Yasuu'a Hamashay Tak Mheeliya
9
Yasuu'a ood'ooh hiireeree,
tak ifrayeekka hamashay rhiya.
2 Ikwiriyaatayaah barooh raatiyaana,
<<Seedna,
aay danuub oon ootak hamashay akay isfarna?
Barooh ooknaay danuub ikatiin han ifarooyeeb?>>
idiin.
3 Yasuu'a <<Bariiyuuh whamashi bariiyeeh idanuub tari ifarooyi danuub naat han shaawaab kiiki.
Ukwaasanaay akriri shaga bariiyooh rhameeni sabbii baruuh hamasheeyaabu.
4 Aflaay masi b'eebuuyt,
beeb aneeb diigwatiyaanaay ishaga ibakii nid'eet toonaatu.
Whawaad ikatiyihoob,
gaal han shagaamtiib ka'adgiriya.
5 Ani tuduniyaatiib ahayeeb ookiik,
ani tuduniyaati nuur akati.>>
idi.
6 Yasuu'a een ibhali idiit har'ii,
whaashiib siil tifiyaayt,
eesiil whaashiib yhathik.
Malya oothiin ootaki gw'adeeb id'i.
7 Malya Yasuu'a bariiyooh dehaay,
<<Difaat,
Silwaami hoodhiib ifiireek shigwidha!>>
idi.
Silwaam aree <<Diigwatamaab>> miyaadu.
Aflaay uutak idifaayt ifiireeh ishigwidh,
shaawti rhee y'agar.
8 Bariiyaah ishawawwa baliin suur barooh n'alee rhiyaan uudehaywa raatiyaana,
<<Uun baruuh s'atiitka karaamaat iin'al ootak kiiki han?>>
idiin.
9 Gwadi aree been baruuh un'aliiga ookna ikatiyeet toona hadiidiyaan.
Wari aree <<Barooh kiiki,
laakiin barooh t'iiteebu.>>
idiin.
Aflaay uutak uukna,
<<Ani been ootak akati.>>
idi.
10 Baraah barooh raatiyaana,
<<Oont'a baruuk kak rhitniya?>>
idiin.
11 Baruuh igwibi,
<<Uutak Yasuu'aab ittiyoodi thiin yhathikaayt,
igw'adeeyi kehii id'i.
Malya Silwaam ookiik difiit ifiiri ashangwiidheet toona sooyaheeb.
Aflaay adifaayt willa ifiiri ashgwidhihoob irhiti adgiran.>>
idi.
12 Uudehay barooh raatiyaana,
<<Baruuh naad eefi?>>
idiin.
Baruuh <<Kaakan.>>
idi.
Ifariisi Imheeltiib Raatiyaan
13 Uudehay been ootak suur hamasheeya iifiib Ifariisi haay ibeen.
14 Yasuu'a oothiin yhathikaayt been whamashay hooy mheeliyaneet tuuyin sabtu.
15 Aflaay Ifariisi ootak kak mheelamiyaayt rhiyaneeb masi raatiyaan.
Uutak igwibi,
<<Igw'adeeyi kehii thiin id'i,
ifiiri ashgwidh,
oont'a aflaay irhiti adgiran.>>
idi.
16 Ifariisiyee gali,
<<Uutak oon ushaga daayaab Ukwaasanaay kiiki,
toosabti gaanuun sinaakiraab kiiki.>>
idiin.
Laakiin wari raatiyaana,
<<Tak maagnaaytikina kak bak t'iiteet m'uujisa ikwasi?>>
idiin.
Aflaay baraah malu mhiin y'adhadhna.
17 Ifariisi ootak masi raatiyaana,
<<Baruuk uutak whamashi hooy mheeliya hook tindiya,
daayiitu,
oon ootakiib naan tindiya?>>
idiin.
Uutak igwibi,
<<Baruuh nabiibu.>>
idi.
18 Iyahuudi ootaki farooyee dehaay diigwatiyaaneeb hadiit,
uun uutak suur hamashay iiktiyeet toonaawwa,
oont'a rhiiniyeet toonaawwa aamanaab kiikeen.
19 Baraah ootaki faru sakanaayaana,
<<Uun baruuh oorookna?
Baruuh whamashi haay faraayu tiyadna.
Aflaay baruuh oont'a kak rhiini?>>
idiin.
