhinaoá kaꞌionoꞌna miꞌi Pueꞌ Ala molaluita i hia.
Watu iti nabubuhi anggoroꞌc hai lana saitu,
onoꞌ miꞌi popenómbána i Pueꞌ Ala.
15 Katoroꞌá iti nahangaꞌ Beteli,
lempóna:
“támbina Pueꞌ Ala”,
láwiꞌ ionoꞌ miꞌi Pueꞌ Ala molaluita i Iako.d
Karapoánákana Benami hai kamatena Raheli
16 Roo onoꞌ,
Iako hai tinána pohuꞌ wopaheꞌ hangko i Beteli.
Karaoꞌ maniheꞌ hangko i wánuá Eparata,
haweꞌ miꞌi tempóna Raheli moánáꞌ.
Poánáꞌna iti maꞌángkárá ntepuꞌu,
17 hai kahópóꞌána nauliꞌ sando i hia,
“Ineeꞌkoꞌ malááꞌ.
Deꞌe-deꞌe moánáka wopakoꞌ hadua tobaleilo.”e
18 Ina upu miꞌi inaona,
nahangaꞌ miꞌi Raheli ánáꞌna iti Benoni,
lempóna “ánáꞌkuꞌ i lalu kamapáringkuꞌ”,
agáiáná nahangaꞌ Iako Benami,
lempóna “ánáꞌkuꞌ to morasiꞌ”.f
19 Mate miꞌi Raheli haneꞌi ratawu i wiwi rárá to lao i wánuá Eparata,
ia miꞌi i Beteleme.
20 Ionoꞌ miꞌi Iako mopatindáꞌ hambuaꞌ watu pambuhinaoá,
hai popatawuána Raheli rapetándái hai watu iti haweꞌ deꞌe-deꞌe.
21 Roo onoꞌ,
napaliliu miꞌi Iako polumaona moliu Migdal-Ede,
haneꞌiheꞌ moaró bambaruꞌraꞌ i hambali wánuá iti.
22 Tangaꞌraꞌ toroꞌ ionoꞌ,
Rube mampoiluhi Biláꞌ to nakarodua umána.
Bábehiána iti nahádi umána.g
Ánáꞌnaheꞌ Iako
Deꞌemoheꞌ ánáꞌna Iako tobaleilo to hampuloꞌ hai rodua.
23 Ánáꞌna hai Lea:
to towutuꞌ Rube,
haneꞌi Simeoꞌ,
Lewi,
Iudá,
Sakari hai to toadi Sebuloꞌ.
24 Ánáꞌna hai Raheli:
Iusupu towutuꞌ hai Benami toadi.
25 Ánáꞌna hai Biláꞌ hawiꞌna Raheli:
Daa towutuꞌ hai Natali toadi.
26 Ánáꞌna hai Silipa hawiꞌna Lea:
Gati towutuꞌ hai Asere toadi.
Itimoheꞌ ánáꞌna Iako tobaleilo to rapoánáka i Pádá-Árá.
Kamatena Isakiꞌ
27 Hangko i wánuá Migdal-Ede,
lao miꞌi Iako i Isakiꞌ umána i Mamere hungkuꞌ i kótá Kiria-Aba to rauliꞌ woꞌo Hebero.
Hangkoia Burahima toroꞌ woꞌo ionoꞌ.
28-29 Matinuwuꞌ ntepuꞌu miꞌi Isakiꞌ.
Tinuwuꞌna hangatu miꞌi hai uwalu puloꞌna parena hangko mate riꞌi.
I kamatena iti,
to motawu iamoheꞌ Esau hai Iako ánáꞌna to rodua.