Duniáꞌ nalábóꞌ uwai
7
PUEꞌ mongkóráꞌ wopiꞌi i Noho,
Nauliꞌ,
“Hangko i oloꞌraꞌ upu-upu tauna to tueꞌ deꞌe-deꞌe,
io peá to manótó i peitáNgkuꞌ.
Mewaliꞌ,
mesuaꞌmokoꞌ i lalu duanga to mahile hingkakani hai tinámu.
2 Hangaa-ngaa nuántiheꞌ pitu bokona hangko i pákáꞌ-pákáꞌna binataꞌ to tiꞌara rapáliá hai to peisá rapopenómbá i Kódóꞌ.
Ane binataꞌ to ntániꞌna,
hamboko peá to nuánti.
3 Hangaa-ngaa nuántiheꞌ woꞌo pitu bokona hangko i pákáꞌ-pákáꞌna tádáhi.
Upu-upu iti hangaa-ngaa nubábehi bona peisáheꞌ memuleꞌ i duniáꞌ,
4 láwiꞌ pitu rái alona ina Kupopendáulu udá to tiꞌara ina wóró iba puloꞌna alona hai iba puloꞌna wengina kamaruena.
Ina Kubábehi noꞌonoꞌ bona upu-upu to Kupopewaliꞌ to tueꞌ i duniáꞌ ina tuna.”
5 Upu-upu hawaꞌna PUEꞌ,
napeuláꞌi mpuꞌu miꞌi Noho.
6 I tempóna duniáꞌ nalábóꞌ uwai,
tinuwuꞌna Noho ini átuna parena.
7 Noho hai toinána,
hingkakani hai ánáꞌraꞌ hai toináraꞌ,
mesuaꞌheꞌ i lalu duanga to mahile bona tepatueꞌheꞌ hangko i kanalábóꞌna uwai i duniáꞌ.
8 Haweꞌmoheꞌ woꞌo pákáꞌ-pákáꞌna tádáhi hai binataꞌ,
tepasuaꞌ to mendólóꞌ,
maroꞌa to peisá rapopenómbá i Pueꞌ Ala,
maroꞌa to tiꞌara.
9 Hamboko-hambokoheꞌ haweꞌ i Noho hai mesuaꞌheꞌ i lalu duanga to mahile,
láwiꞌ noꞌonoꞌ miꞌi párentána Pueꞌ Ala i Noho.
10 Pitu alona hangko i polaluitaraꞌ Pueꞌ Ala hai Noho,
mantepuꞌu miꞌi duniáꞌ nalábóꞌ uwai.
11 Magáná miꞌi tinuwuꞌna Noho ini átuna parena,
i alo kahampuloꞌ hai pitu wulá kaduá,
tebungkáhi miꞌi hinángkáꞌna rárá uwai i lalu tampoꞌ.
Hai langiꞌ tebungkáhi miꞌi woꞌo duuꞌna kebuꞌu udána.a
12 Kamaruena udá iti iba puloꞌna alona hai iba puloꞌna wengina.
13 I alo kapitu iti,
Noho hai toinána mesuaꞌheꞌ i lalu duanga to mahile hingkakani hai ánáꞌraꞌ to tálu,
ia miꞌi Semuꞌ,
Hama hai Apeꞌ,
hai upu-upuheꞌ toináraꞌ.
14 Hingkakani hai hira,
araheꞌ woꞌo mampopengaa tádáhi hai binataꞌ,
tepasuaꞌ binataꞌ to mendólóꞌ.
15-16 Hintotoꞌ hai hawaꞌna Pueꞌ Ala i Noho,
upu-upu binataꞌ iti mesuaꞌheꞌ i lalu duanga to mahile hingkakani hai Noho,
hamboko-hamboko.
Roomoheꞌ mesuaꞌ,
PUEꞌ motuko babaꞌna duanga iti.
17-18 Iba puloꞌna alona hai iba puloꞌna wengina kamaruena,
katetátámbáiá uwai to molábóꞌ duniáꞌ duuꞌna támpu miꞌi tampoꞌ,
hai duanga iti monanto-nanto i wongko uwai.
19 Tetátámbái oaꞌ kahandaꞌna uwai duuꞌna támpu upu-upu buluꞌ.
20 Uwai iti liliu mengkaheꞌ haweꞌ i pitu mete hangko i tutuꞌ buluꞌ.
21-23 Noꞌonoꞌ miꞌi rárána Pueꞌ Ala mopatuna upu-upu to meinao to tueꞌ i duniáꞌ deꞌe,
iamoheꞌ mampopengaa tádáhi hai hinángkáꞌna binataꞌ,
maroꞌa to manondoꞌ ba to maila,
hai upu-upu tauna.
Bateꞌraꞌ peá Noho hantámbi hai hinángkáꞌna to ara i lalu duanga to mahile to tiꞌara napatuna Pueꞌ Ala.
24 Uwai iti molábóꞌ duniáꞌ deꞌe hangatu lima puloꞌna alona kamaruena.