Yasuu'a Eeyam Haab Ikwaas
2
Tooyin tumhaya Jaliili haashiib Gaanaay doob iiktiin.
Yasuu'iit tuundi beentooy tiifi.
2 Yasuu'aawwa ikwiriyaatayaahwa han been idoobaani mhiin waliikamaa iifiin.
3 Wha faayamiyanihoob,
Yasuu'iit tuundi bariiyooh dehaay,
<<Baraah shaawti haab kiibariin.>>
tidi.
4 Yasuu'a <<Yaa takatay,
kak tindi,
aniib uudoor masi y'aab kiiki.>>
idi.
5 Yasuu'iit tuundi ishagaamanaayee dehaay,
<<Baruuh indiyeetookna toona d'iina.>>
tidi.
6 Iyahuudi diini shagwadhiit aada iibriina,
beet toonaatii dehaay aree asagwir aweeyi diwan yam toobamaab iifiin.
Diwaanka sheeb litraab y'ibik.
7 Yasuu'a ishagaamanaayee dehaay,
<<Eedwan yam toobaana.>>
idi.
Aflaay baraah eedwan iyafa ookiik yam itibna.
8 Malya baruuh bareeh sooya,
<<Oont'a shalik yam hooy ahaanaat ootak t'aduuma abkaab hiina.>>
idi.
Baraah han beet toona id'iin.
9 Oont'a aayam haab ikeena,
aree uutak t'aduuma abkaab eeyam d'amisiya.
Baruuh wha keeya mhiinii eeyaneeb kiikan,
laakiin ishagaamana beet toona iktiinna.
Malya udooba waliikiyaayt,
10 <<Uudehay gaalka wha udaayiib idabaay iyaawna,
y'amna gw'iit eel'anahoob wha iyameemaab iyaawna.
Laakiin baruuk oont'a ookiik daayi ha simhaabwa.>>
idi.
11 Yasuu'a teen tim'uujisa Jaliileeb Gaanaay ikwaas.
Beentooy umatuunooh rhisiya,
ikwiriyaatayaah han barooh haay aamaniyaan.
12 Toon toonaati har'ii,
Yasuu'aawwa tuundeewwa,
isanaayaahwa,
ikwiriyaatayaahwa Kafarnaahuum ibeen.
Baraah beentooy shalikt yina yhagitna.
Yasuu'a Udiini Gaw Ibi
13 Iyahuudi Baaskaay iid idwilihoob,
Yasuu'a Algudus ookiik giigiya.
14 Beentooy Ukwaasanaay gawiib dehay sh'aabwa,
anootwa,
kilaywa iidlib rhiya.
Masi warib tarabeesaati kehii s'ee mhallagaab iibdil rhiya.
15 Aflaay baruuh kwirbaaj lilee id'iit,
ooreew eesh'aawwa,
t'anoowwa Ukwaasanaay gawii mhaliya.
Imhallaga iibdil eendee titarabeesa hooy b'oosiya id'i,
aree eegrish hooy ibrir id'i.
16 Eeklay iidlib oodehayii dehaay,
<<Tooysii haay fir'ana!
Baabiyu oogaw b'iishraay mhiin baakwaasna!>>
idi.
17 Ikwiriyaatayaah uuktaab iideeb ibhali sh'iyaan.
Uuktaab <<Ugawiyuuk reer tun'eetiit iiliwheeb indi.>>
indi.
18 Malya Iyahuudi suurkina barooh raatiyaana,
<<Baruuk toon toona haay tikwasiyi hag dan'iyi jillaay naat m'uujisa rhistiniya hoon?>>
idiin.
19 Yasuu'a bareeyooh dehaay idgi,
<<Oon Ukwaasanaay oogaw kat'aana,
ani aree mhayt yinaateeb masi iid'ir andi.>>
idi.
20 Baraah <<Oon oogawi d'uur fadhig tamuunwa asagwir hawla iyhi,
aree baruuk barooh mhayt yinaateeb masi iid'ir tindiya han?>>
idiiniit raatiyaan.
21 Laakiin Yasuu'a haay hadiidiyeeb Ukwaasanaay oogaw barooh ooknaay ugaru iikti.
22 Aflaay baruuh tuyatii yakiyani har'ii,
ikwiriyaatayaah een baruuh diyaab iiktiyeeb ibhali sh'iyaan.
Malya baraah ooktaab aamaniyaana,
aree Yasuu'a iideet toona han aamaniyaan.