Iako malááꞌ mampohidupaꞌá Esau
32
Kanapaliliuna Iako polumaona,
ia mampohidupaꞌá bahangapa malaꞌekana Pueꞌ Ala.
2 Kanaitáraꞌ Iako,
liu-liu nauliꞌ,
“Deꞌe miꞌi katoroꞌáraꞌ surudadoꞌna Pueꞌ Ala.”
Onoꞌ miꞌi haneꞌi nahangaꞌ katoroꞌá iti Mahanai.a
3 Roo onoꞌ,
nahuoꞌmoheꞌ bahangapa taunána moioru lao i buluꞌ-buluꞌna Sei,
i tampoꞌraꞌ toEdo,b
bona mampombelámbiꞌá Esau wutuꞌna.
4 Nahángáꞌáꞌáheꞌ taunána iti,
nauliꞌ,
“Nipahaweꞌ i wutuꞌkuꞌ Esau node:
Deꞌe miꞌi laluitana Iako hawiꞌmu.
‘Kódóꞌ maruemoꞌ toroꞌ i Lábá halaluntaꞌ.
5 I kódóꞌ deꞌe-deꞌe ara miꞌi gapiꞌ,
kalide,
dimbá,
bekeꞌ,
hai hawiꞌkuꞌheꞌ.
Wutuꞌkuꞌ to kuádái,
kupahaweꞌ bámbári deꞌe i kitaꞌ,
bona maroꞌa laluntaꞌ i kódóꞌ.’ ”
6 I pesuleꞌraꞌ to nahuoꞌ iti,
rauliꞌ,
“Laomongkaiꞌ mampohidupaꞌá Esau wutuꞌmu,
hai deꞌe-deꞌe tangaꞌna i polumaoána ina mai mampohidupaꞌákoꞌ.
Araheꞌ woꞌo iba áturaꞌ tobaleilo to mamporángá.”
7 Kanahádina bámbári iti,
malááꞌ ntepuꞌu Iako hai masusa laluna.
Onoꞌ miꞌi haneꞌi nagáláꞌmoheꞌ taunána to meuláꞌ i hia mewaliꞌ rontobu.
Noꞌonoꞌheꞌ woꞌo bekeꞌna,
dimbá,
gapiꞌ hai untána.
8 Nauliꞌ i laluna,
“Ane Esau mai mampombealaꞌá to hantobu,
ara mani to hantobu to peisá mopatueꞌ wátáraꞌ.”
9 Hangko ionoꞌ,
mekakae miꞌi Iako,
nauliꞌ,
“Ó Pueꞌ Ala to rapenómbái pueꞌkuꞌ Burahima hai umángkuꞌ Isakiꞌ.
Nupehádingi wongkódóꞌá láwiꞌ Io to mohuoꞌaꞌ mesuleꞌ mai i tampoꞌkuꞌ hai i halalungkuꞌheꞌ.
PUEꞌ,
Nudándi miꞌi ina Nukádipuráꞌaꞌ maroꞌa.c
10 Katoꞌuána tiꞌaraꞌaꞌ hintotoꞌ motarima kamaroꞌaMu hai katetidaꞌ to Nupatongawaꞌ oaꞌ i lalu katueꞌkuꞌ.
I tempóngkuꞌ pohuꞌ hangko i támbina umángkuꞌ hai mengkalimba i uwai Iarade hangkoia,
tiꞌara ara apa-apa to kuánti,
bateꞌna peá laiꞌ to kutibaaꞌ.
Agáiáná i pesuleꞌkuꞌ miꞌi deꞌe,
handaꞌmongkaiꞌ,
mewaliꞌmongkaiꞌ rontobu.
11 Kupembiáꞌ bona Nupelaeaꞌ wongkódóꞌá hangko i Esau wutuꞌkuꞌ,
láwiꞌ kupokalááꞌ ia ina mai mampombealaꞌáꞌaꞌ hai mopapateangkaiꞌ,
tepasuaꞌ toinángkuꞌ hai ánáꞌkuꞌheꞌ.
12 Agáiáná Nudándi miꞌi hangkoia ina Nukádipuráꞌaꞌ maroꞌa hai ina Nupahandaꞌ pemuleꞌángkuꞌ nodo kahandaꞌna wungi i wiwi tahiꞌ to tiꞌara peisá raimbaꞌ.”
13 Hambengi miꞌi Iako ionoꞌ.
rongatu báꞌána bekeꞌ lundara,
rompuloꞌ báꞌána bekeꞌ laki,
rongatu báꞌána dimbá lundara,
rompuloꞌ báꞌána dimbá laki,
15 tálu puloꞌna untá hante ánáꞌraꞌ to tangaꞌraꞌ mani mehuhu,
iba puloꞌna báꞌána gapiꞌ lundara,
hampuloꞌ báꞌána gapiꞌ laki,
rompuloꞌ báꞌána kalide lundara,
hai hampuloꞌ báꞌána kalide laki.
