Inisrikaawwa ifarooyaahwa
6
Yaa inisrika,
baraak W'ankwanaay tikatiini sabbii,
ifarooyeekna sinaakirna.
Tuun tuuna aree daayiiti.
2 Uuktaab <<Baabookwa deetookwa hamooysa.>>
indi.
Tuun batuuh tuwasi t'awwaliit uwaadiyaay teefeet tikati.
3 Masi uuktaab <<Gwimad imirwa afirha midhhanwa imaar tindiya.>>
indi.
4 Yaa ifaru,
y'areekna baasehaasna.
Daayiib sehaamna,
W'ankwanaay salal allamaana aree sooyaana.
Ikishiyaawwa y'ankwanaawwa
5 Yaa ikishiya,
w'aadami ankwanaayeekna ibakii hamooysaana,
rikwiinaat sinaakirna.
Umasiihi nhas gin'ii shagaamtiina,
bareeh han nhas gin'ii shagaamaana.
6 Toon toona bareeyoohna igw'adi suurii bareeyoohna oorda rayiimti jillaay baad'iina,
laakiin kassoohoob bareeh afirhisaana.
Baraak Umasiihi kishiyaayeet,
aflaay kassooh ugin'iisookna Ukwaasana hookna yharriiweet toona ibakii d'iina.
7 Y'ankwanaayeekna kassooh ugin'iisookna shagaamaana,
bareeh W'ankwana ooknaayt shibibna,
udehayiit baashabiibna.
8 W'ankwana gaalka ijir iyaaw indi,
kishiyaab ikatiyeek hirriib,
tudaayiinaayti shaga id'anihoob ijir iyaaw indiyeet toona sh'aana.
9 Yaa y'ankwana,
ikishiyaayeekna ibakii bak daayiib weerna,
baafiikna.
Baraakwa ikishiyaayaakwa gaal Ankwana tibreeteeb eefeenaay tikatiina.
Oodehay kassooh aree girad anu jasaayiini.
10 Aakhar aree,
W'ankwanaay y'akrir iwawin bareek ba'is'ikirna hookna.
11 Ukwaasana hiiyyaayeekna ikatiyeeb igadh'i kweena.
Aflaay oobliisi talasaay ugarooyookna teheebna.
12 Hinin w'aadami kafinaasamna.
Laakiin amag shuuki dheesh tibreeteeb eefeenwa,
haakmaawwa,
had'aawwa,
toon tuduniyaati thibni had'aawwa een bareeh finaasamnay.
13 Aflaay Ukwaasanaay igadh'i oont'a gadh'amaana.
Malya been uumb'i w'amaag y'iiniyihoob,
w'ashooyt th'aayt im'ikir tiyadneet toona adgirteena.
W'agiya ookiik finaasami tiyadna,
masi aree umhiinookna daayiib ibik tiyadna.
14 Aflaay marna!
Oosdik tookliitiit libabna,
Ukwaasanaay w'adil aree oogwibi t'iiteena yhanbi hookna.
15 Usakana Udaayiinaay um'asgi isooti aree tigidh'aateet shabnaat marna.
16 Kassooh oodoor aree w'iimaanookna oogwibi t'iiteena fiyakna.
Oon barooh aree oobliisiit fina tibalooleent haay isingid tiyadna.
17 Umidhhan aree diitiit koofiyaaytiit kehookna daasaana.
Ishuuki b'adhadh,
Ukwaasanaay ibhali ikatiib han ahaana.
18 Kastooh toon toona siileeltii d'iina,
Ukwaasanaayt shamaam aree hariwna.
Kasteeh timanaasabaateeb siileelaana,
Ishuuki akriree diimaab siileelaana.
Oon usabbii aree digwagwna door han baagwooyna,
Ukwaasanaay oodehay kasseeh dehaay siileelaana.
19 Aneeb han deha siileelaana.
Ani ibhaliitii dehaay eetmiirihoob,
Ukwaasana aneeb diigwat iniiweetu toona dehaay siileelaana.
Aflaay ani daayiib bhaliiyaniib akati,
Usakana Udaayiinaay kwabast teena aree asookiin akati.
20 Oon Usakana Udaayiinaay sabbii ani Safiir akati,
oont'a laakiin ani whabsiib eefi.
Ani ibakii haay bhaliiyaniyeeb Usakana Udaayiinaay daayiib bhaliiyaniyee jillaay siileelaana.
Aakhareet salaam
21 Tiikiikoos,
usanoon daayi shagaamana W'ankwanaay ishagaay ikatiib,
aniib usakana kassooh iyaaw hookna indi.
Shaawti ani kak eefiyeeb iikan tiyadna.
22 Oon usabbii,
barooh bareekna beeti afandiig.
Baruuh hinin kassaan kak neefiyeeb sooyi hookna indi.
Bareekna han is'akiiri jillaay dehookna afandiig.