4
Ani W'ankwanaay sabbii,
abuukiib akati sooyani hookna:
Ukwaasana uukna waasaab ikatiyeeb udehayiitooh tikweerneet toonaati.
2 Diimaab baatageegaana,
shiboobna,
tarmuumaab d'iina.
Taktaki geeb amtaraamtiit ureerookna rhisaana.
3 Ukwaasanaay Aashuuk igin'aayeekna eeshwawiini jillaay daayiib shagaamaana.
Toon toona aree um'asgiib kwiriinaat d'iina.
4 Baraak kassaakna gaal garooy tikatiina.
Gal Shuuk Ukwaasanaay eefeena,
baraakna han Ukwaasanaay udehayiit waasamtaanihoob gaal s'aya attiyeewiyaabaana.
5 Gaal Ankwana eefi,
gaal iimaan eefi,
gaat atoomsooy teefi.
6 Gaal Kwaasanaawwa Baabaawwa kassiyooh ikati eefi.
Baruuh kassiyooh Ankwana ikati,
kassiyooh shagaamiini,
kasseen aree hoon kwarri.
7 Umasiih oomyaawooh hini bitik akuush anu y'adhidh.
8 Aaktab <<Baruuh asti oomhiin itageegaab idifihoob,
gwida abuuki suuriimiyaayt oodehay miyaaw yhii.>>
diyaaba.
9 Baruuh <<Asti idif>> ittiyoodiyihoob,
Umasiih tubuutiib n'ati dhoomaabu miyaad ikati.
10 Tuun masi bak miyaad tikati:
toobuut n'ati dhoomaab ikatiib aree,
teebri titageega reewaab ikatiib barooh ookna ikati.
Aflaay baruuh toobuutwa teebreewwa kasseeh intiib.
11 Umasiih hinee gwadib waasiyaayt hoon,
linguumaawwa,
nabiyaawwa,
diigwatkinaawwa,
fagiiriyaawwa,
koojaawwa ikwaas hoon.
12 Aflaay udehayuuh ishagaamti kantiit,
bariiyuuh ugaru wintiit y'ankiir.
13 Tuun tuuna aree hinin kassaan w'iimaaniyoon gal nikatiyeeb ookiikwa,
Ukwaasanaay Oor daayiib afhamnayeeb ookiikwa nimoorariim.
Malya Umasiihiit hinin wawin niikti niyad,
daayiib aree barooh t'iiteeb niikti niyad.
14 Aflaay hinin nisrikaab niikti kindi.
Tallas dehay gwisri t'aliimii ibakii biitiilneetoon toonaati.
Baraah ubaraam doorka mhiin mhiinii nanfiib t'iiteeba.
15 Uureer diimaab oosdik haay soonayeeb ikwasyeetoon toonaati.
Malya kasseeh isalalaayee niiwin niyad,
Umasiih t'iiteeb aree nikati.
16 Baruuh ugarooy girma ikati.
Umasiih ugaru taktakeeb y'anbiik,
kasseeh ugarooy itarab timmiisi shagaasiini.
Ugaru aree ureeri sabbii wintiit y'ankiir.
Umidhhan oosh'iiwwa Umidhhan ugayiiwwa
17 Ani oont'a andi hookna:
Ani W'ankwanaay w'aamantii aree sidik sooyani hookna,
dhiba dehayiit ookwiraay singadna.
Bareetaah tifikra takweet kiibariin.
18 Igin'aayaahna thibniib eefeen.
Baraah winneet atoorbiyaaytwa gamaamtwa ibariin.
Ukwaasana iniiweeb umidhhaniib aree adhidh hooy kiibariin.
19 Baraah winneet haamaaba,
akra gin'iiba,
y'eeba kiiribna,
kasseeh ijinsaayi y'eeba shagaameen.
20 Baraak beet toona Umasiihiib bak allamamaab kitteena.
21 Baraak barooh daayiib timaasiwna,
bariiyooh aamanaayeet Yasuu'iib eefeeb oosdik allamamtaana.
22 Aflaay sh'iika tiifiineeb whaal gadna d'iina,
baraakna tehiriwneet hay'aatiika tikwiirna.
Sh'iika tiifiineeb whaal aree talasaayt niyaatii imag.
23 Igin'aayaaknaawa igirmaayaaknaawa ibakii gayiimeen.
24 Baraak ibakii gayiimaana,
Ukwaasana t'iiteeb akay daamtaana.
Aflaay ibakii barooh afirhisaana sidik aree mugaddasaab akeena.
25 Hinin gaal garooy nikati.
Aflaay Eegwisir ingadna d'iinaat taktak oosdik sooyaana.
26 Titehasiinihoob aree,
tehasiyaaytuukna danib tikwasiit baakwaasna,
kassooh oomb'i aree baahaseena.
27 Oobliis fursaat baahiiwna.
28 Gwiharaab tikatiyeek,
toogwihar isha.
Nhas akaat akraab shagaama.
Shaawti oodehay w'aniw naat iyaaw tindiya.
29 Y'amag bhali singadna.
Tudaayiinaay udaayi door sooyaana,
toona tisooteeneet aree oodehay haay shamna.
30 Ukwaasanaay Eeshuuk Imugaddasa baasehaasna.
Aashuuk miraayiit damaana ikatiina,
aree b'eeb gaal tumaagtiisookna iifdig hookna iyadna.
31 Hamiinaayt baad'iina,
tehasiyaaywa oodehay uraawiib maagtwa baad'iina.
Taktakeeb baafaraana tari baaneewaana,
maagt eeneena kastooh baad'iina.
32 Nhaswa rhamaat ibariinwa akeena,
taktak afooyaana.
Ukwaasana han Umasiihii afooya hookna.