Dina hai Sikeꞌ
34
Bahangapa parena hangko ionoꞌ,
Dina ánáꞌraꞌ Lea hai Iako,
lao moádáꞌ hai bahangapa towawine toKánáꞌá.
2 I tempó onoꞌ,
ara hadua ánáꞌtuꞌáná to rahangaꞌ Sikeꞌ,
ánáꞌna Hemo toHewi to mokuasaꞌi tampoꞌ iti.
I kanaitána Sikeꞌ iti Dina,
ia mampelangkaha haneꞌi napogauꞌ.
3 Mentakaꞌ laluna Sikeꞌ i Dina,
hai naundeꞌ ntepuꞌu ánáꞌntawine iti.
Napamalulu laluna bona laluna Dina mentakaꞌ woꞌo i hia.
4 Nauliꞌ i umána,
“Umaꞌ,
nupembiáꞌáꞌaꞌ i tosaena towawine iti bona kupotoina.”
5 I kanahádina Iako karapakedáina miꞌi wátána ánáꞌna,
ia mampengkaniika sieruꞌ mampegiá pesuleꞌraꞌ ánáꞌnaheꞌ tobaleilo hangko i pádá poewuáraꞌ.
6 Hemo umána Sikeꞌ lao mampohidupaꞌá Iako bona peisáheꞌ molaluita.
7 Tempó iti,
mesuleꞌmoheꞌ ánáꞌna Iako hangko i pádá.
Karahádina apa to pewaliꞌ iti,
masusa ntepuꞌu laluraꞌ hai rumihi kamabukoꞌraꞌ,
láwiꞌ Sikeꞌ moala miꞌi Dina ánáꞌna Iako haneꞌi napogauꞌ.
Bábehiána iti mopakedái hangaꞌraꞌ upu-upu toSáráeliꞌ láwiꞌ tiꞌara hintotoꞌ.
8 Nauliꞌ Hemo i Iako hai ánáꞌnaheꞌ,
“Ánáꞌkuꞌ Sikeꞌ,
naundeꞌ ntepuꞌu mampotoina ánáꞌmu.
Onoꞌ miꞌi haneꞌi kupembiáꞌ maroꞌa i kitaꞌ,
bona ánáꞌkuꞌ hai ánáꞌmu tapahambokoheꞌ.
9 Maroꞌa ane hintuwuꞌkeꞌ,
bona tinámu hai tinángkiꞌ mombetatakaꞌi i pohamboko,
10 bona peisámokou toroꞌ i oloꞌkiꞌ i tampoꞌ deꞌe iumbá peá peundeꞌámi.
Peisákou woꞌo mobaluꞌ-baluꞌ ieneꞌ hai mampopueꞌ tampoꞌ.”
11 Roo onoꞌ,
nauliꞌ woꞌo Sikeꞌ i umána Dina hai halalunaheꞌ,
“Kupembiáꞌ bona nipokaꞌahiꞌaꞌ.
Ina kuweꞌikou apa peá to nipembiáꞌ.
12 Nihángáꞌáꞌangkaiꞌ ba apa peá to nipoinao,
hai nipakanótó hólóna ba ádána.
Ina kuweꞌikou apa to nipembiáꞌ bona nipokana peá towawine iti mewaliꞌ toinángkuꞌ.”
13 Ánti bábehiána Sikeꞌ to mopakedái wátána Dina,
ánáꞌnaheꞌ Iako moákálángiheꞌ Sikeꞌ hai Hemo umána,
14 rauliꞌ,
“Kipokahili ane kipokana iti ádingkiꞌ mampotoama tauna to tiꞌara ratileꞌ.
15 Ina kipokana pembiáꞌmi ane nipeuláꞌi ádángkiꞌ:
upu-upukou tobaleilo hangaa-ngaa ratileꞌ bona hibalikou hai kaiꞌ.
16 Ane nibábehi miꞌi noꞌonoꞌ,
ina kipokana miꞌi pembiáꞌmi.
Peisámokeꞌ mombetatakaꞌi i pohamboko.
Ina kipeweꞌi ánáꞌntawinengkiꞌ nipotoina,
hai ina kipotoina woꞌo ánáꞌntawinemi.
Hangko ionoꞌ,
peisákeꞌ toroꞌ hingkakani hai ina mewaliꞌkeꞌ to hampohalaluá.
17 Agáiáná ane tiꞌara niundeꞌ mampeuláꞌi ádángkiꞌ deꞌe,
hai tiꞌarakou mau ratileꞌ,
ádingkiꞌ hangaa-ngaa kiala huleꞌ hai ina pohuꞌangkaiꞌ hangko ieneꞌ.”
