T'ibraatfaatkiiwwa, y'eegrimaawwa, ikishiyaayee dehaaywa oomkir
5
01 Eegrim tak amaag baadaaniina,
laakiin barooh baabiitook diiseet anfaraada.
Y'areereewa aree isanaayeetook amshabaaba.
02 Teem'a t'eegrima tifarooteet amshabaaba,
t'aagira daayiit nhisuuytii amshabaaba.
03 T'ibraatfaatki sidik shanhatiyaat ibariint daayiib amshabaaba.
04 Laakiin t'ibraatfaatki ar tari ari ar tibariyeek,
hankaab udiinoohna rhiseeneet toonaati.
Indhiwaayeehna dehaay ishboobiineet toonaati.
Aflaay bak aree ifarooyeehwa yhoobeehwa hag ikweesna.
Tuun tuuna Ukwaasana afirhistini.
05 T'ibraatfaatki sidik shanhatiyaat tibariit ood'ooh atoo'ishaat is'aya Ukwaasanaay daastini,
whawaadwa oomb'eewwa aree siileeltini,
Ukwaasana aree shamaamt araatamtini.
06 Laakiin t'ibraatfaatki nafirnayteeb kwarriit masi dhhaniit tikatiyeek han ayaati.
07 Oodehay een ibhali sooya.
Aflaay gaal han yaay itmuuyi kiidi.
08 Gaal han y'aydeeh biishaameek,
tari aree indhiwaayeeh idawil biishaameek,
baruuh w'iimaan tawaayu,
ukeefriika aree amaagkaab ikati.
09 T'ibraatfaatki asagwir tamuun hasamaat bitkaayeek,
t'ibraatfaatkiyaati geeb kitehasab.
Batuuh gaal tak oobhaat d'aart tikati.
10 Batuuh idaayi shagaay atookaknaat tikati,
bak aree y'areeh daayiib sehamaat tikati.
Hadareet tikati,
Ukwaasanaay udehayi iragada shangwiidh,
igwirhaayeeb eefeen teeshtiim,
ugarooyooh aree kassooh idaayi shagaay dehaay soomraat tikati.
11 T'ibraatfaatkiya tidadis baliit t'ibraatfaakiyaati geeb baadhigwiiya.
Bataah d'areeb eet id'anihoob,
Umasiihii fidinti giigeen.
12 Aflaay bataah bariiyooh geeb id'iineeb uwaadiya kit'atiit gwababeet kina ikatiin.
13 Bataah masi oogaw ugawii dehaay hawrariikee idamaneeh kwidhseen.
Laakiin bataah masi amaagkaat ikatiina,
yaandiintwa hararfiridwa allamameena,
hasir hooy biibariini bhali bhaliiyeen.
14 Aflaay t'ibraatfaatki tidadis eed'ariineet toona asehariiw.
Firaay id'aneet toonaatu,
igawaayeehna itakwikwneet toonaati.
Aflaay bataah y'ashooyeen biineewsayna hoon.
15 Ibraatfaatkiit gwadit suur akay ifdinni giigiyaaniit oobliis iramna.
16 Takat masiihiit udehayyooh ibraatfaatkiit tibariyeek,
batuuh bateeh teeshtiimeet toonaati.
Bateeh tukaniisaati kehii rabeeb bitkwaas.
Shaawti tukaniisi baliit t'ibraatfaatki sidik shanhatiyaat ibariint teeshtiim.
17 Isuurkina tukaniisi daayiib suurkinaameen,
malu doora hamooysamtiniit takwi ibariin.
Baliin aakna ishagaayuuhna bhaliitiibwa allamtiibwa ikatiyeeba.
18 Uuktaab <<Uuyu wharru eetiiniyihoob eefiir baahakwiira.>>
indi.
Uuktaab masi <<Ushagaamana ukraayooh marriyeet toonaati.>>
indi.
19 W'eegrimi kehii tehimaat ikwasiinihoob,
maloob tari mhay baadehi biibadehaneek baasinaakira.
20 Baliin tumaagnaay ikwasiin,
udehayi suurii imeedniinna.
Aflaay uudehay uuraaw ireekwna.
21 Ukwaasanaay suuriiwwa,
Umasiih Yasuu'i suuriiwwa,
imalak itageegaayi suuriiwwa,
teen tiwasi girad anu tisnaakiireet toona ani sooyani hook.
Ishaga tid'anihoob aree udehayi arrareestiib baashagaamaana!
22 Y'ayeek udehayi kehii biruurii dehaay baa'ashshiga,
weer dehayiit maagtiib aree baashuuma.
Ugarooyook kaleewaat sinhasa.
23 Yam eebhaat baagw'aa.
Oof'iyook sabbiiwwa,
diimaab tulhanaaytiyook sabbiiwwa shalik ha gw'aa.
24 Dehay gaalnaay idanib lawaaba,
tumaagtuuhna baraah hooy haakameeneeb oomhiin suurii kantiim.
Oodehay uraawi danib aree bareeyooh har'ii sakeen.
25 Oont'aaneet,
idaayi shaga lawiini,
ubaalawii han itkwabbiisee dehaay ka'adgiriya.