Iako mopálehi Lábá ngkániiꞌ-niiꞌ
31
Hangkani tempó,
Iako mohádi ánáꞌna Lábá molaluita,
rauliꞌ,
“Iako moala miꞌi binataꞌna umántaꞌ.
Upu-upu kapebukuna mentóáꞌ hangko i umántaꞌ!”
2 Naita miꞌi woꞌo Iako pambiárána pinoumána tiꞌara piꞌi bákeróꞌ nodo to liu.
3 Hangko ionoꞌ,
nauliꞌ PUEꞌ i Iako,
“Mesuleꞌmokoꞌ lao i halalumu i tampoꞌna toiorumu,
hai ina Kuporángákoꞌ.”
4 Mewaliꞌ Iako mohuoꞌ miꞌi tauna lao mokióꞌ Raheli hai Lea bona mohidupaꞌheꞌ i pádá poewuána bekeꞌ hai dimbá.
5 Kahaweꞌraꞌ toinána ionoꞌ,
nahángáꞌáheꞌ Iako,
“Kupeita,
umámi tiꞌara piꞌi bákeróꞌ i kódóꞌ nodo to liu.
Agáiáná Pueꞌ Ala to napenómbái umángkuꞌ,
Ia miꞌi to mamporángáꞌaꞌ oaꞌ.
6 Niꞌisánto noumbá kamatimina pobágóꞌkuꞌ i umámi,
7 agáiáná kehapiꞌ noꞌonoꞌ,
handaꞌ miꞌi káningkuꞌ naꞌákálángi,
láwiꞌ hampuloꞌ miꞌi kánina nabáliki sarongkuꞌ hangko i apa to nadándiáꞌaꞌ.
Agáiáná Pueꞌ Ala tiꞌara mopatodáhi umámi mobábehi to kadake i kódóꞌ.
8 {Tongawaꞌ miꞌi kanawátiꞌkuꞌ Pueꞌ Ala,
} láwiꞌ ane nauliꞌ umámi,
‘Binataꞌkuꞌ to butitoꞌ nuposaro,’
upu-upu binataꞌna moánákaheꞌ to butitoꞌ.
Hai ane nauliꞌ umámi,
‘Binataꞌkuꞌ to mobátiꞌ-bátiꞌ nuposaro,’
upu-upu binataꞌna moánákaheꞌ to mobátiꞌ-bátiꞌ.
9 Noꞌonoꞌ miꞌi rárána Pueꞌ Ala moala binataꞌna umámi haneꞌi Naweꞌiaꞌ mewaliꞌ gáláꞌkuꞌ.
10 Hangkani tempó,
i tempóraꞌ binataꞌ metawine,
mampaturuáꞌaꞌ.
Kuita bekeꞌ laki to metawineheꞌ iti,
paka to mobátiꞌ-bátiꞌ hai butitoꞌ hai paka to loba.
11 Hangkaꞌ-hangkaꞌ perái,
malaꞌekana Pueꞌ Ala molaluita i kódóꞌ,
nauliꞌ,
‘Iako.’
Mehániꞌaꞌ,
‘Deꞌentoaꞌ,
Pueꞌ.’
12 Nauliꞌ wopiꞌi malaꞌeka,
‘Peita.
Upu-upu bekeꞌ laki to metawine iti,
mobátiꞌ-bátiꞌ,
butitoꞌ hai lobaheꞌ.
Kutunggáikoꞌ mowátiꞌ noꞌonoꞌ,
láwiꞌ Kuita miꞌi upu-upu bábehiána Lábá i hio.
13 Kódóꞌ miꞌi Pueꞌ Ala to nupenómbái hangkoia i Beteli,
i kamopatindáꞌmu hambuaꞌ watu haneꞌi nububuhi hai lana mewaliꞌ watu penómbáꞌá i Kódóꞌ,a
hai modándikoꞌ i Kódóꞌ.
Mewaliꞌ deꞌe-deꞌe,
hangaa-ngaa mangkádipurámokoꞌ hai mesuleꞌmokoꞌ i tampoꞌ kabubuána waheꞌmu.’ ”
14 Mehániꞌheꞌ Raheli hai Lea,
“Tiꞌara piꞌi ara párewá to ina kipososora hangko i umángkiꞌ.
15 Kaiꞌ deꞌe napahibalimongkaiꞌ hai tohaweꞌ peá.
Napopohambokoáꞌangkaiꞌ hai io,
hai ádángkiꞌ to narangaꞌ umángkiꞌb napoupu miꞌi aha.
