4
01 Ukwaasanaawwa Umasiih Yasuu'aawwa haayee,
y'ayaabwa idhhaniibwa yhikim indiib,
baruuh laweetiit had'aab ikatiyeet toona sooyani hook.
02 Tudiigwat oodehay kassooh sikatima,
tehibiiwwa umhagaayiiwwa oodehay shiishbooba,
dinina,
s'akira,
winneet tarmuumaab d'iya daayiib aree sooya.
03 Damaan y'iini uudehay udaayi madehaba kiisinaakirna.
Laakiin baraah aakna yhariwneet teena iitram iyadna,
gwida kooja aree geebooh dibiltiit y'angwil yayamseen bhali dehaay hadiideen.
04 Baraah oosdik biimaasiiwnee dehaay y'angwil dhadhibseena,
whararfirdi mitaal isnaakiirna.
05 Laakiin baruuk kassooh oodoor ishuukeek kaleewa,
igwirha amtarraama,
aree Usakana Udaayiinaay ibhaliiti shaga d'iya.
Baruuk Ukwaasanaay shagaamana tikatiyi sabbii kastooh tuwaajibtook tikwikwa.
06 Toos'a ani karaamaat hooy iikti andiyeet shaawti y'aatu,
ani tuduniyaatii hooy giigi andiyeeb uurdoor y'aabi.
07 Ani oofnaay daayiib finaayan,
w'amgaruuba aree faayisan,
w'iimaan han kaleewan.
08 Oont'a oodehay eeshbooni taaj umikhsaniib aneeb hangiit.
W'ankwana Ugaadi uushboob beet tooyin ootaaj iyaawheeb indi.
Aneeb oobhaat aree kaaki,
laakiin bariiyooh ilawtii dehaay hay'aab han kassaah ootaaj imaar iyadna.
09 Anii dehaay willa eetniyeet toona sehariwa.
10 Deemaas toon tuduniya areeyiini akay aneeb y'ish id'iiteheeb Tasaaluuniikaab beeti idif.
Kireeskiis aree Galaatiyaab beeti idif,
Tiituus han Dalmaatiyaab beeti idif.
11 Luuga uubhaat geebu eefi.
Maarkoos hariwaat geebook haay m'aa.
Baruuh aneeb ishagaay eeshtiimheeb akay haay m'aa.
12 Tiikhiikoos aree Afasoos beeti astoob.
13 Baruuk eetniyihoob,
Taruwaaseeb Kaarboosi geeb asheet tusideeriyaay t'aniit haay m'aa.
Aniib imiksaswa eektabwa han haay m'aa.
Eektab whakooy daamaab eekna aree haay m'aa.
14 Iskandar ubalooykwootana gwidaat maagnaay iweerheeb.
Beet tumaagnaay aree barooh W'ankwana hooy itkwis indi.
15 Baruuk han barooh hooy digwagwa,
baruuh tudiigwattoon wineet ribaabi.
16 Ani ugarooyu ishidhhini jillaay toorsamanihoob,
gaal han geebu gadaab kiiki.
Laakiin kassaah y'ishni id'iinheeb.
Ukwaasana aree toon toona bareeh kehii biid'iyeet toona aharriiw.
17 Laakiin W'ankwana anii geeb ingadaayt akrir yhiiheeb.
Shaawti ani toon tudiigwat kastooh Ijintiili eemsiiwni jillaay sooyan.
Ani aree tooyat istoobiib whukwimii adhhan.
18 W'ankwana kastooh tumaagtii ishidhhinheeb indi,
tibreeteeb teefeet tehad'aayeetooh aree asgaa istuubheeb indi.
Umatuun diimaab bariiyooh ba'iikti.
Aamiin.
Aakhareet tusalaam
19 Biriiskillaawwa Akiilaawwa shiboonaaka salaama.
Oonisiifroosi dhiwa han shiboonaaka salaama.
20 Araastuus Koorinteeneeb is'a,
Turoofiimuus aree lhaab akay Miileetooseeb ash ad'i.
21 Tehibiiti dabaay tooy daatniyeet toona hariwa.
Iyuubiluus shiboonaaka salaamiini hook,
Buudeen han shiboonaaka salaamiini hook,
Liinoos shiboonaaka salaamiini hook,
Kilaawdiyaawwa kassaah isanaawwa han shiboonaaka salaameen hook.
22 W'ankwana bariiyeek ishuuki geeb daayi indi.
Tin'ima geebook ba'iiktiin.