18 Pembiáꞌraꞌ iti rapokana Hemo hai Sikeꞌ ánáꞌna.
19 Ánti peundeꞌna ntepuꞌu i Dina,
onoꞌ miꞌi haneꞌi napoinao ntepuꞌu Sikeꞌ mampeuláꞌi pembiáꞌraꞌ iti.
Hai Sikeꞌ iti to teádái ntepuꞌu i támbina umána.
20 Hangko ionoꞌ,
laomoheꞌ Hemo hai Sikeꞌ i pogómbóá i babaꞌá bente kótá haneꞌi molaluitaheꞌ i tauna,
rauliꞌ,
21 “ToSáráeliꞌ iti,
raundeꞌ mohintuwuꞌ hai kitaꞌ.
Mewaliꞌ kipembiáꞌ bona nipatodáhiheꞌ toroꞌ hingkakani hai kitaꞌ i tampoꞌ deꞌe,
hai mobaluꞌ-baluꞌheꞌ woꞌo ieneꞌ,
láwiꞌ tampoꞌtaꞌ deꞌe maeláꞌ mani.
Kitaꞌ,
peisákeꞌ hamboko hai ánáꞌntawineraꞌ,
hai hira woꞌo peisáheꞌ hamboko hai ánáꞌntawinentaꞌ.
22 Agáiáná taunaheꞌ iti,
tiꞌara raundeꞌ toroꞌ hingkakani hai kitaꞌ nodo to hampohalaluá,
ane tiꞌarakeꞌ mouláꞌ ádáraꞌ to node:
upu-upu tobaleilo hangaa-ngaa ratileꞌ hibali hai hira.
23 Ane tabábehi noꞌonoꞌ,
upu-upu binataꞌraꞌ hai párewáraꞌ ina mewaliꞌ woꞌo gáláꞌtaꞌ.
Kipekiri maroꞌa ane tapokana pembiáꞌraꞌ iti,
bona toroꞌkeꞌ hingkakani.”
24 Upu-upu tauna to mogómbó i babaꞌá kótá mampokana pembiáꞌraꞌ Hemo hai Sikeꞌ iti,
onoꞌ haneꞌi ratileꞌmoheꞌ upu-upu tobaleilo i kótá iti.
25-26 Tálu miꞌi alona hangko ionoꞌ,
tangaꞌraꞌ mani mantódihá kamaháina karatileꞌraꞌ,
rodua wutuꞌna Dina,
iamoheꞌ Simeoꞌ hai Lewi,
moalamoheꞌ pihoꞌraꞌ laoheꞌ mosuaki kótá iti haneꞌi mopapateheꞌ upu-upu tobaleilo to ara ionoꞌ,
tepasuaꞌ woꞌo Hemo hai Sikeꞌ.a
Tauna i kótá iti tiꞌara mampekiri ina mewaliꞌ noꞌonoꞌ.
Roo onoꞌ,
Dina raꞌala miꞌi Simeoꞌ hai Lewi hangko i támbina Sikeꞌ,
haneꞌi pohuꞌheꞌ.
27 Karooraꞌ mepapate,
ánáꞌna Iako to ntániꞌna laomoheꞌ merámpáki i lalu kótá iti,
láwiꞌ ionoꞌ ádiraꞌ rapakedái.
28 Handaꞌ to raperampaꞌi,
tepasuaꞌ bekeꞌ,
dimbá,
gapiꞌ,
kalide hai apa-apa to rahumba i lalu hai i rawa kótá iti.
29 Towawineraꞌ hai ánáꞌraꞌ ratawaniheꞌ,
hai upu-upu kapebukuraꞌ raꞌánti,
tepasuaꞌ hinángkáꞌ to rahumba i lalu támbiraꞌ.
30 I pesuleꞌraꞌ,
nauliꞌ Iako i Simeoꞌ hai Lewi,
“Nipakasusamoꞌ hai nipakadake hangaꞌkuꞌ i toKánáꞌá hai i toPerisi to toroꞌheꞌ i tampoꞌ deꞌe.
Kitaꞌ deꞌe,
tiꞌarakeꞌ handaꞌ.
Ane hintuwuꞌheꞌ tauna iti hai moewaꞌkeꞌ,
tongawaꞌ ina ranangikeꞌ,
hai ina tunakeꞌ upu-upu.”
31 Agáiáná mehániꞌheꞌ,
“Maroꞌa paꞌi ane ádingkiꞌ rapahibali hai hadua towawine to mampobaluꞌ wátána?”