Yasuu'aawwa Takat Saamriitwa
4
Ifariisi Yasuu'a ansiramiya,
Yuuhannaayiika gwidaka kwiriya inmiis diyee imaasiwna.
2 Laakiin ikwiriyaatayaah iimisna nuun,
Yasuu'a uukna gaal han misaab kiiki.
3 Aflaay Yasuu'a ibhali y'attiyoodiyaab imaasiwihoob,
Yahuudaay giigiyaayt Jaliil beeti y'agar.
4 Beentooy usalaliyooh ibakii Saamiraab kitimtiit hasami.
5 Saamiraay tiifiit madiina Sookaar iidneet iktim.
Batuuh whaash Yaaguub w'oorooh Yuusif hiiyyaab iiktiyeeb whaashii sagiit kitti.
6 Been whaashiib Yaaguubiit tuuri tiifi.
Yasuu'a t'iibaabtii gwooyaabuuyt tooreeti kwayaay n'ati is'at fiiniya.
Uudoor aree dehuuri door iikti.
7 Takat Saamriit yami harawaay toori tikwtaay eeta.
Yasuu'a batiiyooh dehaay,
<<Yam gw'asiiheeb.>>
idi.
8 Barooh ikwiriyaatayaah m'ariit dilibti iyiyni jillaay tumadiina bayaa iifiin.
9 Tutakat Tusaamri bariiyooh dehaay,
<<Baruuk Yahuudiibwa,
ani aree Saamriitu,
kak yami gw'asti raattiniyaheeb?>>
tidi.
Iyahuudi Isaamri ka'ayaaysamiyaan.
10 Yasuu'a batiiyooh dehaay,
<<Ukwaasanaay miyaaw tiktiineek,
batook eeyam raatiiniib aree aab ikatiyeet toona tiktiineek,
barooh raattii,
baruuh han ishidhhiin yam iyiw hooki.>>
idi.
11 Tutakat <<Duuruun,
baruuk dirkwaat kitbariya,
tuuri aree hoogaatu.
Een eeyam y'ishidhhiin kak manriya?
12 Baruuk baaboon Yaaguubiika winkaabwa han?
Baruuh toori yhii hoon,
malya uukna hooy gw'iya.
Y'araahwa,
ureewuuhwa han bak id'iin.>>
tidi.
13 Yasuu'a batiiyooh dehaay,
<<Een eeyam gw'iiniibka masi ityiw indi.
14 Laakiin ani aniiweeb eeyam gw'iiniibka shaawti door han ityiw kiidi.
Aayam ani aniiweeb bariiyooh tehooyteeb thaw iikti iyadna,
aree barooh umidhhan udaayim iyawna.>>
idi.
15 Tutakat <<Duuruun,
een eeyam hiiyyaheeba,
aflaay door han ityiw kaadi.
Tooy han yami harawaay y'i kaadi.>>
tidi.
16 Yasuu'a batiiyooh dehaay,
<<Difii,
utakook waliikiit agari m'ii>> idi.
17 Tutakat <<Ani tak kaabari>> tidi.
Yasuu'a batiiyooh dehaay,
<<Tak kaabari tindiyihoob sidkiituwii.
18 Batuuk suur ay doora tid'arii,
uutak t'a tibariyeeb aree sidik takook kiiki.
Sidik hadiidtaayii.>>
idi.
19 Tutakat <<Duuruun,
baruuk nabiib tikatiyeet toona rhani.
20 Hoobaan oon oorbaay kehii Ukwaasana y'abidna.
Laakiin baraak Iyahuudi Ukwaasana Alguduseeb n'abdeet toonaati tiyadna.>>
tidi.
21 Yasuu'a batiiyooh dehaay,
<<Yaa takatay,
aamaniiheeb,
damaan y'iini,
uudehay oon oorbaay kehii ikatiyeek tari Alguduseeb Ubaaba y'ibid kiidiin.
22 Baraak Isaamri sidik aab t'abidneeb kitkanna.
Laakiin hinin Iyahuudi aab n'abdeeb nikteen.
Umidhhan aree Iyahuudee y'iini.
23 Laakiin udamaan y'aabu suur akay tooy eefi.
Ukwaasanaay Ishuuki akriree uudehay Ubaaba usidkii y'ibid iyadna.
Baruuh yharriiweet sidkeet ibaada y'ibid iyadna.
24 Ukwaasana Shuuk ikati,
bariiyeeh Ishuuki akriree aree uudehay barooh usidkii y'abidna.>>
idi.
25 Tutakat bariiyooh dehaay,
<<Umasiih y'iiniyeet toona akteen.
Baruuh y'iiniyihoob naatka sooyi hoon indi.>>
tidi.
26 Yasuu'a igwibi,
<<Uun batook infariid,
ani barooh akati.>>
idi.
27 Been oodoor Yasuu'iib ikwiriyaatay y'agarna,
aree barooh tootakat bhaliisamee rhiyaanihoob isgaribna.
Laakiin gaal han <<Naan harriiwii?>>
diyaab kiiki.
Tari bariiyooh dehaay,
<<Batooh naanhooy bhaliisamtiniya?>>
gaal han diyaab kiiki.
