Buulusiib ujawaab w'awwaliib Tiimootiib eebiib
1
01 Ani Buulus,
Yasuu'a Umasiihi linguuma akatiib,
Ukwaasana W'ishidhhiinoon sooywa,
Yasuu'a Umasiih hineeb is'aya akatiib linguumaawwa,
oon ujawaab barook beeti akantiib.
02 Tiimooti w'iimaaniib usdiki san w'aniib:
Tin'imaawwa,
tirhamaawwa,
um'asigwa Ukwaasana Ubaabaaywa Umasiih Yasuu'a W'ankwanaayiisoonwa ikatiin miriya.
Whaggi allamana igwisreenee digwagwna!
03 Ani suur Makidooniyaab abaayhoob barook sooyaneet tunaatiit,
aflaay Afasooseeb hagita.
Shaawti daab gwadib gwisri madehaba door han bii'allamayneet toona sooyaa!
04 Baraah shaawti wharaay mitaal baa'angaadt hoobeet sifaarariyooytwa isingiidneet toona sooyaa!
Tuun tuuna aree Ukwaasanaay shaga w'iimaanii ikatiib ishti d'iit amgwasuuraab tikwasi.
05 Toon tuwaseeti hadaf aree ooreer ikati.
Uureer nhas gin'iiwwa,
nhast niyaatiiwwa,
daayi iimaaniiwwa ikati.
06 Gwadi teen bateeh hooy isgiini hawriikiyaaniit,
naf'aat baabari bhaliiyeeb daayaan.
07 Baraah whaggi allamana ikatiineet yhariwna.
Laakiin baraah naan hadiideeneeb kiikanna tari naan akra gin'ii sooyeeneeb kiikanna.
08 Gaal whag tikwikwti haay shagaamiiniyeek,
daayiib ikatiyeet toona nikteen.
09 Whag aree tushbooti dehayii dehaay daamaab biikaayeet toona han nikteen.
Laakiin whag kat'eenwa,
iroobanaawwa,
ikeefriiwwa,
tumaagti kinaawwa,
idhibaabwa,
oodiin baabariibwa,
baliib baabeehna tari deeteehna eedriinwa,
imadooraawwa,
10 ijakiinaawwa,
ifaasdaawwa,
ikishiyaayi b'iishraayanaawwa,
igwisreewwa igwisreet badehaateewwa,
tari baliib umadehab udaayiib imooriibwa,
een bareeyooh dehaay whag daamaabi.
11 Beet tuuna Usakana Udaayiib Ukwaasana utageegaab ubaarkamaanaay ikatiinaay titmari.
Baruuh aree aneeb dehaay ammaniyaheeb.
Buulus W'ankwanaayt n'ima imri
12 Ani Umasiihi Yasuu'a W'ankwanaayoon ahamid:
baruuh y'akrir yhiiheeb,
aamananaab ikwaaseheeb,
bariiyooh ishagaamtiib id'iheeb.
13 Ani door gaal suur keefriibu,
barooh amaag aweeraayt neewaneek han,
gamaamtiiwwa w'aamanti naawiiwwa d'iyaabuuyt afooman.
14 W'ankwanaayiitaan tin'ima winneet gwidaat anii kehii ifafna.
W'iimaanwa ooreerwa Umasiih Yasuu'iib ikatiin geeb anii kehii ifafna.
15 Tooy aree sidki miyaad daayiib gabbalamtiib astehaliiniib eefi;
Umasiih Yasuu'a tumaagti dehay ishidhhiini jillaay toon tuduniyaatiib y'aabi.
Ani aree bareesoohka amaagkaab akati.
16 Laakiin beet tunaati sabbii ani rhamaat attiyeewaay.
Aflaay ani tumaagti kina w'amaagkaab akatiinaay tarmuumaab irhisti jillaay Umasiih Yasuu'a aneeb misaal ikwaaseheeb.
Baliib malya barooh aamaneen iiktiinwa,
umidhhan udaayim imeer ikatiinwa,
bareeyooh dehaay misaal ikwaaseheeb.
17 Oont'a Whad'a udaayim,
ubashar baakaay,
ubaalawayii dehaay,
Ukwaasana oongaal whamooyseewwa umatuunwa diimaab bariiyooh ba'iikti.
Aamiin.
18 Tiimooti w'ooru,
een ibhali bariiyook siruudiib door gaal attiyoodiyaab aniiw hook.
Shaawti een bareeh haay shagaama,
daayi fina finaayi tindiya.
19 W'iimaanook kaleewa,
daayiit niya d'iya.
Gwadi een bareeh iribniit,
w'iimaanoohna idirna.
20 Bareeyooh geeb Hiimiinaayooswa Iskandarwa eefeen,
ani bareeh oobliis nuunan.
Shaawti baraah biikafiirni jillaay allamami iyadna.