Pohidupaꞌraꞌ Iako hai Esau
33
Hangko karaoꞌ,
Iako moitamoheꞌ mai Esau hai taunána to iba átuna tobaleilo.
Onoꞌ miꞌi haneꞌi ánáꞌna nagáláꞌáheꞌ Lea,
Raheli hai hawiꞌraꞌ to rodua.
2 Napopombeuláꞌmoheꞌ hawiꞌraꞌ to rodua hingkakani hai ánáꞌraꞌ,
Lea hai ánáꞌnaheꞌ,
haneꞌi Raheli hai Iusupu napaibókóꞌ ntepuꞌuheꞌ.
3 Moioru miꞌi Iako.
Tangaꞌna mohungkuki wutuꞌna,
molingkudu pitu kánina motóngkóꞌ haweꞌ i tampoꞌ,
tandaꞌ kamampomahilena ntepuꞌu wutuꞌna.
4 Agáiáná Esau melangka lao mampohidupaꞌá Iako,
nakápui hai naꞌángki,
hai mombeteriahiheꞌ.
5 Kanaitáraꞌ Esau towawine hai ánángkóiꞌ iti,
napekuneꞌ,
“Heánáheꞌ to nupohiolaꞌ deꞌe?”
Nahániki Iako,
“Deꞌemoheꞌ ánáꞌkuꞌ to naweꞌiaꞌ Pueꞌ Ala ánti kabulána laluNa i kódóꞌ.”
6 Roo onoꞌ,
hawiꞌna towawine hai ánáꞌraꞌ laoheꞌ molingkudu motóngkóꞌ i bitina Esau,
7 haneꞌi laoheꞌ woꞌo Lea hai ánáꞌna molingkudu motóngkóꞌ i hia.
Hai kaupuána,
Iusupu hai Raheli.
8 Napekuneꞌ Esau,
“Apa tunggáiámu mopakatu bahangapa tobuna binataꞌ to kupohidupaꞌá ininá?”
Mehániꞌ Iako,
“Wutuꞌkuꞌ to kuádái.
Upu-upu binataꞌ iti,
io miꞌi pueꞌna hai kupembiáꞌ bona maroꞌa lalumu i kódóꞌ.”
9 Agáiáná nauliꞌ Esau,
“Handaꞌ miꞌi i kódóꞌ.
Tiꞌaraꞌaꞌ paraluu nupoweꞌi apa-apa.”
10 Nauliꞌ Iako,
“Ineeꞌkoꞌ noꞌonoꞌ,
láwiꞌ ane maroꞌa lalumu i kódóꞌ,
kupembiáꞌ bona nutarima apa to kupakatu iti i hio.
Góeꞌ ntepuꞌuaꞌ láwiꞌ mohidupaꞌ wopakeꞌ.
I poitángkuꞌ lindoꞌmu ininá,
nodoaꞌ to moita lindoꞌna Pueꞌ Ala,
láwiꞌ maroꞌa lalumu i kódóꞌ.
11 Kupembiáꞌ bona nutarima miꞌi apa to kuweꞌikoꞌ deꞌe,
láwiꞌ maꞌahiꞌ laluna Pueꞌ Ala i kódóꞌ haneꞌi Naweꞌimoꞌ i pákáꞌ-pákáꞌna to kuparaluu i katueꞌkuꞌ.”
Iako monáráhi ntepuꞌu wutuꞌna bona motarima apa to naweꞌi iti,
duuꞌna natarima.a
12 Roo onoꞌ,
nauliꞌ Esau,
“Mangkádipurámokou bona laomokeꞌ,
hai ina kuporángákou.”
13 Agáiáná mehániꞌ Iako,
“Nuisánto kamawewena polumaongkiꞌ láwiꞌ moántiangkaiꞌ ánángkóiꞌ to tiꞌara mani rabuku molumao.
Hai araheꞌ woꞌo binataꞌ to mopahuhu mani.
Ane kipasimbukuheꞌ molumao dehangaloá,
bateꞌraꞌ ina mate.
14 Rángina miꞌi moiorumokoꞌ;
i bókóꞌramongkaiꞌ,
mouláꞌ peangkaiꞌ polumaoraꞌ binataꞌ hai ánáꞌkuꞌheꞌ.
Hidupaꞌramokeꞌ i tampoꞌ Sei.”
15 Nauliꞌ Esau,
“Ane noꞌonoꞌi,
kuweꞌikoꞌ bahangapa taunángkuꞌ ina mamporángákou i polumaoámi.”
Mehániꞌ Iako,
“Tiꞌara paraluu.
To kuparaluu,
bona maroꞌa lalumu i kódóꞌ.”
16 Mewaliꞌ i alo iti,
pohuꞌ miꞌi Esau mesuleꞌ lao i tampoꞌ Sei,
to rauliꞌ woꞌo Edo.
17 Agáiáná Iako lao riꞌi i wánuá Sukoꞌ,
hai ionoꞌ moaró támbi hai bambaruꞌ pebóungáꞌána binataꞌ.
Onoꞌ miꞌi haneꞌi wánuá iti rahangaꞌ Sukoꞌ,
lempóna “bambaruꞌ pebóungáꞌá”.
18 I polumaoána Iako iti,
mantepuꞌuheꞌ hangko i Pádá-Árá,
hai kahópóꞌána haweꞌheꞌ i kamaroꞌa-roꞌa i kótá Sikeꞌ i tampoꞌ Kánáꞌá.b
I kahaweꞌraꞌ ionoꞌ,
moarómoheꞌ bambaruꞌ i pádá,
i rawa kótá iti.
19 Pádá to nakatoroꞌi iti,
nahóló hangko i ánáꞌna Hemo,
umána Sikeꞌ.
Hólóna hangatu dóiꞌ peráꞌ.
20 Ionoꞌ,
Iako moaró miꞌi hambuaꞌ paintuá popenómbá,
haneꞌi nahangaꞌ,
“Pueꞌ Ala Pueꞌraꞌ toSáráeliꞌ.”c