Yasuu'a Ay Alfa Dehay Tamisiya
6
Oonaay har'ii,
Yasuu'a Jaliiliib oobhar Tiibaaryaas iidneeb beeti idif.
2 Tim'uujisa been oodehay oolhaab haay mheeliyaneet rhiyaan akay,
barooh gwida dehay iramna.
3 Yasuu'a ribaab reewiyaayt ikwiriyaatayeeh geeb n'ati is'a.
4 Been oodoor Iyahuudi Baaskaay w'iid dawilu.
5 Yasuu'a asti ishbibaayt gwida dehay barooh ookiik y'ee rhiyanihoob,
Fiilibus raatiya,
<<Oon oodehay kassooh haay tamsinayi hadhiib naad nimeer?>>
idi.
6 Yasuu'a een ibhali Fiilibusi jarrabti haay yhiriw nuun,
kak weeri iideeb suur akay iktiin.
7 Fiilibus <<Gaalka hadhiyi firkaak marriyee dehaay,
malu shi diinaar han kamhiyaan.>>
idi.
8 Bariiyeeh ikwiriyaatayee weer Siimoon Bitrusi san Andraawoos hadiidiya,
9 <<Tooy oor gaal ay sha'iiri hadhiiwwa malu aashoob dadiswa ibariib eefi.
Laakiin oon oodehay kassooh sidik kamhiyaan.>>
idi.
10 Yasuu'a ikwiriyaatayee dehaay,
<<Oodehay n'ati soos'ana.>>
idi.
Been oomhiin gwida siyaam iifi,
aree uudehay kassuuh n'ati is'ana.
Baraah ay alfa dehay iiktiin.
11 Yasuu'a yhadhi yakisiyaayt Ukwaasana yhamid,
malya oodehay beentooy iifiinaay dehaay yhadhi y'aadhidh.
Y'aashu han bak iweer,
uudehay kassuuh aree gabiyaaneeb ookiik tamiyaan.
12 Kassaah gabiyaanihoob,
baruuh ikwiriyaatayeeh dehaay,
<<Toodhikw dibilna,
naat han bangiideet toonaati.>>
idi.
13 Aflaay toodhikw kastooh ishaawawiiniit,
tamna malu biileeb hooy toobiyaan.
Tuun tuudhikw kastuuh aree usha'iiri y'ay hadhi uudehay tamiyaaniit isimhaneeba.
14 Uudehay toon tum'uujisaatiit alaama Yasuu'a ikwaaseet rhiyaaniit har'ii,
<<Uun baruuh sidik Unabi tuduniyaatii dehaay y'iini attiyoodiyaab ikati.>>
idiin.
15 Yasuu'a baraah y'iit barooh abkiit akruurii had'aab iikwsiineet toona ikanaayt,
masi uukna oorba reewiya.
Yasuu'a Eeyami Kehii Hiireeriya
16 Whawaad eeyani door,
ikwiriyaatayaah oobhar tikwiyaan.
17 Falluukaat y'amniit oobhar oodar ooraaw beeti Kafarnaahuum ookiik idifna.
Bareeh hawaad dehaay iki.
Yasuu'a aree bareeh masi dehaay y'aa kiihaay.
18 Winneet akra baraam eeyaayt,
eeyam irgis.
19 Ikwiriyaatay ay tari asagwir kiiloomitra isiignihoob,
Yasuu'aab iyami kehii hiireeree tufalluuka diwlee rhiyaani door irkwiin.
20 Laakiin Yasuu'a bareeyooh dehaay,
<<Baarakwiina,
uun aneebu!>>
idi.
21 Baraah barooh tufalluuka reewisti yhariwna,
tufalluuka aree willa baraah iibiineeb oodar tiktim.
22 Tooyin tumalya,
iyami dar uraawiib yhigit uudehay falluukaat gaat beentooy tehiyeet toona rhiyaan.
Yasuu'a aree ikwiriyaatayi geeb tufalluuka amaab biikaayeet toonaawwa,
laakiin baraah ood'oohna giigiyaaneet toonaawwa rhiyaan.
23 Malya been W'ankwana yhamidaayt har'ii uudehay yhadhi hooy tamiyaaneeb oomhiini daraag falluukaat gwadit Tiibaaryaasii eeyaan.
