Yasuu'aawwa Isanaayeehwa
7
Oonaay har'ii,
Yasuu'a Jaliiliib hiirareeriya.
Laakiin Iyahuudi suurkina Yahuudaay iifiin barooh madar yhiriwnayt,
Yahuudaay fidnaab giig niyaamiya.
2 Laakiin Iyahuudi w'iid Itikheemaati iidwilihoob,
3 Yasuu'iib isana bariiyooh dehaay,
<<Oon whaashii giigaat Yahuudaab bayaa.
Aflaay ikwiriyaatayaak baruuk dan'iyeet tim'uujisa rheen.
4 Atookakinooyt yharriiw uutak,
tishagaamiiniyi kiikwibis.
Teen teena baruuk tikwasiyeet toona uudehay kassuuh ba'iktiin hook.>>
idiin.
5 Isanaayaah aakna han barooh aamanaab kiikeen.
6 Aflaay Yasuu'a bareeyooh dehaay,
<<Aniib uudoor masi y'aab kiiki.
Laakiin bareekna kassuuh uudoor dehookna ishboobi.
7 Kastuuh tuduniya kitrib hookna,
laakiin bareeyaah isalala amag ikatiineet toona sooyaniyayt,
baraah aneeb eeribna.
8 Baraak w'iid beena,
ani iibi kaadi.
Aniib uudoor masi y'aab kiiki.>>
idi.
9 Yasuu'a een ibhali idiit,
Jaliileeb imhi.
Yasuu'a Tikheemaati Iidiib
10 Isanaayaah w'iid ibeeniit har'ii,
Yasuu'a han giigiya.
Laakiin gw'agwuuyt giigaab kiiki,
kwibasee giigiya.
11 Iyahuudi w'iidiib barooh yhiriwna.
Baraah <<Been uutak naad eefi?>>
iidna.
12 Uudehay kassuuh taktaki angwileeb bariiyooh hadiidiyaan.
Gwadi <<Uun baruuh daayi taku.>>
idiin.
Wari aree <<Abadan,
baruuh oodehay tanliis.>>
idiin.
13 Laakiin baraah Iyahuudi eegrima iriikwnayt,
gaal han gw'agwuuyt bariiyooh hadiidaab kiiki.
14 Yasuu'a Ukwaasanaay gaw ibaayt allamiyihoob,
aflaay w'iid mingidee dehaay tarabeema iifi.
15 Iyahuudi winneet ajjabamiyaaniit raatiyaana,
<<Uun uutak agriiyaab baakaay kak naatka ikteen?>>
idiin.
16 Yasuu'a <<Ani allamaniyeet tuuna,
aneeb uknaayu t'aliim kiiki.
Laakiin Ukwaasana aneeb diigwatiyaanaay t'aliimu.
17 Ukwaasana yharriiweet toonaati d'uuy harriiwka,
ani allamaniyeet toona ani uknaayiitu tikatiyeeb tari Ukwaasanaay y'aat tikatiyeeb iikan indi.
18 Uutak ooknaayt had'aayeetii hadiidiiniib ugarooyooh dehaay matuun isehariiw.
Laakiin barooh diigwatiyaanaay matuun yharriiw sidkiibu.
Bariiyooh naat han galat kiihaay.
19 Muusa whag yhii hookna,
bak kiiki?
Laakiin gaal han hookna whag sinaakiraab kiiki.
Naanhooy anii madar tehariwna?>>
idi.
20 Uudehay igwibiina,
<<Barook jin hook eefeena,
aaw bariiyeek madar harriiw?>>
idiin.
21 Yasuu'a bareeyooh dehaay,
<<Ani gaat m'uujisa akwaas,
baraak kassaak aree ajjabamtaana.
22 Muusa y'areeyookna kwishuub sooyi hookna.
Ukwishuubi sooti Muusaay kiiki,
laakiin hoobaakna badooyaan.
Aflaay baraak y'ar toosab tikwashibna.
23 Y'ar toosab itkwashiibneek,
Muusaay whag kat'a kiiki.
Aflaay ani toosab tak daayiib mheelanayt,
baraak naanhooy hoosu tehaseena?
24 Shaawti tusaraat shibibtiit baahukwimaana,
w'adlii aree hukwimaana.>>
idi.
Uun Baruuh Umasiih Ikati?
25 Algudusi dehay gwadi,
<<Uun baruuh baraah madar yhariwneeb ootak kiiki han?
26 Shibibna!
Baruuh oodehayi suurii hadiidiini,
aree baraah bariiyooh kehii kalmaat han diyaab kiikeen!
Uun baruuh sidik Umasiih ikatiyeet toona ikanna han?
27 Laakiin Umasiih y'iiniyeeb oodoor,
baruuh naa mhiinii y'iiniyeeb gaal han iikan kiidi.
Laakiin uun uutak keeya mhiinii y'iiniyeeb hinin kassaan nikteen.>>
idiin.