16 Upu-upu kapebukuna umángkiꞌ naꞌala miꞌi Pueꞌ Ala haneꞌi Naweꞌikoꞌ.
Iti miꞌi to mewaliꞌ gáláꞌkiꞌ hai gáláꞌraꞌ woꞌo ánáꞌkiꞌ.
Mewaliꞌ nubábehi miꞌi apa to nahángáꞌaꞌámokoꞌ Pueꞌ Ala.”
17 Mewaliꞌ mangkádipurá miꞌi Iako,
napopesaweꞌheꞌ towawinena hai ánáꞌna i untá,
18 haneꞌiheꞌ pohuꞌ lao i tampoꞌ Kánáꞌá,
tampoꞌna Isakiꞌ umána.
Upu-upu binataꞌraꞌ raeri,
hai upu-upu párewáraꞌ to ralámbiꞌ i tampoꞌ Pádá-Árá raꞌánti woꞌo.
19 I tempó iti,
Lábá tangaꞌna mani mogundiꞌheꞌ dimbána i pádá,
onoꞌ miꞌi haneꞌi Raheli mopanako watutaunána umána {to rapenómbái hai to rapoinálái mokámpái támbiraꞌ}.
20 I kapohuꞌraꞌ iti,
Lábá toÁrá iti naꞌákálángi Iako,
láwiꞌ tiꞌara napopaisáꞌá kapohuꞌraꞌ.
21 Naꞌala miꞌi Iako upu-upu párewána,
haneꞌiheꞌ pohuꞌ kawiáꞌ mengkalimba i uwai Epara lao i buluꞌ-buluꞌna i tampoꞌ Gileaꞌ.c
Lábá modápáꞌ Iako
22 Liu miꞌi tálu alona hangko naisá riꞌi Lábá kapohuꞌraꞌ miꞌi Iako hantámbi.
23 Kásáliu nakióꞌheꞌ halaluna haneꞌiheꞌ modápáꞌ Iako.
Pitu miꞌi alona polumaoraꞌ,
hangko ralámbiꞌraheꞌ i buluꞌ-buluꞌna i tampoꞌ Gileaꞌ.
24 Agáiáná tangaꞌ káindi,
Pueꞌ Ala mampatongawaꞌ i Lábá toÁrá iti i lalu paturuna,
Nauliꞌ,
“Maroꞌa-roꞌakoꞌ.
Ineeꞌkoꞌ mampopalááꞌ Iako kehapiꞌ hantepóꞌ peá laluitamu.”
25 Iako hantina mobambaruꞌmoheꞌ i buluꞌ-buluꞌna i Gileaꞌ.
Mewaliꞌ i kahaweꞌna Lábá hai taunánaheꞌ,
mobambaruꞌheꞌ woꞌo hungkuꞌ ionoꞌ.
26 Roo onoꞌ,
Lábá lao mampombelámbiꞌá Iako,
nauliꞌ,
“Moapa riꞌi haneꞌi nubagiuꞌaꞌ hai mampelangkahakoꞌ ánáꞌkuꞌ nodoheꞌ toratawani.
27 Moapa riꞌi haneꞌi nuákálángiaꞌ?
Pohuꞌkoꞌ ngkániiꞌ-niiꞌ,
tiꞌarakoꞌ mesabiꞌ.
Ane kemesabiꞌntokoꞌ,
bateꞌna kekupopangkaliwokou maroꞌa hai kekuposusaikou sieruꞌ,
raponaniákou hai kándá hai kasapi,
hangko pohuꞌrakou.
28 Mogalo riꞌi moángkiaꞌ ánáꞌkuꞌ hai ueꞌkuꞌheꞌ,
tiꞌaraꞌaꞌ nampakaꞌ.
Bebe ntepuꞌukoꞌ;
tiꞌara maroꞌa bábehiámu iti.
29 Ane kuꞌundeꞌnto mobábehi to kadake i hio,
peisá,
agáiáná iakáindi Pueꞌ Ala to napenómbái umámu mopaingáꞌiaꞌ bona ineeꞌkoꞌ kupopalááꞌ.
30 Hai ane ina mesuleꞌmokoꞌ i wánuámu láwiꞌ mabilakoꞌ i umámu hai halalumuheꞌ,
moapa riꞌi haneꞌi nupanakoheꞌ watutaunángkuꞌ to mokámpái támbingkuꞌ?”
