Buulusiib ujawaab umalya Tiimootiib eebiib
1
01 Buulus ulinguuma Umasiih Yasuu'iib Ukwaasanaayt niyaatii linguumaab iiktiib,
Umasiih Yasuu'iib t'amshawawiyooytiib ikatiib umidhhani waadiyaay isootii dehaay linguumaabi.
02 Tiimooti w'ooru whayis ani barook beeti akantiib:
Ukwaasana Ubaabaaywa Umasiih Yasuu'a W'ankwanaayiisoonwa ikatiin tin'imaawwa,
tirhamaawwa,
um'asigwa miriya.
W'iimaani jillaay tis'akrooy
03 Ani Ukwaasana ahamid,
aniib yhooba id'iineet toonaatiit,
ani han barooh nhast niyaatii shagaamani.
Siileelaniyihoob aree whawaadwa oomb'eewwa diimaab barook sh'ani.
04 Bariiteek teemlu sh'aniyihoob winneet rheesamtiyook aharriiw,
aflaay firhaat han eettiib akati.
05 W'iimaanook oonhas ani sh'ani,
w'iimaan suur hootook Looyisiib iifi,
malya aree deetook Afniikiib daaya.
Oont'a han barook hook eefiyeet toona eetehak kaabari.
06 Oon usabbii,
ani y'ayi kehook daasanihoob timriyeeb Ukwaasanaay oomiyaaw daayiib tishidhhiineet toona ani sh'asani hook.
07 Ukwaasana mirkwaayi shuuk hiiyyaayoon kiiki.
Laakiin akriri shuukwa,
reeri shuukwa w'adabwa yhii hoon.
08 W'ankwanaayiiteen tibadeha bandeheet toona hooy baasikw'a!
Tari aneeb bariiyooh abuuki akatiib han hoosu baasikw'a!
Laakiin Usakana Udaayiinaay jillaay ikatiint tilhanayteeb geebu daaya.
Bataah Ukwaasanaay akriree ikatiin.
09 Ukwaasana ishidhhan hoon,
mugaddas midhhanii dehaay aree waliikiya hoon.
Hinin naat nid'iyeet tunaati sabbii kiiki,
laakiin barooh ooknaay hadafwa n'imaati sabbiiwwa ikwasi.
Teen tin'ima Umasiih Yasuu'iib nimriyeet udamaani badooti hankaay nimri.
10 Laakiin hinin W'ishidhhiin,
Umasiih Yasuu'a lawiyanihoob,
oont'a bataah dehoon lawiyaan.
Baruuh tooyat idir,
Usakana Udaayiinaay aree umidhhan udaayim lawisiya.
11 Oon Usakana Udaayiinaay isooti jillaay aree Ukwaasana aneeb linguumaawwa allamanaawwa ikwaaseheeb.
12 Oon usabbii aree ani bak lhamani.
Ani aab aamananiyeeb akteen akay,
masi sikw'aab kaaki.
Ani beet tooyintii dehaay barooh aamanaab akatiyeet teena,
baruuh ingw'iideet toona eetehak kaabari.
13 Baruuk anii timaasweet toona,
daayi allamtiibuuyt daayiib kaleewa.
W'iimaanwa ooreerwa Umasiih Yasuu'iib eefeenaay daayiib kaleewa.
14 Baruuk dehaay ammanamaab tikatiyeeb udaayi miraay daayiib gw'ada.
Eeshuuk Imugaddasa hoon ikweer bareesooh shamaamtii oomraay daayiib gw'ada.
15 Aasiyaay whaashiib eefeen kassaah aneeb y'ishneet toona baruuk tikteena.
Fiijiluuswa Harmoojinooswa han y'ishni id'iinheeb.
16 W'ankwana Oonisifroosi dhiwa rhamaat barhisi.
Baruuh gwida doora afirhisiyaheeb.
Ani haay amhakwiraab iiktiyeet tishinshila han baruuh hooy sikw'aab kiiki.
17 Laakiin baruuh Roomaab eeyanihoob,
willa aneeb imriyeeb ookiik yhariwheeb.
18 Baruuh beet tooyin W'ankwanaay rhamaat marriyeet toona,
W'ankwana ba'iyaaw.
Baruuh Afasoosiib gwida salalaayee ishameetu toona baruuk daayiib tikteena.