Tooyatii umdhhan
2
Baraak maagnaaytwa danuubwa tid'iiniit Ukwaasana finaasamtaana akay suur ayaa tiifiina.
2 Toon tuduniyaati amag salala tiramniit oobliis tisnaakirna.
Baruuh tuduniya yhankiim,
ishuukaah aree Ukwaasana baasinaakiir oodehayi kehii akrir ibariin.
3 Hinin han door gaal igarooyaanwa igin'aayaanwa yhiriwneet teena tiknaatee sakna.
Hinin Ukwaasana nisehas,
oodehay uraawiit sakna.
4 Laakiin Ukwaasanaayt tirhama winneet gwidaata.
Baruuh hinin areeyiinyeeb uureer han winneet win ikati.
5 Hinin tumaagti sabbii ayaab akay niifi.
Laakiin Ukwaasana winneet areeyaayt hoon Umasiihi geeb ishidhhan hoon.
Ukwaasanaayt tin'imaatee aree baraakna tidhhanna.
6 Ukwaasana tuyattii Umasiih Yasuu'i geeb yakisiya hoon.
Tibreeteeb aree Umasiih Yasuu'i daraag mhiin yhii hoon.
7 Ukwaasana toon toona haay id'iyeeb usabab,
har'ook y'iiniib udamaaniib baruuh kak sidik dehoon daayiib ikatiyeet toona nadiir baabariint n'imaati miraayii rhisiini.
Baruuh Umasiih Yasuu'a id'iyeet toonaatiib lawisiini.
8 Baraak Ukwaasanaayt tin'ima aamantaaniit tidhhanna.
Baruuh hinin astehalnayeet toonaati mhakwal daayiib iweer hoon.
Toon toona Ukwaasana bareekna hiiyyaabu,
baraakna iknaayaakna naat han d'iyaab kitteena.
9 Baraak iknaayaakna rayiimaab tikatiineena kitti.
Aflaay baraak haay faalamteeneena kitehaay.
10 Hinin baruuh id'i hoon,
Ukwaasana daayiina dehoon iwariyeet toona niyaamaabi.
Baruuh yharriiweet tehay'aatii aree nikweereet toona diimaab yharriiw.
Oon usabbii,
Umasiih oont'aaneet dehoon diigwatiya.
Umasiihiib amshawawiyooyt
11 Baraak Jintiiliib tikatiineet toona sh'aana.
Baraak suur <<Ibaakwishaaba>> tittiyuudna,
baliin ikwashab iiktiin ookwishuub haay ityisikna.
12 Been oodoor baraak Umasiih kanaab kitteena.
Israa'iileeb udehayi geeb aree girbaab tiiktiina.
Ukwaasana bareeyooh geeb id'iyeeb ugaladiib aree baraak adhidh kitbariina.
Toon tuduniyaatiib aree s'ayaab anuuwwa Ukwaasana anuuwwa tikwiirna.
13 Baraak Ukwaasanaay sagii tiifiina.
Oont'a Umasiih Yasuu'a ubooyooh karaamaateeb ifir'aayt,
bareekna Ukwaasana beeti haay eeya hookna.
14 Umasiih aree Iyahuudwa Ijintiiliiwwa geeb m'asig id'i.
Baruuh toomaagti kirra hinin soorarbaab ugarooyooh ooknaay kat'iya.
15 Baruuh Muusaay whag kasteeh tiwaseewwa whukwimwa iibriib ingad id'iit,
Iyahuudwa Ijintiiliiwwa gaal nafariit ismarriit um'asgiib ishaawawi hoon.
16 Umasiih usaliibi kehii itoodaarihoob,
hineet toomaag taktaki kehii niibriyeet kat'iya.
Baruuh masi Iyahuudwa Ijintiiliiwwa gaal garooy ishaawawiit m'asig ibitikeen id'i.
17 Umasiih eeyaayt bareekna Ijintiili m'asig bhaliisamiya hookna.
Baraak Ukwaasanaay sagii tiifiina,
hinin Iyahuudi Ukwaasana niidwil han m'asig bhaliisamiya hoon.
18 Umasiihi sabbii aree,
hinin kassaan gal Shuukee Ubaaba ookiik eenay.
19 Baraak Ijintiili shaawti iibaabkinaabwa girbaabwa kitteena.
Baraak whaashi dehay tikatiina,
Ukwaasanaay dhiwaayee ikatiin baliib t'iiteebaana.
20 Baraak masi ilinguumaawwa inabiyaawwa d'iraab ikatiineeb w'asaasiib teefeena.
Toorkwinti awi aree Umasiih Yasuu'a ookna ikati.
21 Baruuh oogaw kassooh hiddaab anbiik,
oogaw aree tageega diini gaw W'ankwanaay ikatiyeeb ookiik isoowiin.
22 Baraakna han been oogaw Umasiih d'iraab ikatiyeenaay gal tikatiina.
Been oomhiin aree Ukwaasana ooknaay Shuuk ikweerni mhiin ikati.