Yuuhannaay W'injiil
Yasuu'a Ukwaasanaay Ibhali Tuduniyaatii Dehaay Eeya
1
Ibhali hankaab iiktiina,
baliin ibhali aree Ukwaasanaay geeb iifiina,
ibhali aree Ukwaasana iiktiin.
2 Ibhali hankaab Ukwaasanaay geeb iifiin.
3 Bariisooh naatka daamta.
Barooh anu naat han kadaamta.
4 Bariiyooh umidhhan eefi.
Been umidhhan aree oodehayi nuur iikti.
5 Uunuur uthibniib buubiini.
Laakiin uuthibin oonuur afhamaab kiiki.
6 Beentooy Yuuhannaab iidni tak Ukwaasana diigwataab iiktiyi eeya.
7 Baruuh been oonuuri kehii iibidehi jillaay y'aabi.
Aflaay kassuuh uudehay tudiigwat maasiwtiit aamaneeneet toonaati.
8 Baruuh uukna oonuur kiiki.
Oonuuri sooti jillaay oobhaat y'aabi.
9 Been usidki nuur,
kassooh oodehayii dehaay talawiiniib,
tuduniyaatii dehaay y'iiniib iikti.
10 Baruuh tuduniyaatiib iifi.
Ukwaasana tuduniya bariisooh ikwaaseek han,
uudehay barooh kanaab kiikeen.
11 Baruuh ooknaay whaashiib eeya.
Laakiin udehayuuh uukna barooh ashshaab kiikeen.
12 Laakiin gwadi barooh y'ashishniit haay aamaniyaan.
Aflaay bareeh Ukwaasanaay ar haay ikatiini hag yhii.
13 Aan baraah takwaakw firaay w'aadami niyaamiit ikwasiyeeb tari takiit niyaatee ikatiin firaay kiikeen.
Laakiin Ukwaasanaay faray ikatiin.
14 Ibhali bashar ikeena,
aree uun baruuh geeboon ikwiri.
Hinin bariiyooh umatuun rhina,
umatuun Gaal'ooriib Ubaabaay eeyaab,
n'imaatwa sidikwa ataabu.
15 Yuuhanna bariiyooh bhaliiya.
Baruuh winneet waawiyaayt,
<<Uun baruuh ani haay hadiidaab iiktiyeebu.
Ani <Baruuh anii har'ii y'iini,
laakiin aniika winkaabu.
Een haay andiyeeb usabab aree baruuh ani baafiraay hankaay iifi.>
adi.>>
idi Yuuhanna.
16 Bariiteeh tin'imaati guudtii hinin kassaan tibaraka taktaki har'ii nimri.
17 Ukwaasana whag Muusaay geebii yhii hoon.
Laakiin tin'imaawwa oosdikwa Yasuu'a Umasiihii haay eeya hoon.
18 Ukwaasana tak han rhaab kiiki.
W'oor Oongaal Ukwaasana t'iiteeb masi aree Ubaabaay dar ikatiib baruuh uukna isookin.
Yuuhanna Umoosanaayt diigwat
19 Iyahuudi suurkina Alguduseeb iifiin fagiiriyaab gwadibwa,
Laawiibwa Yuuhannaay dehaay diigwatiyaaniit raatiyaana,
<<Baruuk aabwa?>>
idiin.
20 Baruuh ifdhadh nuun tawaay kiiki,
<<Ani Umasiih kaaki.>>
idi.
21 Baraah barooh raatiyaana,
<<Aflaay aabwa?
Baruuk Iilyaabwa?>>
idiin.
Baruuh <<Ani kaaki>> idi.
Baraah <<Baruuk Unabiiwwa?>>
idiin.
Baruuh <<Abadan>> idi.
22 Baraah aakhir,
<<Aabwa?
Sooyaa hoon,
baliib idiigwatiyaaneen beetiit sooyi niyad.
Ugarooyook aabu tindiya?>>
idiin.
23 Yuuhanna unabi Isyaasiib ibhali dehaay idgi,
<<Ani gaal umingaayiib waliikiiniinaay hissu,
<W'ankwanaay salal takwaakw kwaasna!>
indiinaay whiss akati.>>
idi.
24 Oont'a Ifariisi diigwatiyaani diigwatkina gwadi barooh raatiyaana,
25 <<Baruuk Umasiih bitkaayeek,
Iilyaab bitkaayeek,
Unabi bitkaayeek,
aflaay naanhooy moostiniya?>>
idiin.
26 Yuuhanna igwibi,
<<Ani yamee anmiis.
Laakiin bareesookna gaal baraak bitkaanneeb yakiini.
27 Baruuh anii har'ii y'iiniibu,
ani laakiin bariiteeh tigidh'a hankwiiree dehaay han ka'adgiran.>>
idi.
