Kakadakena tauna
6
Kamarue-rueá,
katetátámbáiá tauna i humalele duniáꞌ,
hai katetátámbáiá woꞌo ánáꞌraꞌ towawine.
2 Ánáꞌnaheꞌ Pueꞌ Alaa moita kamalásáꞌraꞌ ánáꞌntawine tauna i duniáꞌ,
hai mampotoinaheꞌ heáná peá to raundeꞌ.
3 Mewaliꞌ mongkóráꞌ miꞌi PUEꞌ,
“InaoNgkuꞌ tiꞌara ina ara oaꞌ i lalu tauna duuꞌna i rue-ruena,
láwiꞌ tauna hangaa-ngaa mate.
Mantepuꞌu deꞌe-deꞌe,
tinuwuꞌraꞌ tiꞌara peisá meliu hangko i hangatu rompuloꞌ parena.”
4 I tempó iti hai i tempó to hangko ionoꞌ,
araheꞌ tauna to mahile ntepuꞌu wátáraꞌ to tueꞌ i duniáꞌ.
Hai i tempó iti woꞌo araheꞌ ánáꞌntawine,
pemuleꞌáraꞌheꞌ tauna to mohamboko hai ánáꞌna Pueꞌ Ala.
Pemuleꞌáraꞌ tauna to mahile iti mewaliꞌheꞌ tadulako to maróhó hai teádái hangkoia.
5 Naita miꞌi PUEꞌ kadake ntepuꞌuheꞌ tauna i duniáꞌ;
upu-upu to rapekiri to kadake peá,
6 onoꞌ miꞌi haneꞌi masusa laluNa.
Nauliꞌ i laluNa,
“Kerángina miꞌi tauna tiꞌara Kupopewaliꞌ i duniáꞌ.”
7 Nauliꞌ wopiꞌi PUEꞌ,
“Ina Kupatunaheꞌ tauna hingkakani hai hinángkáꞌna binataꞌ,
tádáhi hai binataꞌ to mendólóꞌ.
Masusa laluNgkuꞌ láwiꞌ Kupopewaliꞌheꞌ.”
8 Agáiáná ara hadua tauna to mopagóeꞌ laluna PUEꞌ,
ia miꞌi Noho.
Noho
9-10 Deꞌe miꞌi daritakáná Noho.
Ane ánáꞌna,
táluheꞌ paka tobaleilo.
Hangaꞌraꞌ Semuꞌ,
Apeꞌ hai Hama.
Noho deꞌe,
tauna to manótó laluna,
to tiꞌara rasalaꞌi tauna láwiꞌ maroꞌa ntepuꞌu pohintuwuꞌna hai Pueꞌ Ala.
11 Agáiáná i tempó onoꞌ,
upu-upuheꞌ tauna ntániꞌna kadake i peitána Pueꞌ Ala,
hai iumbá-umbá peá maseke ntepuꞌuheꞌ.
12 Naita Pueꞌ Ala,
tauna i duniáꞌ kadake bábehiáraꞌ,
láwiꞌ mouláꞌ peheꞌ peundeꞌána laluraꞌ to kadake.
13 Mewaliꞌ,
mongkóráꞌ miꞌi Pueꞌ Ala i Noho,
Nauliꞌ,
“Roo miꞌi Kubutusi:
ina Kupatuna tauna hai upu-upu to tueꞌ i duniáꞌ deꞌe,
láwiꞌ ánti bábehiáraꞌ tauna,
duniáꞌ deꞌe bukeꞌ hai to kadake.
14 Mewaliꞌ hangaa-ngaa nubábehi hambuaꞌ duanga to mahile hangko i kau to maróhó.b
I lalu duangamu iti,
hangaa-ngaa nubábehi woꞌo bahangapa wuaꞌna lintuꞌ.
I rawana hai i laluna hangaa-ngaa nutaru.
15 Kakálángána duanga iti nubábehi hangatu tálu puloꞌna hai tálu mete,
kamaeláꞌna rompuloꞌ hai romete,
hai kamapángkáꞌna hampuloꞌ hai tálu mete.
16 Hangaa-ngaa ara woꞌo atuꞌna,
hai atuꞌ iti rawumbui hungkuꞌ hantangaꞌ mete kamapángkáꞌna.
Duanga iti hangaa-ngaa tálu usuna,
hai nubábehi babaꞌna i tumpipina.
17 Hangaa-ngaa nubábehi noꞌonoꞌ,
láwiꞌ ina Kupaꞌara uwai to ina molábóꞌ duniáꞌ deꞌe duuꞌna upu-upu to tueꞌ i duniáꞌ ina tuna.
18 Agáiáná ina Kupaꞌara hambuaꞌ pototowi bona mohintuwuꞌkoꞌ hai Kódóꞌ.
Mesuaꞌmokou i lalu duanga to mahile iti hingkakani hai toinámu,
hai upu-upuheꞌ ánáꞌmu hai toináraꞌ.
19-20 Hangaa-ngaa nuántiheꞌ i lalu duangamu pákáꞌ-pákáꞌna tádáhi hai binataꞌ to tueꞌ i duniáꞌ,
tepasuaꞌ to mendólóꞌ,
hamboko-hamboko,
bona tiꞌaraheꞌ tuna.
Upu-upu binataꞌ iti ina haweꞌheꞌ i duangamu bona nukádipuráheꞌ.
21 Hangaa-ngaa nuánti hinángkáꞌ pandeꞌ to niparaluu,
hai nupatimama woꞌo upu-upu pandeꞌ to ina raꞌandeꞌ binataꞌ to mesuaꞌ i lalu duangamu.”
22 Upu-upu to nahawaꞌá Pueꞌ Ala,
napeuláꞌi mpuꞌu miꞌi Noho.