Afasooseeb y'aamanana eebiib ujawaab
1
Ukwaasana waasiyaayt Yasuu'a Umasiihi linguumana ikwaaseeb Buulus,
oon ujawaab iktib.
Ukwaasanaay oodehay Afasoosiib ikweer,
Umasiih Yasuu'iib sidki iimaan ibariin,
bareeh beeti oon ujawaab akantiib.
2 Ukwaasana Baabuunwa W'ankwanaayuun Yasuu'a Umasiihwa n'imaatwa m'asigwa ba'iyaaw hookna.
Yasuu'iib w'iimaaniit tibaraka
3 W'ankwanaayoon Yasuu'a Umasiihiib Ukwaasanaawwa Ubaabaawwa nhamdeet toonaati.
Hinin Yasuu'iib nimshawawaay akay,
Ukwaasana tibreeteeb kasteeh Ishuukeet tibarakaatee baarakiya hoon.
4 Tuduniya daamaat bitkaayi door,
Ukwaasana hinin Yasuu'iib nimshawawiyeet toonaati jillaay waasiya hoon.
Aflaay Ukwaasana areeya hoon,
hinin bariiyooh suurii mugaddasaawwa,
gwihaab baabariinwa niiktiyi jillaay waasiya hoon.
5 Ukwaasana daayiibuuyt,
Yasuu'a Umasiihi geebii waasiyaayt hoon Ukwaasana ooknaay ar nikatiyeet toonaati jillaay imkir.
Beet toona baruuh yhiriw,
aree batuuh dehaay tishboob.
6 Ukwaasana winneet dehoon daayiibu,
W'oorooh whayis yhii hoon akay,
Ukwaasana nhamdeet toonaati.
7 Umasiihiib ubooyii hinin fadag nikati,
oon usabbii aree tumaagtuun afoomta.
Ukwaasanaayt tin'ima kak daayiita!
8 Ukwaasana tudaayiinaaytooh kehoon ifif id'i,
fagarandiitwa fhamaatwa yhii hoon.
9 Umasiih id'iyeet toonaatii,
Ukwaasana isalalaayeeh ikwabas eekna suur niyaamaab iiktiyeeb rhisiya hoon.
10 Aflaay tuus'a eetniyihoob,
Ukwaasana kastooh toona baruuh niyaamaab ikatiyeet iiwari indi.
Toobuutwa tibreeteebwa eefeent teena kasteeh gaalnaay whii iikwasi indi,
Umasiihi whii iikwasi indi.
11 Ukwaasana diimaab toona yharriiweet dan'i.
Oon usabbii aree baruuh Umasiihi hinin waasiiniyi jillaay ikwaas.
12 Aflaay hinin Umasiihiib is'aya ibariin yhankaaneeb niikti.
Ukwaasanaay umatuun nhamid!
13 Baraakna han Umasiihiib teefeena,
usidkiit diigwat haay eeya hookna.
Usakana Udaayiib w'ishidhhiinookna haay eeya hookna.
Umasiih aamantaana,
bariiyeeh tikatiineet toona rhistiini jillaay,
Eeshuuk Imugaddasa iwaadiyaamaab tittiyeewaayna.
14 Aashuuk han Ukwaasana udehayyooh dehaay daasaab ikatiyeena nittiyeewiyeet toona arbuuniyaan hoon.
Malya oon w'arbuunii aree nitfidig niyad.
Ukwaasana aree atrakwkwiyaabwa atehammidaabwa iikti indi.
Buulusiit toosileel
15 W'iimaanookna W'ankwana Yasuu'iib tibariineeb ani amaasiw.
Kassooh Ukwaasanaay udehayiib tibariineeb ooreer han amaasiw.
16 Bareeyookna jillaay Ukwaasanaay whamaad door han singadaab kaaki.
Ani tusileeltiyu sh'ani hookna.
17 W'ankwanaayoon Yasuu'a Umasiihiib Ukwaasana,
Ubaaba W'alya,
Eeshuuk itifagarandiiteebwa tufhamaatiibwa iniiweetookna toona raatani.
Aflaay barooh daayiib iikan tiyadna.
18 Igin'aayaakna nuur eettiibneet toonaati jillaay siileelani.
Ukwaasana bareekna waasiyanihoob,
is'aya bareekna attiyeewiyaab afhami tiyadna.
Malya baraak kassooh Ukwaasanaay udehayi geeb hiddaab timeerneet umatuuniit tibaraka iikan tiyadna.
19 Ukwaasanaay y'akrir iwawin inadiir baabariin,
hinin y'aamananaayee dehaay ibariyeeb,
kak wawin ikatiineet toona kanaant asehariiw hookna.
Tuun tuuna aree baruuh suur id'iyeet ajaayibti akrir eekna t'iiteeti.
20 Een y'akrir Baruuh Umasiih tuyattii yakisiyanihoob,
Ukwaasana ooknaay umaygwadii dehaay tibreeteeb isoos'a.
21 Umasiih beentooy kasseeh yhaakmaawwa,
yhad'aawwa,
y'akrirwa,
kasseeh isuurkinaawwa kehii had'aab ikati.
Toon tuduniyaatiib oobhaat kiiki,
laakiin har'ook y'iiniib udamaaniib han ikati.
22 Ukwaasana kasteeh teena Umasiihiib iragadaayi whii daasiya.
Tukaniisaatiit daayiinaayti jillaay aree barooh kasteeh teenaati kehii suurkinaab ikwaas.
23 Tukaniisi Umasiihi garu tikati,
aree bariisooh timmiimtini.
Umasiih kasseeh imhiinan kasteeh teena uukna timmiisiini.