Takat Haraam Sakee T'abak
8
Yasuu'a laakiin oorba saytuun reewiya.
2 Tooyin tooraaw kiruumaab,
Ukwaasanaay gaw beeti y'agar.
Kassuuh uudehay barooh ikwilalniit is'ana,
aree baruuh n'ati is'at oodehay allamiya.
3 Whaggi koojaawwa Ifariisiiwwa takat haraam saktiit imriiniit y'abikniit haay eeyaan.
Batooh aree kassooh oodehayi suurii isingadna.
4 Baraah Yasuu'ii dehaay,
<<Seedna,
toon tootakat haraam sakee n'abik.
5 Hineeb whaggiib Muusa,
<Bak t'iiteet tootakat tooyat ookiik rajamooyaana.>
diyaabu.
Oont'a baruuk aree naan tindiya?>>
idiin.
6 Baraah een ibhali sharak Yasuu'iit s'abkooyt haay isehiriwna.
Laakiin Yasuu'a n'ati kuuramiyaayt tugiibalaaytiisooh whaashi kehii iktib.
7 Baraah ingadniit barooh raatiyaanihoob,
baruuh ikuuramtii ifidhadhaayt,
<<Bareesookna door han maagnaayt gwibbaab baakaay uutak,
awwal w'awi batooh haay ba'iigid.>>
idi.
8 Malya Yasuu'a masi whaashi kehii kuuramiyaayt iktib.
9 Baraah een ibhali imaasiwnihoob,
kassaah gaal gaalnaay giigiyaan.
Y'eegrima y'adhamiinaayi hankaay ifr'ana.
Yasuu'a ood'ooh imhi,
tutakat han beentooy masi tingid.
10 Yasuu'a ifidhadh ingadaayt batiiyooh dehaay,
<<Baraah naad ibeen?
Batook atehimiini gaal kiihaay han?>>
idi.
11 Tutakat <<Seednaay,
gaal han kiihaay.>>
tidi.
Yasuu'a <<Aflaay daayiitu,
ani han atehimi hook kaadi.
Shaawti difii,
weer door maagnaayt biishagaamii.>>
idi.
Yasuu'a Tuduniyaati Nuur
12 Yasuu'a masi Ifariisi infaraadiit,
<<Ani tuduniyaati nuuru,
aneeb eetriimka midhhani nuur imaar indi,
door han aree thibniib hiireeri kiidi.>>
idi.
13 Ifariisi bariiyooh dehaay,
<<Oont'a baruuk ugarooyook kehii badehaat tikwasiya,
baruuk tindiyeet aree sidik kitti.>>
idiin.
14 Yasuu'a <<Abadan,
ani ugarooyu kehii badehaat akwasiyeek han,
ani andiyeet tuuna sidiku.
Ani hooy y'aab akatiyeeb oomhiin aree akteen,
naaysooh eebiyeeb aree akteen.
Baraak ani keeya mhiinii y'aab akatiyeeb tari nhooh eebiyeeb kitkanna.
15 Baraak w'aadami salalii oodehay tehakwimna,
ani laakiin gaal han haakami kaadi.
16 Laakiin ani bak weeri iideek,
whukwimu sidik iikti.
Ani oonaay ood'u kaaki,
aneeb diigwatiyaab Ubaaba geebu eefi.
17 Tuun batuuh bareek whaggiyookna kataabtu,
malu badehi taafagsameenihoob,
tibadeha sidik ikatiin.
18 Aflaay ani ugarooyu kehii badehiibu,
Ubaaba aneeb diigwatiyaab han anii dehaay badehiibu.>>
idi.
19 Malya baraah barooh raatiyaana,
<<Baabuuk naad eefi?>>
idiin.
Yasuu'a <<Aneeb kitkanna,
Baabu han kitkanna.
Aneeb tiktiinneek,
Baabu han tiktiinna.>>
idi.
