Yasuu'aawwa Niigoodiimooswa
3
Niigoodiimoos iidni tak Fariisi,
Iyahuudi suurkinaayeeb gaal iiktiib iifi.
2 Baruuh Yasuu'ii dehaay amas eeyaayt,
<<Seedna,
baruuk Ukwaasana fidgaayook ikatiyi tak tikatiyeet toona nikteen.
Ukwaasana geebook biihaayeek aree,
tim'uujisa baruuk tikwasiyeet ikwasi tak kiihaay.>>
idi.
3 Yasuu'a bariiyooh dehaay,
<<Oosdik andi hook,
masi faraay baakaay Ukwaasanaayt had'aayi rhiini tak kiihaay.>>
idi.
4 Niigoodiimoos raatiya,
<<Kak eegrim tak masi itfari?
Shaawti na sidik toondeeti yaam shuumiit malya door itfari tak kiihaay.>>
idi.
5 Yasuu'a igwibi,
<<Oosdik andi hook,
yamwa Ishuukeewwa baafiraay,
Ukwaasanaayt had'aayi shuumiini gaal han daayi kiidi.
6 Ubashar bashar fanri,
laakiin Aashuuk shuuk ifeerna.
7 Ani <Ibakii malya door titfariya> andiyeeb ibhali shaawti baa'ajjabsa.
8 Ubaraam toojha teharriiweetka beeti nanfi.
Whissooh teemsiiwa,
laakiin naaysooh y'aabu,
tari naad eebi kitkana.
Aflaay Ishuukee faraay oodehayi geeb han bak ikati.>>
Yasuu'a idi.
9 Niigoodiimoos raatiya,
<<Tuun kak tikati?>>
idi.
10 Yasuu'a igwibi,
<<Baruuk Israa'iili bitik win koojaabwa,
teen teena ka'afhamta han?
11 Oosdik andi hook:
hinin tinikteeniyi bhaliinay,
tirhinayeet aree soonay,
masi bareesookna gaal han tudiigwat gabbalamaab kiiki.
12 Ani toobuuti kehii eefeent tinaateeb hadiidan,
aree baraak aamanaab kitteen.
Tibreeteeb eefeent tinaateeb hadiidaniyeek,
aflaay kak aamaniheeb tiyadna?
13 Teebri tak reewaab kiiki,
tibreetee y'aab nuun.
Baruuh aree W'aadami Ooru.
14 Muusa umingaayiib asti y'abkeeb ukwakwariit,
aflaay W'aadami Oor han ibakii asti yakami indi.
15 Shaawti barooh aamaniiniibka,
midhhan udaayim imaar indi.
16 Ukwaasana tuduniya winneet areeyiini akay Gaal'oorooh yhii.
Aflaay barooh aamaniiniibka iiyyi kiidi,
laakiin umidhhan udaayim imaar indi.
17 Ukwaasana W'oorooh tuduniyaati kehii gaadiib iiktiyi jillaay fidgaab kiiki.
Laakiin bariiyooh geebii tuduniya ishidhhiini jillaay fidgaabu.
18 Baliin W'oor aamaneen hukwmami kiidiin.
Laakiin baliin barooh aamanaab baakaay suur akay hukwmamaaba.
Usababu aree,
baraah Ukwaasanaay Gaal'oor aamanaab kiikeen.
19 Whukwim aree bak daayiini:
Uunuur tuduniya eeya,
uudehay laakiin igwabbaahna amagayt,
unuuriika oothibin areeyaan.
20 Tumaagnaay shagaameen baliin kassaah oonuur eeribna,
tumaagti shagaayuuhna biilawayi jillaay,
oonuur beeti ka'eeyaan.
21 Laakiin usidkii sakeen baliin,
Ukwaasanaayt sinaakrooytiib daayaaneeb ishaga lawseeni jillaay,
oonuur beeti y'een.>>
idi.
Yasuu'aawwa Yuuhannaabwa
22 Malya Yasuu'aawwa ikwiriyaatayaahwa Yahuudaay whaash ibeen.
Beentooy shalik door yhagitna,
aree baruuh oodehay imis.
23 Yuuhanna han Saaliim dawil mhiin Eenooneeb gwida yam iifiinayt,
beentooy oodehay iimis.
Uudehay bariiyooh dehaay y'iina,
baruuh han oodehay iimis.
24 (Tuun tuuna aree Yuuhanna oosjin shuumaab baakaay tiikti.)
25 Yuuhannaayiib ikwiriyaatayee galibwa yahuudiib gaalwa tutahaaraateet mishgweedhtiib imgwassaarna.
26 Aflaay baraah Yuuhannaab ibeeniit,
<<Seedna,
Uurduni daraag uraawiib geebook iifiib,
beeb baruuk daayiib dehaay tibideheeb,
oont'a baruuh inmiis,
aree uudehay kassuuh barooh eebiin.>>
idiin.
27 Yuuhanna <<Ukwaasana hiiyyaab biikaayeena,
gaal han naat kiimri.
28 Ani <Umasiih kaaki,
laakiin ani bariiyooh suurii diigwatamaabu.>
adiyeet toona baraakna iknaayaakna baadehiibaana.
29 Udooba ikatiib tudooba ibariibu.
Laakiin udoobaay araaw oodar gadiit eemsiiw,
udoobaay hiss eemsiiwihoob winneet itmadhiidh.
Aniit tifirha han bak timmiimeen.
30 Baruuh ibakii inwiin,
ani laakiin ibakii andhiim.>>
idi.
31 Mhakwaliisii tikwiiniib kasseesoohka winkaab ikati.
Tubuutii ikatiib toobuut kinaamiini,
toobuutiib eefeent tinaatee sakanaayiini.
Laakiin tibreetee y'iiniib kasseesoohka winkaabu.
32 Baruuh toona turhiyaneetwa t'imaasiweetwa sooyiini.
Masi gaal han tudiigwattooh kagabbalamiya.
33 Laakiin bariitooh tudiigwat gabbalamiiniibka,
Ukwaasana sidkiib ikatiyeet toona rhisiini.
34 Ukwaasana Eeshuuk adad anu iniiwayt,
Ukwaasana diigwataab ikatiyi,
Ukwaasanaay bhali hadiidiini.
35 Ubaaba W'oorooh areeyiini,
aree naatka bariiyeeh y'ayeeb daasiya.
36 W'oor aamaniiniibka umidhhan udaayim manri.
W'oor inriibka midhhan imaar kiidi.
Laakiin Ukwaasanaay igadab bariiyooh kehii daayeen.