28 Tuun tuuna kastuuh Uurduni bhari dar ooraaw tiifiit Beetanyaay tiki.
Yuuhanna been oomhiin oodehay iimis.
Ukwaasanaay whu
29 Tooyin tumalya Yuuhanna Yasuu'a barooh beeti y'ee rhiyaayt,
<<Hoob Ukwaasanaay eefi,
uun whu tuduniyaati danuub giigsiini!
30 Uun baruuh ani haay hadiidaneeb beeb ikati,
<Anii har'ii tak y'iini,
laakiin aniika winkaabu,
een haay andiyeeb usabab aree baruuh ani faraay baakaay iifi.>
adiyeebu.
31 Ani uknaayu barooh kanaab kaaki.
Laakiin baruuh Israa'iili dehayi bitik atookkinaab ikatiyi jillaay ani yamee iimis.>>
idi Yuuhanna.
32 Malya Yuuhanna teen tibadeha sooya:
<<Aashuuk kwibheeriitiit hay'aatiit tibreetee n'ati tikwee rhan,
malya bariiyooh kehii daayaan.
33 Ani barooh iiktiyeet toona masi kanaab kaaki.
Laakiin barooh yamee iimsi jillaay aneeb diigwatiyaab Ukwaasana sooyiheeb,
<Aashuuk tikwi y'iit taki kehii daayee rhi tindiya.
Been baruuh Eeshuuk Imugaddasaayee iimis indiibu.>
idiheeb.
34 Ani beet toona rhan,
aree uun baruuh Ukwaasanaay Oor ikatiyeet toona badehiib akati.>>
idi.
Yasuu'iib Ikwiriyaatay Yhankaaneeb
35 Tooyin tooraaw Yuuhanna malu kwiriyaatayeeh geeb masi gadee,
36 Yasuu'aab hasamee rhiyanihoob,
baruuh <<Ukwaasanaay whu uun ikati!>>
idi.
37 Ikwiriyaatay imalu barooh bak diyee imaasiwnihoob,
baraah Yasuu'aab iramna.
38 Yasuu'a nakamiya,
aree bareeh ramee rhiyanihoob raatiya,
<<Naan tehariwna?>>
idi.
Baraah <<Rabbi,
naad kwanriya?>>
idiin.
Iyahuudi bhaliyeeb Rabbi <<Seedna>> miyaadu.
39 Yasuu'a <<M'aanaat shibibna>> idi.
Aflaay baraah iramniit baruuh ikwiireeb oomhiin ishbibna,
been oomb'i aree bariiyooh geeb hassiyaan.
Been uudoor aree asir iifi.
40 Siimoon Bitrusi san Andraawoos,
baliib Yuuhannaay ibhali imaasiwniit Yasuu'aab iram imalooyeeb gaalu.
41 Igidiyeesooh Andraawoos Siimoon oosan imriit sooya,
<<Hinin Umasiih nimri.>>
idi.
Tuun tukalma Yasuu'a Umasiihi miyaadi.
42 Malya barooh Yasuu'aab haay ibi.
Yasuu'a Siimoon ishbibaayt,
<<Oosmook Siimoon Yuuhannaayi oor iyadna,
laakiin Siifaas ituusim tindiya.>>
idi.
Bitruswa Siifaaswa mhallaah <<Liilaaw>> miyaadi.
43 Tooyin tumalya Yasuu'a Jaliil ookiik giig niyaamiya.
Baruuh Fiilibus imriit,
bariiyooh dehaay,
<<Ramaheeb>> idi.
44 Fiilibus Beetsaydaay iikti,
Andraawooswa Bitruswa han tumadiina Beetsaydaay ikwiirna.
45 Fiilibus Naatnaa'eel imriit sooya,
<<Muusa,
whaggi kitaabiib hooy kitbaab iiktiyeeb,
inabiya han hooy kitbaab iiktiineeb beeb nimri.
Baruuh Yasuu'aab Yuusifi oor,
Naasiraay ikatiibu.>>
idi.
46 Naatnaa'eel raatiya,
<<Naasiraay daayiina eetni han?>>
idi.
Fiilibus <<M'aat shibiba!>>
idi.
47 Yasuu'a Naatnaa'eel y'ee rhiyanihoob,
bariiyooh hadiidiya,
<<Sidki Israa'iilaayi naat han maagt baabariib tooy eefi.>>
idi.
48 Naatnaa'eel raatiya,
<<Kak tikteenaheeb?>>
idi.
Yasuu'a <<Fiilibus baawaliiki hook,
utiini hindi whii s'ee rhan hook.>>
idi.
49 Naatnaa'eel <<Seedna,
baruuk Ukwaasanaay Oorwa!
Baruuk Israa'iileeb Whad'a tikatiya.>>
idi.