31 Mehániꞌ Iako,
“Pohuꞌangkaiꞌ ngkániiꞌ-niiꞌ,
láwiꞌ kupokalááꞌ ina nutahaheꞌ ánáꞌmu bona tiꞌaraheꞌ meuláꞌ i kódóꞌ.
32 Kana i watutaunámu to nukábelái ininá,
ane rápáꞌna nulámbiꞌ i kaiꞌ,
heáná to mopanako hangaa-ngaa rapapate.
I lindoꞌraꞌ halaluntaꞌ deꞌe,
nupáresáꞌ sieruꞌ ane ara mpuꞌui párewámu i kaiꞌ.
Ane arai,
nualamonto.”
Mole tiꞌara riꞌi naisá Iako kaRahelina to mopanako watutaunána Lábá iti.
33 Rungu-runguna,
mesuaꞌ miꞌi Lábá i bambaruꞌna Iako mampeliꞌ watutaunánaheꞌ.
Hangko ionoꞌ,
mesuaꞌ wopiꞌi i bambaruꞌna Lea hai i bambaruꞌraꞌ rodua hawiꞌraꞌ,
agáiáná tiꞌara nalámbiꞌ.
Kaupuána ia mesuaꞌ i bambaruꞌna Raheli.
34 Hangko tiꞌara mani haweꞌ umána,
Raheli moala miꞌi watutaunaheꞌ iti nahóhóká i lalu lámpi untá,
haneꞌi napehodai.
Pesuaꞌna Lábá i bambaruꞌna iti,
napeliꞌ agáiáná tiꞌara woꞌo nalámbiꞌ.
35 Nauliꞌ Raheli i umána,
“Umaꞌ,
ineeꞌkoꞌ mabukoꞌ.
Tiꞌaraꞌaꞌ peisá meángkáꞌ modupaꞌkoꞌ,
láwiꞌ tangaꞌkuꞌ nahumba.”
Watutauna iti napeliꞌ ntepuꞌu Lábá agáiáná tiꞌara nalámbiꞌ.
36 Mabukoꞌ miꞌi Iako,
haneꞌi nauliꞌ,
“Apa kakadakengkuꞌ to kubábehi?
Apa salaꞌkuꞌ haneꞌi nudápáꞌ ntepuꞌuaꞌ?
37 Deꞌe-deꞌe,
roo miꞌi nupáresáꞌ upu-upu párewángkuꞌ.
Ara paꞌi párewámu to nulámbiꞌ?
Nupatóá i lindoꞌtaꞌ bona raita halaluntaꞌ hai bona raisá upu-upu heáná to toꞌu.
38 Rompuloꞌ miꞌi parena toroꞌaꞌ i hio.
Dimbá hai bekeꞌmu kupiaraꞌ maroꞌa haneꞌiheꞌ memuleꞌ-muleꞌ.d
Tiꞌara ara haweꞌ hambaꞌa bekeꞌmu to kusambale bona kuandeꞌ.
39 Ane hambaꞌa mate nahakaꞌ binataꞌ to maila,
tiꞌara haweꞌ hangkani kuánti wátána i hio.
Bateꞌna kódóꞌ to mopaháwángi hangko i binataꞌkuꞌ.
Ane ara to rapanako mabaa ba káindi,
paka nupopepaháwángi i kódóꞌ.
40 Mobágóꞌaꞌ oaꞌ i hio.
Ane mabaa,
kanaꞌaꞌ alo,
ane káindi,
kanaꞌaꞌ lengiꞌ.
Handaꞌ kánina tiꞌaraꞌaꞌ peisá maturu.
Noꞌonoꞌ miꞌi kamapárina pobágóꞌkuꞌ i hio.
41 Rompuloꞌ miꞌi parena toroꞌaꞌ i hio,
mobágóꞌaꞌ hampuloꞌ hai iba parena i hio bona nuweꞌiaꞌ ánáꞌmu rodua kupotoina.
Mobágóꞌ maniaꞌ ini parena i hio bona kulámbiꞌ sarongkuꞌ,
ia miꞌi dimbá hai bekeꞌ deꞌe.
Tempóngkuꞌ mobágóꞌ i hio,
hampuloꞌ miꞌi kánina nubáliki sarongkuꞌ hangko i apa to nudándiáꞌaꞌ.
42 Ane ketiꞌaraꞌaꞌ naporángá Pueꞌ Ala to napenómbái pueꞌkuꞌ Burahima hai to napomahile umángkuꞌ Isakiꞌ,
kehangaa-ngaa mesuleꞌaꞌ ntooꞌ.
