Buulus Maaltaay
28
01 Asgaa iyami daraag niktimihoob,
been whaash Maaltaab iidneet toona nikan.
02 Whaashi dehay winneet hadareeba.
Bireebwa mikw'araabwa iifiin akay n'eet dehoon daasiyaaniit yhadarna hoon.
03 Buulus shalik hindi ikwaraayt toon'eeti kehii daasiya.
Tunab'uuy kwakwar rhafee tisfar'a.
Been ukwakwar Buulusiib w'ayiib imeelwaay.
04 Whaashi dehay been ukwakwar Buulusiib w'ayiib tilmee rhiyaanihoob,
taktakee dehaay,
<<Uun uutak ibakii madoor ikati!
Ubhariib ayaab biikaayeek han,
oont'a laakiin w'adil barooh ishidhhin kiidi.>>
idiin.
05 Laakiin Buulus ookwakwar toon'eetiib igid.
Baruuh lhamaab han kiiki.
06 Uudehay Buulusiib w'ayi amiit ind'i,
tari gaalhoob dhibiit iyaayyeeb hiisiyaan.
Gwidaat midda barooh ishbibna,
naat dehaay akaat bitkaayeet toona ikannihoob,
ibhaliiyeehna ibdilniit,
<<Uun uutak kwaasanaabu.>>
idiin.
07 Tugadiireeti haakim Boobliyoos iidna,
beentooy aree haash gaal hooy iibri.
Boobliyoos winneet hadareebu,
ugawiyooh aree fadhig imb'i yhadar hoon.
08 Beenhoob Boobliyoosi ubaaba abaakiibwa kalawaayt lhanaywa iibri,
n'aaliib imb'i.
Buulus barooh ibaayt kehii siileeliya,
malya y'ayeeh kehii daasiyaayt isin'ir.
09 Beet tuuna tikayihoob,
tugadiireeti dehay kassuuh udehayoohna oolhaab Buulusii dehaay haay eeyaan.
Kassaah aree mheelamiyaan.
10 Uudehay winneet hamooysiyaan hoon,
oodoor igiigaa niideeb aree,
nhiriweenaaka yhiin hoon.
Roomaay ikatama
11 Mhay tirgaayi har'ii,
markabt Maaltaay oowiyaay kat'amaat n'amaayt iibaabna.
Tumarkab Iskandariyaab Masree tiikti,
Iroomaani ikwaasana imalooyeet siwra kehii iifiin aree,
<<Ikwaasana Itiita>> iidna.
12 Tumadiina Siiraakuus niktim,
mhayt yina beentooy nis'a.
13 Beentooysii aree Riigiyoom ookiik iibaabna.
Tooyin tooraaw oos'iidi baraam infi.
Maloot yinaati har'ii aree Booteeliib niktim.
14 Beentooy shalik Ukwaasanaay aamanana nimri.
Baraah asaramaat yina geeb nhigteet toona hoon yhariwna.
Aflaay bak aree Roomaab niktim.
15 Roomaay iifiin Ukwaasanaay y'aamanana hineeb w'aay imaasiwna.
Hini ashuushiib aree Abbiyoosiib tidangaltiibwa Imhiinan Imhaywa beeti ifir'ana.
Buulus bareeh rhiyanihoob,
Ukwaasana yhamid aree winneet y'arik.
16 Roomaab niktimihoob,
Buulus han gaw ood'ooh hooy ikwiireeb imri.
Ukajaraayi ugw'aadiigaay geeb iifi.
Buulus Roomaay gw'adaadti whii bhaliiya
17 Mhay imb'i beentooy niktimi har'ii,
Buulus Yahuudi suurkina waliikiyaayt,
<<Isanaayaan,
ani udehayoon lhastiniina naat han d'iyaab kaaki,
masi hoobeeteen t'aada han amoorbaab kaaki.
Laakiin Alguduseeb y'abiknaheeb,
Iroomaani nuuniyaanheeb.
18 Baraah aniib igwabab ishbibniit fiduugi yhariwna.
Ani tooyat haay astehaliyeet maagnaayt d'iyaab baakaayeet toona ikanna.
19 Laakiin Iyahuudi suurkina iribnihoob,
ani Gaysar haakamamiyeet toona hooy ahariw.
20 Hinin Y'israa'iili s'ayaamnayeet toonaati sabbii,
toon tushinshiltii amhakwaar.
Oon is'ayaay hadiidteeni jillaay aree waliiksan hookna.>>
idi.
21 Isuurkina <<Yahuudaay bariiyook hadiidiini jawaab miraab kinki.
Masi tooy aree gaal han bariiyook hadiidiini y'aab kiiki,
tari bariisook ashkiimiini kiihaay.
22 Laakiin hinin bariiyeek ibhali sinaakirooyt nhariw.
Uudehay kassooh oomhiin oon umadehab imooriibneet toona nikteen.>>
idiin.
23 Buulus hooy imeerni waadiya b'eeb gaal waadiyaayaan.
Gwida dehay aree Buulusiib oogaw eeyaan.
Buulus fajir teekruumtee whawaad ookiik Ukwaasanaayt tehad'aayeetiib bhaliiya.
Baruuh Utooraawwa Inabiyaayi kitabwa Yasuu'iib diyaab iiktiineet toona afhistiib yhiriw aree fassariya.
24 Suurkina gali Buulusiib ibhali gabbalamiyaan,
wari aree gabbalamaab kiikeen.
25 Baraah taafagsamaab kiikeen,
shaawti giigtiib yhariwna.
Buulus laakiin <<Aashuuk Itageega unabi Ish'aayaay miidalaabii hoobeekna bhaliisamiyaanihoob,
oosdik sooyaan:
26 <Oon oodehay bayaat sooyaa:
door iimsaw tiyadna,
laakiin afhami kitdiina.
Iishbib tiyadna,
laakiin karhitaana.
27 Kassaakna hadaniyaab tibariina.
Y'angwilaakna kiimaasiwna,
igw'adaakna assamaaba.
Karhitaana tari kitmaasiwna,
tari ka'afhamtaana.
Adgirtiineek anii deha tit'igirna,
ani aree mheeli hookna.>
diyaa!
28-29 Aflaay Ukwaasanaay umidhhan Ijintiilee deha diigwatamaab ikatiyeet toona sootiyookna aharriiw.
Baraah barooh isnaakiirna.>>
idi.
Buulus een ibhali idiit har'ii,
Iyahuudi akraab taktak amgwasaaree giigiyaan.