20 Ifaru <<Baruuh ooroon ikatiyeet toona nikteen,
whamashi aree haay faraay ikatiyeet toona nikteen.
21 Laakiin oont'a baruuh kak irhiti adgiriyaneet toona kinkan.
Whamashi aree aaw hooy mheeliyaneeb kinkan.
Barooh raataana.
Shaawti baruuh win taku,
aree baruuh uukna infariid hookna.>>
idiin.
22 Ifarooyaah een ibhali haay iidneeb usabab,
baraah Iyahuudii iriikwna.
Iyahuudi Yasuu'a Umasiihu indiibka Iyahuudi diini gawii isaakw iyadneet toona oodehay suur sooyaaba.
23 Toona toonaati sabbii aree ifarooyaah,
<<Baruuh shaawti win taku,
barooh raataana!>>
idiin.
24 Ifariisi ootak whamashi haay faraay t'a han malya door waliikiyaaniit,
<<Oosdik hadiidtiniyeet toona Ukwaasanaay suurii halafooya!
Uun uutak barook mheeliyaab amaag tak ikatiyeet toona nikteen.>>
idiin.
25 Uutak igwibi,
<<Baruuh amaag tak ikatiyeeb biikaayeeb ani kaakan.
Gaana daayiib akteen:
ani suur hamashayu oont'a aree rhani.>>
idi.
26 Malya baraah barooh raatiyaana,
<<Naan dehook id'i?
Kak aree whamashi hooy mheeliya hook?>>
idiin.
27 Uutak igwibi,
<<Suur akay sooyan hookna,
laakiin sinaakraab kitteena.
Oont'a masi naan teemsiiwneet toona tehariwna?
Baraak han tari bariiyeeh kwiriyaatay tikatiineet toona tehariwna han?>>
idi.
28 Malya Ifariisi ootak neewiyaana,
<<Baruuk been ootaki kwiriyaataayi tikatiya,
laakiin hinin Muusaay kwiriyaataya.
29 Ukwaasana Muusaab bhaliisamiyaneet toona nikteen.
Been uutak laakiin keeya mhiinii y'aab ikatiyeeb han kinkan!>>
idiin.
30 Uutak <<Tuun winneet girbaanaatu!
Baraak baruuh keeya mhiinii ikatiyeeb kitkanna,
laakiin aneeb whamashi hooy mheeliyaheeb!
31 Ukwaasana amaag dehay biisinaakiireet toona nikteen.
Baruuh oodehay barooh hamooyseenwa,
baruuh yharriiweet toona faayseenwa isnaakiir.
32 Whamashi haay faraay tak mheelamiya iidneeb gaal han maasiwaab kiiki.
33 Uun uutak Ukwaasanaay y'aab biikaayeek,
naat han iid'eet toona ka'adgiriya.>>
idi.
34 Baraah ootakii dehaay,
<<Baruuk maagnaaytiib faraaywa,
oont'a aree hinin allamtiniya han?>>
idiin.
Malya ootak Iyahuudi diini gawii iskwiin.
35 Yasuu'a Ifariisi oon ootak Iyahuudi diini gawii ifir'aneet toona imaasiwihoob,
ootak imriit raatiya,
<<W'aadami Oor aamantiniya?>>
idi.
36 Uutak <<Seedna,
baruuh aabu?
Sooyaheeb,
aflaay barooh aamani andi.>>
idi.
37 Yasuu'a bariiyooh dehaay,
<<Baruuk suur akay barooh rhita,
oont'a geebook hadiidiiniibu.>>
idi.
38 Uutak <<W'ankwanaay,
aamanani.>>
idiit Yasuu'ii dehaay asjidiya.
39 Yasuu'a <<Toon tuduniya haakamti jillaay y'aabuuyt,
aflaay whamashay rhi indi,
aree baliin suur rhiin aree hamasheeyi iyadna.>>
idi.
40 Beentooy Fariisi gwadi bariiyooh geeb iifiin,
een ibhali imaasiwniit barooh raatiyaana,
<<Naan?
Hinin hamashayaab han?>>
idiin.
41 Yasuu'a <<Baraak hamashayaab tiiktiineek,
maagti kina kit'akeena.
Laakiin irhiti adgirnay tiyadna sabbii,
masi baraak maagti kinaabaana.>>
idi.