Eemb'i y'aakhareeb
3
01 Laakiin toon toona ugin'ook hooy d'iya:
eemb'i y'aakhareeb beentooy gwirha iiktiin iyadna.
02 Uudehay ugarooyooh areeyeen ikatiina,
imhallaga areeyeena,
kibiriib ikatiina,
girmaay riguugeena,
neeweena,
ifarooyeehna kiisinaakirna,
afreeyeena,
aree takweet eetniiwna.
03 Ka'areeyaana,
ka'afooyaana,
italisna,
ugarooyooh kakaleewiyaana,
amaagwaraayeena,
tooshbu eeribna,
04 eetilna,
ashshigeena,
kibir eettiibna,
Ukwaasanaay ureeriika tuduniyaatiit nafirnay areeyeenkaab ikatiin.
05 Baraah udiini dehay t'iiteeb massalameen.
Laakiin udiini akrir ittawiin.
Been oodehay hooy sifana.
06 Gwadi bareesooh udehayi gawa shuumeetiit teem'a w'iimaaniib n'akwt y'abikna.
Bataah aree maagt atabta,
kastooh amaag niyaat ibariin.
07 Bataah diimaab allamameena laakiin door han oosdik kasooyaan.
08 Yanniswa Yambireeswa Muusaab im'akaarna,
aan baraah han oosdik imooriibna.
Uudehay igirmaayaahna daayiib biishagaamayneeb w'iimaan eeribna.
09 Laakiin baraah kiisigiina,
uudehay kassuuh aree baraah afray ikatiineet toona rhi iyadna.
Beet tuuna Yanniswa Yambireeswa bak dehaay tiki.
Buulus Tiimootiib sooya
10 Baruuk laakiin aniib w'allamti kassooh tikteena.
Aniib w'adabwa,
ani tuduniyaatiib harriiweet toonaawwa tikteena.
Aniib w'iimaanwa,
utarmuumaawwa,
ooreerwa,
oosbirwa kassooh baruuk tikteena.
11 Amaagwaraabwa,
lhanaytwa,
kastaah taan taana Antaakiyaaywa,
Ikoonyoomeewwa,
Liistiraaywa,
anii deha ikeeneet toona tikteena.
W'amaagwara ani amtarraam.
Masi aree W'ankwana kasteeh teen teena hooy ishidhhanheeb.
12 Sidiku,
Umasiih Yasuu'iib umidhhani kwiraay harriiwka amaag itweeri.
13 Laakiin y'amag daawwa,
dangar infiishaawwa tumaagtii amaagkaat maagt beeti sakeena,
eetilna aree itootiilna.
14 Laakiin baruuk toona allamamaab tikatiyeet soorarima,
batooh aree daayiib haay aamana.
Baruuk y'allamanaayaak aayga ikatiineeb tikteena.
15 Baruuk dis oor tiiktiyihoob sh'aa!
Baruuk Eektab Imugaddasa tikana.
Aan aaktab barook tifagarandi umidhhan istoobiint yhiin hook,
umidhhan Umasiih Yasuu'iib w'aamantii ikatiib yhiin hook.
16 Uuktaab kassuuh Ukwaasanaay Ishuukee attiyeewiyaab,
w'allamtii dehaay anf'iini,
danniin,
eetkwiikw,
tooshbu aree islamiid.
17 Aflaay uutak Ukwaasanaay dehaay shagaamiiniib tudaayiinaayti shagaay dehaay daayiib gadh'amaab ikati.