Unuuriib ookwiraay
5
Baraak Ukwaasanaay daayi ar tikatiini sabbii,
ibakii barooh t'iiteeb akeena.
2 Umidhhanookna ibakii reerii kwiriina,
Umasiih han areeya hoon.
Ugarooyooh Ukwaasana afirhiseent karaama ikwaasiit umidhhanooh hini jillaay nuuniya.
3 Baraak Ukwaasanaay dehay tikatiini sabbii,
jikuunwa tari najaasaatwa tari haamtiiwwa geebookna naat han biidaayayneet toonaati.
4 Amag bhaliiwwa,
tari hakwisitiiwwa tari hamiit kalmaatwa baadiina.
Laakiin Ukwaasana tehamidneet toonaati.
5 Een bareeh daayiib tikteenna:
unafar whaamaawwa,
unajiswa,
tari w'amaag sakanaawwa,
uun baruuh sanamaab anbiid ikati.
Unafar bak sakiiniib aree Umasiihwa Ukwaasanaayt tikatiit tehad'aayeetiib adhidh imaar kiidi.
6 Amag bhalyee aree gaal han biitiil hookna.
Ukwaasana oodehay barooh baasinaakiir jasaayiini,
amaagna bhaliiyeen han jasaayiini.
7 Aflaay bak t'iiteeb oodehay baa'araweesamaana.
8 Baraak iknaayaakna thibintiib tiifiina,
laakiin Ukwaasanaay dehay tikeeni sabbii oonuur timriina.
Aflaay oodehay unuuriib ikatiin t'iiteeb ibakii tikatiina.
9 Uunuur gwidaat shibootiit fir'aaytwa,
daayiinaaytwa,
oosdikwa haay y'iini.
10 W'ankwana afirhistiniina teekanneet toonaati.
11 Teena takweet baabariin uudehay uthibniib id'aneet baad'iina.
Laakiin bataah kak amagt ikatiineet toona rhisaana.
12 Thibniib daameent teena haay whadiidti han uukna nifir ikati.
13 Laakiin taan taana kak t'iiteet ikatiineeb uunuur rhisi indi.
14 Uunuur naatka daayiib rhisiini.
Oon usabbii aree aaktab: udiwana tun'ari hooy b'araa,
tooyat hooy yakaa.
Malya Umasiih kehook talawi indi.>>
diyaaba.
15 Aflaay kak tikweerneeb daayiib gw'adna.
Oodehay w'agimnaayt baakwiriina,
laakiin oodehay ufagarnaayt kwiriina.
16 Aan aamb'i amag imb'i ikatiini sabbii,
tufursa titimeerneet kasteeh daayiib haay anf'amana.
17 Aflaay baa'afreeyaana!
W'ankwana yharriiweet toona afhamaana.
18 Haab gw'eetiit baa'askiraana,
wha kwidhisiini hookna.
Laakiin Eeshuuk tabna.
19 Taktakee dehaay shiilaat diina,
midehana,
Shuukeet kafa aree kafaana.
W'ankwana kassooh ugin'iisookna hamidna.
20 W'ankwanaayoon Yasuu'a Umasiihiib oosmii diimaab naatii dehaayka Ukwaasana Ubaaba hamidna.
Yhiyyoowwa tehiyyoowwa
21 Umasiih hamooysaana oodehay ooraaw aree hankaab daasaana.
22 Yaa taam'a,
W'ankwanaayt eendeekna han naati hankaayka daasaana.
23 Umasiih tukaniisaati kehii had'aayeet ibariinaayt,
uutak han tutakatiyooh kehii had'aayeet ibari.
Umasiih uukna tukaniisi W'ishidhhiinu,
ugarooyooh aree ikati.
24 Aflaay taam'a eendeehna naati hankaayka daaseeneet toonaatu,
tukaniisi han Umasiih naati hankaayka daastini.
25 Umasiih tukaniisi areeyaayt ugarooyooh dehaay nuuniya,
aanda han tim'ateehna areeyeeneet toonaati.
26 Baruuh ibhaliyeesooh tukaniisi mugaddast ikwaas.
Batooh yamee ishaagwidhaayt isinhas.
27 Umasiih toon toona haay id'iyeeb usabab:
tukaniisi matuunwa tageegwa marriyi jillaay bak id'i.
Batooh gwihaab anu tari hakwaat anu tari adhibiit anu tari wari minkwis anu ikwaas.
28 Aanda igarooyoohna ookna areeyeeneet toonaatiit,
tim'ateehna han ibakii areeyeena.
Uutak tutakatooh areeyiiniib ugarooyooh ookna areeyiini.
29 Uudehay ugarooyoohna ookna kiiribna.
Laakiin ugarooyoohna tamseena,
daayiib iwariin.
Umasiih han tukaniisi bak iwari.
30 Hinin bariiyooh ugarooy dehay nikati.
31 Uuktaab <<Oon usabbii,
uutak baaboohwa deetoohwa ishtiit,
bariiyooh ugarooy imshawwi,
mhallaahna aree gaal ikatiin.>>
indi.
32 Oon uktaabiib winneet kwabaasna teefi.
Laakiin ani Umasiihwa tukaniisaatiyoohwa hadiidani.
33 Laakiin baraakna han bak tikatiina:
aanda kassaah tim'ateehna ugarooyiitoohna areeyeeneet toonaati.
Taam'a han kastaah ibakii eendeehna hamooyseeneet toonaati.