24 Uudehay Yasuu'a beentooy biihaayeet toona rhiyaan.
Ikwiriyaatayeeh han rhaab kiikeen.
Malya baliit tifalluuka y'amniit bariiyooh harawaay Kafarnaahuum ibeen.
Yasuu'a Umidhhani Hadhi
25 Barooh iyami dar uraawiib imriinihoob raatiyaana,
<<Seedna,
nhoob tooy tiktima?>>
idiin.
26 Yasuu'a igwibi,
<<Oosdik andi hookna:
baraakna aneeb haay tehariwneeb usabab m'uujisaat rhitaaneet toonaatii kiiki.
Laakiin yhadhi gabtaaneeb ookiik tamtaani sabbii aneeb tehariwna.
27 Amaagt m'ariitii dehaay baashagaamaana.
Laakiin tum'ari umidhhan udaayim tiniiwtookna batiiyooh dehaay shagaamaana.
Ukwaasana Ubaaba gabbalamtiit t'alaamaatooh W'aadami Oori kehii daasaabuuyt,
tuun batuuh aree tum'ari baruuh iyaaw hookna indiyeet tikati.>>
idi.
28 Malya uudehay barooh raatiyaana,
<<Ukwaasana harriiweet toona nid'ee dehaay ibakii naan nid'eet toonaatu?>>
idiin.
29 Yasuu'a igwibi,
<<Ukwaasana harriiweet tuuna bak teefi:
baruuh dehookna ifdigeeb oongaal aamanaana.>>
idi.
30 Aflaay baraah barooh raatiyaana,
<<Shibibtiit aamannayi jillaay,
aflaay baruuk naat m'uujisa iikwasi tindiya?
Naan iid'a tindiya?
31 Hinin hoobaan umingaayiib mannaaba tamiyaan.
Uuktaab diyaab ikatiyeet,
<Baruuh tibreetee bareeh m'ariit tamiineet yhii.>
indi.>>
idiin.
32 Yasuu'a bareeyooh dehaay,
<<Oosdik andi hookna:
tibreetee bareekna yhadhi hiiyyaab Muusaab kiiki,
laakiin tibreetee usidki hadhi bareekna iniiw Baabu ikati.
33 Ukwaasanaay hadhi ikatiib,
beeb tibreetee n'ati y'iit tuduniya midhhan iniiwu.>>
idi.
34 Uudehay <<Seedna,
shaawti een yhadhi diimaab hiiyya hoon.>>
idiin.
35 Yasuu'a bareeh sooya,
<<Ani umidhhani hadhi akati.
Baliin aneeb beeti y'een door han itehirigw kiidiina,
baliin aneeb aamaneen door han ityiw kiidiin.
36 Laakiin ani sooyaneetookna toonaatiit,
baraak rhitaanheeb masi aamanaab kitteena.
37 Baabu iniiweetu tuuna kastuuh y'iheeb tindi,
aneeb beeti y'iiniibka aree door han fidnaab giigsi kaadi.
38 Ani tibreetee y'anihoob,
ani aharriiweet toonaati saktii dehaay y'aab kaaki.
Laakiin aneeb diigwatiyaab harriiweet toona atankwiikwi jillaay y'aabu.
39 Aneeb diigwatiyaab hoosu harriiweet toona aree:
baruuh hiiyyaayu ikatiyeeb kasseeh gaal han baakwidhsaayeet toonaati.
Laakiin t'aakharaati b'i bareeh asti yaksi andi.
40 Baabu harriiweet toona:
W'oor shibibtiit barooh aamaniiniibka umidhhan udaayim imaar indi.
T'aakharaati b'i aree barooh asti yaksi andi.>>
idi.
41 Yasuu'a <<Yhadhi tibreetee n'ati eeyaan aneebu.>>
diyaabuuyt,
Iyahuudi Yasuu'ii ashkiimiyaan.
42 Baraah <<Uun baruuh Yasuu'aab Yuusifi oor kiiki han?
Ubaabaawwa toondeewwa nikteeniyeek,
aflaay baruuh <Tibreetee n'ati y'an> kak indi?>>
idiin.
43 Yasuu'a igwibi,
<<Taktakee dehaay w'ashkiimti singadna.
44 Baabu aneeb diigwatiyaab insiikweeb nuun,
gaal han aneeb beeti w'aay ka'adgiriya.