20 Yasuu'a Ukwaasanaay gawiib allamee,
umiyaawi sanduuk daasamaab iiktiyeeb ugawiib een ibhali kasseeh hadiidiya.
Udooruuh masi y'aab kiikuuyt,
gaal han barooh abkaab kiiki.
21 Masi Yasuu'a bareeyooh dehaay,
<<Ani fidnaab giigi andi,
aree baraak aneeb hiriw tiyadna,
laakiin tumaagtiisookna iiyyi tiyadna.
Ani eebiyeeb oomhiin baraak oogiig ka'adgirtaana.>>
idi.
22 Iyahuudi raatiyaana,
<<Baruuh eebiyeeb oomhiin hinin kinbi indi hoon.
Een ibhali ugarooyooh madar haay isehariiw han?>>
idiin.
23 Yasuu'a <<Baraakna toon tuduniya tooy whii teefeenaatiib tikatiina,
ani laakiin mhakwaliisii y'aabu.
Baraakna toon tuduniyaatii tikatiina,
ani laakiin toon tuduniyaatii kaaki.
24 Toon toonaatii dehaay,
<Tumaagtiisookna iiyyi tiyadna.>
adi hookna.
Ani aab akatiyeeb aree aamantiina bitdiineek,
tumaagtiisookna iiyyi tiyadna.>>
idi.
25 Baraah barooh raatiyaana,
<<Baruuk aabwa?>>
idiin.
Yasuu'a <<Suur idabaay sooyaneetookna toonaatu.
26 Ani gwidaana hookna andiyeet abari,
gwidaana aree bareek haay atehimani.
Aneeb diigwatiyaab laakiin sidkiibu.
Ani bariisooh maasiwaab akatiyeet toona toobhaat oodehay sooyani.>>
idi.
27 Laakiin baraah baruuh Ubaabaay hadiidiyeet toona afhamaab kiikeen.
28 Aflaay Yasuu'a bareeyooh dehaay,
<<Baraak W'aadami Oor asti yaksiteenihoob,
ani aab akatiyeeb iikan tiyadna.
Malya aneeb uknaayiitu had'aayeeti naat han baad'iyeet toona iikan tiyadna.
Laakiin Ubaaba sooyiiniyeetu toona toobhaat andiyeet toona iikan tiyadna.
29 Aneeb diigwatiyaab geebu eefi.
Ani diimaab barooh anfirhistiniit toona adan'i akay,
baruuh han aneeb ood'u ishaayu kiiki.>>
idi.
30 Gwida dehay Yasuu'a een ibhali diyee imaasiw,
barooh aamaniyaan.
Ibraahimi Ar
31 Yasuu'a baliib barooh aamaniyaanee dehaay,
<<Aniib ut'aliim tisnaakiirneek,
sidik anii kwiriyaatay iikti tiyadna.
32 Malya oosdik iikan tiyadna,
uusdik aree iifdig hookna indi.>>
idi.
33 Baraah bariiyooh dehaay igwibiina,
<<Hinin Ibraahiimi ara,
gaalnaay whii door han kishiyaamaab kinki.
Aflaay <Itfidig tiyadna> oomiyaad naan haay tisehariiwa?>>
idiin.
34 Yasuu'a bareeyooh dehaay,
<<Oosdik andi hookna:
Maagnaayt gwanbiibka toomaagti kishiya ikati.
35 Ukishiya diimaab indhiwaayeeb kadaaya,
laakiin w'oor diimaab indhiwaayi oor ikati.
36 W'oor fandiiguukna,
sidik itfidig tiyadna.
37 Baraak Ibraahiimi ar tikatiineet toona akteen.
Aniib ut'aliim gabbalamaab kittaanayt,
baraak aneeb madar tehariwna.
38 Ani Baabu rhisiyaneetu toonaatiib hadiidani,
laakiin baraak han baabuukna sooyaneetookna toona shagaamteena.>>
idi.
39 Baraah <<Baabuun Ibraahiimu.>>
idiin.