Agáiáná Pueꞌ Ala moita miꞌi kamapáringkuꞌ i pobágóꞌkuꞌ,
onoꞌ miꞌi haneꞌi iakáindi moliu paturumu,
napakanótó miꞌi Pueꞌ kamasalaꞌmu.”
Podándiraꞌ Lábá hai Iako
43 Hangko ionoꞌ,
Lábá mehániꞌ i Iako,
nauliꞌ,
“Toinámu to rodua,
ánáꞌkuꞌheꞌ;
ánáꞌmi iti,
ueꞌkuꞌheꞌ,
hai upu-upu binataꞌmu deꞌe,
kódóꞌ pueꞌna.
Katoꞌuána,
upu-upu to nuita deꞌe,
kódóꞌ miꞌi pueꞌna.
Agáiáná tapanoumbá paꞌi deꞌe-deꞌe?
Tiꞌarapoheꞌ peisá kutaha deꞌe ánáꞌkuꞌ hai ueꞌkuꞌ.
44 Rángina miꞌi mopaꞌarakeꞌ podándi.
Tapopombeusu-usu watu deꞌe mewaliꞌ tandaꞌ podándintaꞌ.”
45 Hangko ionoꞌ,
naꞌala miꞌi Iako hambuaꞌ watu haneꞌi napatindáꞌ mewaliꞌ watu pambuhinaoá.
46 Roo onoꞌ,
nahuoꞌheꞌ halaluna morámpu watu hai moꞌódóꞌ mpakaroꞌa ionoꞌ,
haneꞌiheꞌ mandeꞌ hingkakani hungkuꞌ i watu iti.
47 Watu to raódóꞌ iti nahangaꞌ Lábá i lalu básá Árá watu Ega-Sahaduta,
hai watu iti nahangaꞌ woꞌo Iako i lalu básá Iberani Galeꞌ.e
48 Nauliꞌ Lábá i Iako,
“Watu to raódóꞌ deꞌe mewaliꞌ popambuhinaoá podándintaꞌ.”
Onoꞌ miꞌi haneꞌi watu iti rauliꞌ Galeꞌ.
49 Watu iti rahangaꞌ woꞌo Mispa,
lempóna:
“katoroꞌá pekámpáiá”,
láwiꞌ nauliꞌ Lábá,
“Tapembiáꞌ i PUEꞌ bona Nakámpái katueꞌtaꞌ bona tiꞌarakeꞌ moliungi dándintaꞌ,
kehapiꞌkeꞌ mombekaraohi.
50 Ane mobábehikoꞌ to kadake i ánáꞌkuꞌheꞌ to nupotoina,
ba nuala towawine ntániꞌna nupotoina,
kehapiꞌ tiꞌara ara to mai mopahaweꞌ i kódóꞌ,
maingáꞌ-ingáꞌkoꞌ láwiꞌ Pueꞌ Ala to mosabikikeꞌ.
51 Watu to raódóꞌ hai watu to rapatindáꞌ deꞌe
52 mewaliꞌ tandaꞌ parailiꞌtaꞌ to mampopaingáꞌiákeꞌ bona tiꞌara kuliungi lao mampoewaliákoꞌ,
noꞌonoꞌ woꞌo io,
tiꞌarakoꞌ peisá moliungi watu deꞌe mampoewaliáꞌaꞌ.
53 Pueꞌ Ala to napenómbái Burahima pueꞌmu,
hai Nahori umángkuꞌ,
hai to rapenómbái woꞌo umáraꞌ,
Ia miꞌi to motangaꞌ-tangaꞌi podándintaꞌ deꞌe.”
Roo onoꞌ,
Iako modándi i lalu hangaꞌna Pueꞌ Ala to napomahile Isakiꞌ umána,
bona ina napeuláꞌi ntepuꞌu dándiraꞌ.
54 I wongko buluꞌ iti,
ia mosambale miꞌi hambaꞌa binataꞌ napopenómbá i Pueꞌ Ala.
Roo onoꞌ,
nawáwáháheꞌ upu-upu bona mandeꞌheꞌ hingkakani,
hai roomoheꞌ mandeꞌ,
hambengiheꞌ ionoꞌ.
55 Kahalona mepulo-pulo,
Lábá moángkiheꞌ ánáꞌna hai ueꞌna,
nawátiꞌheꞌ,
haneꞌi mesuleꞌ miꞌi lao i tampoꞌna.