28 Malya tutakat iyami sarooh t'ishaayt tumadiina t'agar.
Beentooy oodehayii dehaay,
29 <<M'aana shibibna,
tak kastooh toona ani weeraat iiktiyeet sooyiheeb.
Uun baruuh Umasiih ikati?>>
tidi.
30 Shaawti uudehay tumadiina y'ishniit Yasuu'aab beeti ibeen.
31 Been oodoor ikwiriyaatay barooh in'alna,
<<Seedna,
m'ariit naat tamaa!>>
idiin.
32 Laakiin baruuh bareeyooh dehaay,
<<Baraak bitkaanneet m'ari abari.>>
idi.
33 Malya ikwiriyaatay taktak raatiyaana,
<<Tak gaal m'ariit dehaay haay y'aab ikati han?>>
idiin.
34 Yasuu'a bareeyooh dehaay,
<<Tum'ariitu,
beeb aneeb diigwatiyaab harriiweet toonaati saktiiwwa,
ushagaayooh faayistiiwwa tikati.
35 Baraak bhaliib tibariina,
<Fadhig tirga warib malya uuwaak ikati!>
tiyadna.
Laakiin andi hookna:
igw'adeekna nigilnaat tidir'a daayiib shibibna!
Wharru oont'a uwaakii dehaay bashikwu.
36 Uutak uwookana w'ijaarooh itkwis indi,
aree umidhhan udaayimii dehaay wharru iidbil indi.
Aflaay w'aadanaawwa uwookanaawwa hiddaab afirhi iyadna.
37 Aflaay <Gaal y'andi,
weer inwiik.>
iyad ibhali sidik ikatiin.
38 Baraak dehaay shagaamaab bitkaayneet dir'aati waakii dehaay afdig hookna.
Wari ushaga w'akraab shagaamiyaana,
aree baraak bareeyooh ushagaay rayiimtaana.>>
idi.
39 Tutakat <<Ani weeraat iiktiyeet toona kastooh sooyiheeb.>>
tidi akay,
beet tumadiinaatii gwida Saamri Yasuu'ii aamaniyaan.
40 Aflaay Isaamri bariiyooh dehaay eeyaanihoob,
barooh geeboohna soos'ooyt hooy yhariwna.
Yasuu'a han maloot yina beentooy is'a.
41 Bariiyeeh ibhaliyi sabbii masi gwida dehay aamaniyaan.
42 Baraah tutakatii dehaay eeyaaniit,
<<Hinin oont'a aamanna,
batuuk tidii akay kiiki,
laakiin hinin iknaayaan hooy nimaasiwi sabbii aamanna.
Baruuh sidik tuduniya Ishidhhiin ikatiyeet toona nikteen.>>
idiin.
Yasuu'a Udaabti Oor Mheeliya
43 Yasuu'a maloot yina beentooy yhagit har'ii,
y'ish Jaliil ibi.
44 Baruuh uukna,
<<Unabi whaashooh ooknaay kahamooysamiya.>>
idi.
45 Baruuh Jaliil iktimihoob,
Jaliileeb uudehay barooh y'ashishna.
Baraah w'iidii dehaay Algudus beeti giigaa iifiinayt,
baruuh Ubaaskaay W'iidiib beentooy id'iyeet toona kastooh rhaa iifiin.
46 Malya Yasuu'a Jaliiliib tiifiit Gaanaab beeti y'agar.
Been oomhiin baruuh eeyam haab hooy ikwaaseebu.
Beentooy Kafarnaahuumeeb w'ooruuh lhaab iiktiyi hikwuumaati daabit iifi.
47 Uutak Yasuu'a Yahuudaay Jaliil beeti y'aabu miyaad imaasiwihoob,
barooh ibaayt Kafarnaahuum geeb giigiit w'ooriyooh mheelti hooy yhariw.
W'ooruuh tooyat diwlaa iifi.
48 Yasuu'a bariiyooh dehaay,
<<M'uujisaatwa ajaayibwa rhi bitdiineek gaal han hookna aamani kiidi.>>
idi.
49 Uutak Yasuu'ii dehaay,
<<Seedna,
w'ooru baayaay geebu yakaa.>>
idi.
50 Yasuu'a <<Difaa,
w'ooruuk ikwaar indi!>>
idi.
Uutak Yasuu'iib ibhali aamaniyaayt giigiya.
51 Baruuh usalaliib ugawooh bayee,
ikishiyaayaah y'ashishniit w'oor dhhaniib iiktiyeet toona usakana sooyaan.
52 Baruuh ikishiyaayee dehaay,
<<W'oor naadoor shabhamiya?>>
idi.
Baraah <<Iru nabhoob iiktiyihoob y'abaaki hooy imhiin.>>
idiin.
53 Malya w'oori baaba been Yasuu'a bariiyooh dehaay,
<<W'ooruuk ikwaar indi.>>
diyaab iiktiyeeb oodoor iiktiyeet toona ikan.
Aflaay baruuhwa indhiwaayaahwa aamaniyaan.
54 Yasuu'a Yahuudaay Jaliil beeti y'agareekka,
tuun tim'uujisa t'ikwaaseet tumalyaatu.