Yasuu'a igwibi,
<<Sidik Ibraahiimi ar tiiktiineek,
baabuukna iid'eet teena tiid'ana.
40 Laakiin ani Ukwaasanaay amaasiweeb usidki sabbii baraak aneeb madar tehariwna.
Ibraahiim bak t'iiteena sakaab kiiki.
41 Baraak baabuukna uukna sakiiniyeet toona sakteena.>>
idi.
Baraah <<Hinin haraami ar kinki.
Ubaaba oongaal hinin nibariyi Ukwaasana ookna ikati.>>
idiin.
42 Yasuu'a bareeyooh dehaay,
<<Ukwaasana sidik Baabookna iiktiyeek,
aneeb areetiina.
Ani Ukwaasana diigwatiyaheeb,
oont'a aree tooy eefi.
Ani uknaayiitu had'aayeetii y'aab kaaki,
laakiin baruuh diigwatiyaheeb.
43 Ani andiyeet toona naanhooy ka'afhamtaana?
Tuun tuuna aree baraak aniit tudiigwatti maaswi bitehariiwneet toona rhistini.
44 Baraak baabiyeekna ar tikatiina,
baabookna oobliis,
baruuh yharriiweet toona aree saktiib tehariwna.
Bariiyooh sidik kiihaay,
baruuh whankaay madooru,
door han usidki dar kiingad.
Gwisir hadiidiiniyihoob,
ibhaliyeeh eekna hadiidiini.
Baruuh gwisreebuuyt,
aree igwisri baaba ikati.
45 Laakiin ani oosdik andi hooknayt,
baraak aamanaab kitteenaheeb.
46 Bareesookna aneeb maagnaayti gwabab is'abiik aabu?
Ani oosdik andiyeek,
naanhooy ka'aamantaanaheeb?
47 Ukwaasanaay y'aab ikatiib been Ukwaasanaay bhali isnaakiir.
Laakiin baraak Ukwaasanaay kitteena.
Oon usabbii aree baraak isniikar kitdiina.>>
idi.
48 Baraah barooh raatiyaana,
<<Baruuk Saamriibwa,
jin hook eefeen niyadeet toonaatiib sidkiib kinki han?>>
idiin.
49 Yasuu'a <<Ani jin kaabari.
Ani Baabu hamooysani,
laakiin baraak aneeb kahamooysitaan.
50 Ani uknaayu dehaay matuun kaahariw.
Laakiin beet toona harriiw gaal eefi.
Aree baruuh gaadiibu.
51 Oosdik andi hookna:
aniib ibhali isnaakiirka,
door han tooyat rhi kiidi.>>
idi.
52 Malya baraah bariiyooh dehaay,
<<Oont'a barook jin hook eefeeneet toona daayiib nikan.
Ibraahiim iya,
inabiya han iyaan.
Laakiin bariiyeek ibhali isnaakiirka,
tooyat d'amsi kiidi tindiya.
53 Baruuk baaboon Ibraahiimiika winkaabwa han?
Baruuh iya,
inabiya han iyaan.
Baruuk ugarooyook aab hiistiniya?>>
idiin.
54 Yasuu'a igwibi,
<<Ani ugarooyu as'aliyeek,
been um'alaayi takweet kiibari.
Baabu beeb baraak Ukwaasanaayookna tiyadneeb,
aneeb hamooysiineeb barooh ookna ikati.
55 Barooh door han kanaab kitteena,
laakiin ani barooh akteen.
Ani barooh kaakan iideek,
shaawti bareek t'iiteeb gwisreeb iikti.
Laakiin ani barooh akteen,
ibhaliyeeh han asnaakiir.
56 Baabuukna Ibraahiim aniib w'aayi damaan rhiyeet toona winneet hooy afirhaa iifi.
Aflaay baruuh beet toona rhiyaayt afirhiya.>>
idi.
57 Iyahuudi bariiyooh dehaay,
<<Baruuk ay tamuun hawla kitkitima,
Ibraahiim kak rhita?>>
idiin.