16 Napataniꞌ binataꞌ iti hantobu-hantobu,
haneꞌi nahuoꞌheꞌ hawiꞌna mokámpái.
Nahángáꞌáheꞌ,
“Moiorumokou hangko i kódóꞌ,
hai nikámpáiheꞌ hantobu-hantobu bona ineeꞌheꞌ mombehungkuki.”
17 Napolaluitaꞌá miꞌi Iako hawiꞌna to moioru ntepuꞌu,
nauliꞌ,
“Ane mampohidupaꞌákoꞌ Esau wutuꞌkuꞌ,
hai ane napekuneꞌ node:
‘Heáná pueꞌmu?
Iumbákoꞌ lao?
Hai heáná pueꞌna binataꞌ to nuewu deꞌe?’
18 hangaa-ngaa nuhániki node:
‘Tuá,
demiꞌe binataꞌna hawiꞌmu Iako,
pakatuna i hio.
Hawiꞌmu Iako ara mani mai i bókóꞌ.’ ”
19 Noꞌonoꞌ miꞌi polaluitana Iako,
maroꞌa i hawiꞌna to kaduá hai to katálu,
hai upu-upu hawiꞌna to mokámpái binataꞌna iti,
nauliꞌ,
“Nodo polaluitangkuꞌ ininá,
hangaa-ngaa nihángáꞌá Esau.
20 Ane mohidupaꞌkou,
hangaa-ngaa niuliꞌ woꞌo,
‘Hawiꞌmu Iako ara mani mai i bókóꞌ.’ ”
Nauliꞌ Iako i laluna,
“Maroꞌa miꞌi kupamalulu sieruꞌ laluna hai pakatungkuꞌ,
hangko kuita riꞌi lindoꞌna.
Babilaꞌ ina natarima mpuꞌuaꞌ maroꞌa.”
21 Mewaliꞌ to napakatu iti raꞌánti hawiꞌna to moioruheꞌ,
agáiáná Iako hambengi mani i bambaruꞌna.
Iako mohakaꞌ hai Pueꞌ Ala
22 Káindi iti,
mearó miꞌi Iako moántiheꞌ toinána rodua,
hawiꞌnaheꞌ towawine to rodua,
hai ánáꞌnaheꞌ to hampuloꞌ hai hadua,
haneꞌi mengkalimbaheꞌ i uwai Iaboꞌ.
23 Kalimbáraꞌ towawinena hai ánáꞌnaheꞌ,
napalimbáheꞌ woꞌo párewána hai taunána,
24 mewaliꞌ ia perái haduduána.
Roo onoꞌ,
haweꞌ miꞌi hadua tobaleilo mampohakaꞌá Iako duuꞌna mepulo.
25 Kanaisána tauna iti katiꞌárána ina menangi,
mopahái perái tóáꞌ páꞌána Iako haneꞌi halagogi.
26 Nauliꞌ tauna iti,
“Nukábáhámoꞌ láwiꞌ hungkuꞌ miꞌi mabaa!”
Agáiáná mehániꞌ Iako,
“Tiꞌarakoꞌ ina kukábáhá,
ane tiꞌara maniaꞌ nuwátiꞌ.”
27 Mekuneꞌ tauna iti,
“Heáná hangaꞌmu?”
Mehániꞌ,
“Kódóꞌ deꞌe Iako.”
28 Nauliꞌ tauna iti,
“Deꞌe-deꞌe tiꞌarapokoꞌ ina rahangaꞌ Iako.d
Rabáliki miꞌi hangaꞌmu.
Ina rahangaꞌmokoꞌ Sáráeliꞌ,e
láwiꞌ moewaꞌmokoꞌ Pueꞌ Ala hai tauna,
hai menangikoꞌ.”
29 Nauliꞌ Iako,
“Nuhángáꞌáꞌaꞌ woꞌo heáná hangaꞌmu.”
Agáiáná mehániꞌ tauna iti,
“Moapa riꞌi haneꞌi nupekuneꞌ hangaꞌkuꞌ?”
Roo onoꞌ,
ia mowátiꞌ Iako.
30 Mewaliꞌ nauliꞌ Iako,
“Mampombelindoꞌámoꞌ Pueꞌ Ala,
agáiáná tueꞌ maniaꞌ.”
Onoꞌ miꞌi haneꞌi katoroꞌá iti nahangaꞌ Penieli lempóna “lindoꞌna Pueꞌ Ala”.