Barooh aree t'aakharaati b'i asti yaksi andi.
45 Tuun batuuh Inabiyaayi kitabeeb kataabtu:
<Bareeh kasseeh Ukwaasana allami indi.>
diyaaba.
Ubaaba sinaakriit bariisooh allamamiiniibka anii dehaay y'iini.
46 Ukwaasanaay ikatiib beeb nuun,
gaal han Ubaaba rhaab kiiki.
Baruuh uubhaat Ubaaba rhaabu.
47 Oosdik andi hookna:
aamaniiniibka umidhhan udaayim imaar indi.
48 Ani umidhhani hadhi akati.
49 Hoobaakna umingaayiib mannaab tamiyaana,
laakiin iyaan.
50 Laakiin hadhiib tibreetee n'ati y'een tooy eefeen.
Een bareeh tamiiniib uutak iiyyi kiidi.
51 Tibreetee y'aab yhadhi idhhaniib aneebu.
Een yhadhiyee tamiiniibka diimaab midhhan imaar indi.
Aan yhadhi aniib ubasharu,
aree barooh ani tuduniyaati midhhani jillaay iyaaw andi.>>
idi.
52 Malya Iyahuudi winneet taktak imgwassaarniit,
<<Uun uutak tamnayi jillaay ubasharooh kak iniiw hoon?>>
idiin.
53 Yasuu'a bareeyooh dehaay,
<<Oosdik andi hookna:
W'aadami Oori bashar tamiit ubooyooh gw'i bitdiineek,
abiiyaakna midhhan imaar kitdiina.
54 Baliin aniib ubashar tameenwa,
aniib oobooy gw'eenwa umidhhan udaayim imaar iyadna.
T'aakharaati b'i aree ani bareeh asti yaksi andi.
55 Aniib ubashar sidkiit m'ariitu,
aniib uubooy aree sidki gw'astiibu.
56 Aniib ubashar tameenwa,
aniib oobooy gw'eenwa baliin aniib ikweerna,
ani han bareeyooh akwarri.
57 Ubaaba udhhani diigwatiyaheeb,
ani han bariiyooh sabbii akwarri.
Oont'aaneet aneeb tamiiniibka han bak anii sabbii ikwaar indi.
58 Aan yhadhi tibreetee tikwaaba.
Hoobaakna mannaab tamiyaaniit iyaana,
laakiin een yhadhi tamiiniibka diimaab ikwaar indi.>>
idi.
59 Yasuu'a een ibhali hadiidiyanihoob,
baruuh Iyahuudi diini gawiib Kafarnaahuumiib allami.
Umidhhan Udaayimiit Kalma
60 Gwida ikwiriyaatayeesooh barooh een diyee imaasiwna,
<<Uun akra t'aliimu,
aaw barooh gabbalamiini?>>
idiin.
61 Yasuu'a ikwiriyaatayaah een ibhaliyee ashkiimiineet toona iktiin.
Aflaay baruuh bareeyooh dehaay,
<<Aan baraah gallabeen hookna han?
62 W'aadami Oor suur hooy iifiyeeb oomhiin ookiik reewee rhiteeneek aree!
63 Aashuuk midhhan iyawna.
Oodehayi taad naat han kiid'i.
Ibhali ani dehookna hadiidaneeb shuuk ikatiina aree midhhan ikatiin.
64 Masi bareesookna gwadi aamanaab kiikeen.>>
idi.
Yasuu'a baliib y'aamanaab baakaay whankaay iktiin,
barooh iitil iyad han iktiin.
65 Malya Yasuu'a masi,
<<Ubaaba adgirsaab biikaayeeb ootak nuun,
gaal han aneeb beeti y'iiniib kiihaay haay adiyeeb usabab aree baku.>>
idi.
66 Been udoorii gwida ikwiriyaatayeesooh fidnaab y'agarna aree shaawti barooh aram kiikeen.
67 Yasuu'a itamna malu raatiya,
<<Baraak han giigi kitdiina,
bak kiiki?>>
idi.
68 Siimoon Bitrus bariiyooh dehaay igwibi,
<<W'ankwanaay,
aab neebi?
Baruuk umidhhan udaayimi bhali tibariya.
69 Oont'a aamanna,
aree baruuk Ukwaasanaay y'aab Oongaal Umugaddas tikatiyeet toona nikan.>>
idi.