28 Malya Yasuu'a masi Ukwaasanaay gawiib tageega hissii,
<<Sidik aneeb tikteenna?
Ani keeya mhiinii akatiyeeb tikteenna?
Ani uknaayiitu had'aayeetii tooy y'aab kaaki.
Laakiin been aneeb diigwatiyaab sidkiibu.
Baraakna barooh kitkanna.
29 Laakiin ani bariisooh y'aabu aree baruuh diigwatiyaheeb akay,
ani barooh akteen.>>
idi.
30 Malya barooh kwilaltiit abuuk yhariwna,
laakiin bariiyuuh uudoor masi y'aab kiikuuyt,
gaal han bariiyooh kehii w'ayooh daasaab kiiki.
31 Laakiin gwida dehay oomhiin iifiin barooh aamaniyaan.
Baraah <<Umasiih y'iiniyihoob,
oon ootakiika gwidaakaat m'uujisa iikwasi indi han?>>
idiin.
32 Ifariisi uudehay taktaki angwileeb Yasuu'iib hadiidiyaaneeb ibhali imaasiwna.
Baraahwa ifagiiriyaayi suurkinaawwa barooh y'ibikni jillaay kajar gwadib diigwatiyaan.
33 Yasuu'a bareeyooh dehaay,
<<Ani shalik door geebookna daayi andi,
malya aneeb diigwatiyaayu beeb beeti giigi andi.
34 Baraak aneeb hiriw tiyadna,
laakiin imaarheeb kitdiina.
Ani eebiyeeb oomhiini mabay ka'adgirtaana. >>
idi.
35 Iyahuudi taktakee dehaay,
<<Baruuh naaysooh niyaami indiyayt,
hinin barooh nimaar kindi?
Yoonaaneet timadiina udehayuun hooy kwarriyeet beeti diftiit,
Iyoonaani allami indi han?
36 Baruuh <Hiriwheeb tiyadna,
laakiin imaarheeb kitdiina.
Ani eebiyeeb oomhiini mabay ka'adgirtaana.>
indiyihoob een naan haay isehariiw?>>
idiin.
37 Been w'iidi b'i w'aakhareeb,
aree baruuh hooy daayika b'eebu.
Yasuu'a asti yakiyaayt tageega hissii,
<<Yaweebka anii dehaay m'aanaat gw'aana!
38 Aneeb aamaniiniibka gw'aana!
Uuktaab <Midhhan iyaw yami thaw bariisooh kwaaneen.>
diyaabu.>>
idi.
39 Een ibhali barooh aamaneen uudehay malyaab imeerneeb Eeshuuk haay isehiriw.
Yasuu'a umatuunii dehaay yakamaab kiikuuyt,
been oodoor ookiik Aashuuk attiyeewiyaab kiikeen.
40 Yasuu'aab een ibhali diyee imaasiw oodehayii gwadi,
<<Uun uutak sidik Unabi ikati!>>
idiin.
41 Wari aree <<Uun Umasiih ikati!>>
idiin.
Laakiin wari <<Umasiih Jaliilee kak y'iini!>>
idiin.
42 Uuktaab <<Umasiih Whad'a Daawidiit tidirriyaaytii y'iini,
Daawid hooy ikwiireet tumadiina Beetlahameeb aree itfari.>>
diyaabu.
43 Yasuu'i sabbii aree uudehay y'adhadhna.
44 Gwadi barooh abuuk yhariwna,
laakiin gaal han w'ayooh kehii daasaab kiiki.
Iyahuudi Suurkinaayi W'iimaani Naaw
45 Ikajar ifagiiriyaayi suurkinaawwa Ifariisiiwwa beeti y'agarnihoob,
baraah raatamamiyaana,
<<Naanhooy barooh haay y'aab kitteena?>>
ittiyoodaayna.
46 Ikajar igwibiina,
<<Oon ootakiit hadiidi tak han kiihaay!>>
idiin.
47 Ifariisi <<Bareekna han itlis hookna han?
48 Isuurkinaayee tari Ifariisiyee gaal han barooh aamaniya?
49 Uun uudehay Muusaay whag kiikanna,
shaawti bareeh Ukwaasanaay w'aat kehii daayi indi.>>
idiin.
50 Ifariisiyeeb gaal Niigoodiimoos iidni beentooy iifi.
Been uutak suur Yasuu'i rheesamtiib giigaabu.
Baruuh irawee dehaay,
51 <<Hineeb whaggiib ibhaliyeeh baasinaakiir gaal han gwabab kins'abik.
Baruuh gwibbaab ikatiyeet toona nishabib.>>
idi.
52 Baraah igwibiina,
<<Baruuk han Jaliilee y'aabwa han?
Eektab agriiya,
nabiib Jaliilee y'iiniib biihaayeet toona iikan tindiya.>>
idiin.
53 Malya gaalka ugawooh ookna ibi.