Buulusiib ushaga Ijintiili geeb
3
Umasiih Yasuu'i jillaay aree ani abuukiib akati.
Aflaay Ijintiili bareek iishtam hookna andi.
2 Ukwaasana tin'imaateesooh oon ushaga bareetookna daayiinaaytiib aneeb hiiyyaab ikatiyeet toona sidik tikteenna.
3 Ukwaasana umikrooh ukwabaas uniyaamaab ikatiyeeb anii deha lawisiya.
Toon toona aree ujawaabiib sooyani hookna.
4 Ani aktibeet toona agriiteeneek,
Umasiihiit tukwabaasnaay ani afhamaab akatiyeet toona iikan tiyadna.
5 Sh'iiya damaaniib toon toona tukwabaas uudehay soomamaab kiikeen.
Laakiin beet toona oont'a Ukwaasana lawisiya,
ilinguumaayeehwa inabiyaayeeh imugaddasaayee dehaaywa Ishuukee lawisiya.
6 Tuuna tukwabaas aree bak teefi:
Umasiih Yasuu'i sabbii,
Ukwaasana Iyahuudi geeb id'iyeeb uwaadiyaay,
Ijintiili Usakana Udaayiinaay adhidh ibariin.
Ukwaasana masi Ijintiili gaal garooy ishaawawi.
7 Ani oon Usakana Udaayiinaay shagaamana aki,
toon toona aree Ukwaasanaayt tin'imaatee amri.
Baruuh y'akrireesooh ushagaay aneeb yhiiheeb.
8 Ani kassooh Ukwaasanaay udehayiika diskaab akati.
Teen tin'ima aree ani attiyeewaay:
Umasiihiib oomraay w'abaar baabariib,
Ijintiili bitik haay bhaliiyaniyeet toonaati.
9 Ukwaasana naatka id'iib,
kwabaasna baruuh niyaamaab ikatiyeet,
diimaab bariiyooh ugin'iib dh'imaat toona oodehay kassooh afhistiib hoosu yhariw.
10 Malya Ukwaasanaay uumkir oont'a tukaniisaatiib lawiini.
Ukwaasanaayt tifagarandi kasteeh tehay'aateesooh tibreeti haakmaawwa isuurkinaayee dehaaywa lawiyaan.
11 Ukwaasana toon toona barooh ooknaay daayim mikrii ikwaas.
Baruuh aree Umasiih Yasuu'a W'ankwanaayoon geebii toon toona itkwikw.
12 Bariiyooh daamiitwa,
bariisooh aamaneetiitwa Ukwaasana beeti daayi iimaanii eenay.
13 Oon usabbii aree ani bareekna jillaay lhamaniyihoob,
baraak is'aya baakit'ana.
Beet tuuna bareekna habnaab tiniiw hookna.
Umasiihiib ooreer
14 Oon usabbii dehaay ani Ubaabaay suurii atganiif.
15 Teebreewwa tubuutiiwwa teefeena kastuuh umidhhanoohna bariisooh imeerna.
16 Ukwaasana oomraayooh oowwinnaay bareekna is'akiireet toona hooy aharriiw,
Ishuukeesooh tehooyteekna is'akiireet toona hooy aharriiw.
17 Aflaay Umasiih bareeyeekna igin'aayeeb w'iimaanii ikwaar indi.
Igadamuukna im'atiim aree ooreerii t'akirneet toona dehaay siileelani.
18 Aflaay kassooh Ukwaasanaay udehayi geeb,
Ukwaasanaay uureer kak mar'aawwa gwimadwa,
kak tageegaawwa dhoomaawwa ikatiyeet toona tufhamaati akrir timeerna.
19 Umasiihiib ooreer kassooh teekaniineet toona asehariiw hookna.
Uun uureer timmiima bii'atookkaaneek han,
umidhhanuukna Ukwaasanaayt tehay'a kasteeh iitab indi.
20-21 Umasiih Yasuu'aawwa tukaniiseewwa diimaab Ukwaasanaay dehaay hamaad haay y'eeneet toona siileelani.
Bariiyaah y'akrir hineeb shagaameen aree hinin raatnayeet toona tari neekwineet toonaatiika masi gwidaakaana shagaameen.
Aamiin.