Yasuu'a Tak Garbamaab Mheeliya
5
Been oodoori har'ii,
Yasuu'a Iyahuudi w'iidii dehaay Algudus ibi.
2 Beentooy Algudus t'anooti dheefa dawil mhiin yami hoodh iifi.
Y'araami bhaliyee Beetehisda iidna.
Baruuh ay wawin gawaayee kwalaalu.
3 Been oomhiin gwida lha dehay b'iina - hamashayaawwa,
garbamaawwa,
am'adhdhaawwa iifiin.
4 Doorka - doorka W'ankwanaay malaktaayi y'iit eeyam ifiidh.
Aayam itfidhni har'ii shuumi takka iibriyeet lhanaaytiika iin'ir.
5 Been oomhiin tak gaal mhay tamuunwa asimhay hawla lhaab iifi.
6 Yasuu'a ootak been oomhiin b'ee rhiyanihoob,
oon whaaliib gwida doora d'iyaab iiktiyeet toona ikan.
Malya <<Min'ir harriiwa?>>
idi.
7 Uutak uulha igwibi,
<<Seedna,
aayam itfadhiinihoob istoobiyi tak han kaabari.
Ani tooy y'ee,
anii suurii weer gaal tikwiya.>>
idi.
8 Yasuu'a bariiyooh dehaay,
<<Asti yakaa!
Tumadhamtook yaksaat hiireera.>>
idi.
9 Uutak igidiyeesooh in'iraayt tumadhamtooh yakisiyaayt hiireeriya.
Beet tuuna hooy tiiktiyeeb uumb'i aree sabtu.
10 Aflaay Yahuudi suurkina ootak umheelamiyaanaay dehaay,
<<Amsi sabtu,
tumadhamtiyook yaksiti ugaanuun y'anfi hook.>>
idiin.
11 Uutak <<Aneeb mheeliyaab uutak tumadhamti yaksiit andiifeet toona sooyiheeb.>>
idi.
12 Baraah ootak raatiyaana,
<<Een sooyanuuk uutak aabu?>>
idiin.
13 Yasuu'a beentooy oodehay oogwidaanaay tehooyteeb kwidhiya akay,
uutak umheelamiya been ootak aab iiktiyeeb igam.
14 Malya Yasuu'a ootak Ukwaasanaay gawiib imriit bariiyooh dehaay,
<<Shibiba,
baruuk masi tin'ira.
Toomaag singada tari weena amaagkaat dehook iikti tindi.>>
idi.
15 Aflaay uutak Iyahuudi ibaayt,
ootak barooh mheeliyaab Yasuu'aab ikatiyeet toona sooya.
16 Aflaay Yasuu'a toosab mheeliya akay,
Iyahuudi barooh haakamtiib yhariwna.
17 Yasuu'a bareeyooh dehaay,
<<Aniib Ubaaba oon oomb'i diimaab shagaamiini,
ani han shagaamani.>>
idi.
18 Een ibhaliyi sabbii Iyahuudi sidik Yasuu'i madar yhariwna.
Baruuh toosabti hag ikit'eet toona kitti,
laakiin Ukwaasana han barooh ooknaay ubaabaayt waliikiya.
Ugarooyooh Ukwaasana isnaddir.
W'ooriit Had'aayi
19 Yasuu'a bareeyooh dehaay bak igwibi,
<<Oosdik andi hookna:
W'oor uukna naati d'uuy ka'adgiriya,
Baabooh d'iyee rhiiniyeet toona toobhaat dan'i.
Ubaaba dan'iyeet toona aree W'oor han dan'i.
20 Ubaaba W'oorooh areeyiini,
baruuh dan'iyeet toona aree kastooh rhisiini.
Bareekna ajjabsiiniyi jillaay teen tinaateeka han wawinkaat barooh rhisi indi.
21 Ubaaba y'ayaab yaksiit ishidhhiineet toonaatiit,
W'oor han ishidhhin indiyeeb bak midhhan iniiw.
22 Ubaaba uukna gaal han kahaakamiya.
Laakiin whaakamti hag kassooh W'oorooh hiiyyaabu.
23 Aflaay uudehay kassuuh Ubaaba hamooysiiniib W'oor han bak hamooysi iyadna.
W'oor baahamooysii,
Ubaaba barooh ifdig han kahamooyisiya.
