2
01 Aflaay baruuk w'ooruun,
Umasiih Yasuu'iib eefeent tin'imaateeb akira.
02 Ani gwida baadehi suurii sooyee timaasweeb it'aliim oodehay usidkiib dehaay ammana.
Baraah oodehay ooraaw aree allami iyadna.
03 Umasiih Yasuu'i kajaraayi udaayiinaayt,
igwirha geeboon amtaraama.
04 Kajaraayiib ikati gaal aree oodehayi shanhiib w'ayooh kiid'i.
Baruuh udaabit bariiyooh suurkina ikatiib afirhistiib harriiw.
05 Bak aree,
gaal dhaabanaab ikatiyihoob,
idhabi gaanuun kantiit imgirib biidiyeek,
tinasraati taaj kanuunamiya.
06 Udir'aatkina ushagaamana wharrooy w'adhidh awwal iniineet toonaati.
07 Oon ani andiyeet toona ugin'ook hooy d'iya.
W'ankwana toon toona kastooh rhisi hook indi.
08 Yasuu'a Umasiih sh'aa!
Baruuh tooyat hooy yakamiya,
Daawidiit dirriyaaytii aree ikati.
Uun baruuh aniib usakana udaayiibu,
09 ani bariiyooh jillaay lhamani,
maagtakiit shinshilaatee han amhakwaar.
Laakiin Ukwaasanaay ibhali shinshilaatee hakwar kiikeen.
10 Aflaay uwaasamti jillaay naatka amtarriim.
Baraah han Umasiih Yasuu'iib eefeeb umidhhan umatuun udaayimi geeb imeernee dehaay adgireen.
11 Tooy aree sidki miyaad eefi:
hinin bariiyooh geeb niyaayyeek,
bariiyooh geeb han nikwaar niyad.
12 Hinin nimtariimeek,
bariiyooh geeb han had'aab niikti niyad.
Hinin barooh nittawiyeek,
baruuh han ittiw hoon indi.
13 Hinin sidkiib binkaayeek,
baruuh sidkiib iikti indi.
Baruuh ugarooyooh kiitiwi.
Ushagaamana Ukwaasana waasiyaneeb
14 Teen teena bareeh Ukwaasanaay suurii sooyaa!
Bhaliyeeb bii'amhassaayneet toona sh'asaa.
Tuun tuuna naf'aat kitbari,
baliib bareeh isnaakiir aree eekna kat'itni.
15 Ukwaasanaay suurii daayiib waasamaab tikatiyi jillaay daayiib shagaama.
Ushagaamana ishagaayiisooh kiisikw'a,
baruuh aree usidki bhali daayiib kaleewiini.
16 W'amgwasuuraawwa wharaayfiridwa hooy tara,
baraah aakna oodehay Ukwaasanaay salalii isiisagiin.
17 Baraah allameeneet tuuna tilhanaaytiit itbirir tindi.
Bareeyooh bitik Hiimiinaayooswa Fiiliituuswa eefeen.
18 Baraah oosdik y'ishniit fidnaab giigiyaan.
Baraah uuyak suur iki iyadna,
dehay gaalnaay w'iimaan aree kat'een.
19 Laakiin w'asaas w'akraab Ukwaasana kwaasaab ikatiyeeb gaal han kahankalisiya.
Bariiyooh kehii aree aan ibhali kataba,
<<W'ankwana baliib bariiyeeh ikatiin ikteen.
Baliin baraah Ukwaasanaay nikati iyad aree kassaah ibakii tumaagti shagaay it'agiirneet toonaati.>>
miyaad hooy kataabi.
20 Win gawiib gwida jinsa shhanwa koobaatwa eefeen.
Gwadi dim'araawwa ashteetiiwwa daamaaba,
wari aree hindiiwwa haashiiwwa daamaaba.
Gwadi tageegaat daayiinaaytii dehaay daamaaba,
aaraw aree takweet kiibariin.
21 Uutak ugarooyooh tumaagtii isinhiiseek,
baruuh daayiit takweeti tak iikti indi.
Baruuh mugaddas ikati.
W'ankwanaayooh dehaay ishboobi,
udaayi shagaay dehaay aree iitmar indi.
22 Y'areereewa id'aneet teena teemag hooy tara!
Tooshbu d'iya,
oosdikwa,
ooreerwa,
um'asigwa d'iya.
W'ankwana nhas gin'ii waliikeen baliini geeb daaya.
23 Y'afreewwa w'amaag amgwasuuraawwa hooy sigiya.
Een bareeh w'agiyaayuuh hasiyaayt tikatiyeet toona baruuk tikteena.
24 W'ankwanaay ushagaamana aree ibakii biihasaayeet toonaati.
Laakiin baruuh ibakii kassooh udehayii dehaay nhas niyaay ikati,
allamiiniib ikati,
tarmuumaab ibari tak aree ikati.
25 Baliib barooh imgwashiish shoobshaay sooyiini.
Ukwaasana bareeh usidkiit kanaan beeti mitiyaayiit,
tuubsiiniyeet toona s'ayaamiini.
26 Baraah aakna tumaagtii agartiit oobliisi sharak hooy iidhhan iyadna.
Bareeh uubliis abuukiib kwaasaabuuyt,
baruuh yharriiweet toona isid'i.