24 Oosdik andi hookna:
baliin aniib ibhali maasiwtiit beeb aneeb ifdig aamaneenka,
umidhhan udaayim imaar iyadna.
Baraah haakamami kiidiina,
laakiin suur akay tooyatii umidhhan ookiik hasamiyaan.
25 Oosdik andi hookna:
damaan y'iini aree oont'a suur akay y'aabu,
y'aya Ukwaasanaay Oori hiss iimsaw iyadna.
Baliin y'eemsiiw aree midhhan imaar iyadna.
26 Ubaaba uukna midhhani gw'ad ikatiyeet toonaatiit,
W'oorooh han bak midhhani gw'ad ikwaas.
27 Baruuh aree W'aadami Oor ikatiyi sabbii,
whaakamtiit had'aayi barooh yhii.
28 Toon toonaatiib baa'ajjabamaana,
kassaah y'ayaab bariiyooh whiss hooy iimsaw iyadneeb uudoor y'aabu.
29 Baraah imiimashaayee itfir'a iyadna.
Baliin daayiina shagaamaab yakiit midhhan imaar iyadna,
baliin toomaag shagaamaab aree yakiit ituurib iyadna.
30 Ani uknaayu naat han kaad'i.
Ani t'eemsiiwi toobhaat haakamani,
aree aniib whukwim adilu.
Aflaay ani ugarooyu afirhistiib kaad'i,
laakiin been aneeb diigwatiyaab harriiweet toona toobhaat adan'i.>>
idi.
Yasuu'iib Ikatiint Tibadeha
31 Yasuu'a <<Ani uknaayu kehii abandeheek,
aniit tibadeha sidkiina kii'akeen.
32 Laakiin anii dehaay badehiib ikati weer eefi.
Baruuh aniib ikwasiyeet tibadeha aree sidik ikatiineet toona akteen.
33 Baraak Yuuhannaab beeti diigwatkinaab tifdigna,
baruuh aree oosdik bidehaabu.
34 Ani ibakii aadamiit badeha harwaab kaaki.
Een haay andiyeeb usabab aree baraak tari han midhhan timeerna.
35 Yuuhanna tulamba balooliit buubtiniit t'iiteebu.
Baraak aree udoorooh been oonuur haay afirhitiib tehariwna.
36 Laakiin Yuuhannaayiit tibadehaateeka han wawinkaat badeha abari.
Ani adan'iyeet toona,
been ushaga Baabu faaysiti jillaay hiiyyaayu ikatiyeebu.
Aree baruuh Ubaaba diigwataayu ikatiyeet toona rhisiini.
37 Ubaaba aneeb diigwatiyaab han anii dehaay badehiib ikati.
Baraak bariiyooh whiss maasiwaab han kitteena tari ifiireeh han rhaab kitteen.
38 Bariitooh tudiigwat han igin'aayeeb kitdibiina,
aneeb diigwatiyaab han baraak haay ka'aamantaana.
39 Baraak eektab agriiteena,
iktabeeb umidhhan udaayim timeerneeb hiisteena.
Aan aaktab aree kassaah aniib hadiideen.
40 Laakiin baraak anii dehaay y'iit umidhhan timeerneet toona kitehariwna.
41 Ani dehayi hamaad kaahariw.
42 Laakiin ani baraak naa dehay tikatiineeb daayiib akan hookna.
Ukwaasanaay reer igin'aayeekna bitbariineet toona akan.
43 Ani Baabiyu oosmii y'an,
aree baraak gabbalamaayi kitteena.
Laakiin weer gaal ooknaay simii y'iiniyihoob,
gabbalami tiyadna.
44 Baraak taktak tehamidneet toona tehariwna.
Laakiin been ood'ooh Ukwaasana ikatiinaay hamaad rayiimteeneet toona kitehariwna.
Aflaay kak aamanteenheeb?
45 Ani Baabiyu suurii amgariimeeyookna baahiisaana.
Muusaab ubaraakna s'ayaamtaani gariimiyookna iikti indi.
46 Baraak Muusaab sidik aamanaab tiiktiineek,
baruuh aniib kitbaabuuyt,
aneeb han aamantiina.
47 Baraak baruuh kitbaab iiktiyeet toona aamanaab kitteena,
shaawti ani andiyeet toona kak aamanteena?>>
idi Yasuu'a.